2 Korin 4 - Caekäcai Kangthae (Lemi)

Sätüng thung-a khai saite sui tangkae na

¹ Säthaw üng bäheng saite hai-a äni ma kai ce tea hini kälu sa hai hethang py vi dy te phüng-a, kai ce lä aethawdi ö te y vi.

² Kai ce lä saerae hethang hai ho hethang hawi khaw saite kälu angxynlyng na tea khaisö ö vi dy. Kai ce lä ämi tea la kaeling sa te y kha Säthaw üng älo lä aemäqa te y vi. Kai ce lä lo mitang tea thui phrang ö te vi. Hini kätyng Säthaw üng maw-a cüng vi näte khimi angxynlyng na üng bälung thung-a mäny haw ö te vi.

³ Kai ce thui saite Angthang Kähawi tea ho dylä, Säthaw ma täphra saite na tähang ho te vi.

⁴ Hini älawngpre tea pyng saite Setan lä yng y saite khimi na üng bälung kaedawng na tea ving hai pa te vi. Tukätephüng-a äni ce lä Khrista phüng Angthang Kähawi üng phung-ang aesang saite kaevang tea nung haw ö y. Khrista lä Säthaw hai aetawng khaw te vi.

⁵ Kai ce lä kai ma ce üng phüng na tea thui ö te y. Kai ce lä “Isu Khrista lä khimi angxynlyng na üng Areng vi näte hai kai ce lä Isu hai-a nang ce üng mawsawng na lawng ö vi” näte thui ö te vi.

⁶ Säthaw ma, “Käving thung-a kaevang awng sy” näkha thui vi dy. Hini Säthaw lä mä-ai üng bälung na thung-a la äni üng kaevang aevang hai te vi dy. Tukätephüng-a Isu Khrista üng mimai-a mä-ai lä Säthaw üng phung-ang tea nung kha mäny haw ö te vi.

⁷ Kai ce lä sui tangkae awng saite sätüng na kätyng vi. Hini hai-a kai ce lä äte angxynlyng na qawng-a lengky saite haidae lä Säthaw hai aesui te vi näte mätü te vi. Hini lä kai ce hai aesui te y.

⁸ Kai ce lä mätang bälai saite cawngkhang aeting ngaila, kai ce üng bälung lä tibutica ö y lyng. Kai ce lä sa hethang kae saite tea mäny y ngaila, aethawsi ö te y.

⁹ Khimi ce ma kai ce tea sakälö khü ngaila, Säthaw lä kai ce bung khaisö ö y lyng. Khimi ce ma kai ce tea bo ngaila, kai ce lä dü ö te y vi rawng.

¹⁰ Khimi ce ma Isu bung bädü te kätyng, kai ce la kätü qütä-a dü saite hai aenai ö te by vi. Hini kätyng khimi angxynlyng na lä kai ce hai-a Isu lä hing vi näte mäny haw ö te vi.

¹¹ Kai ce lä hing te thüng-a, Isu tähang dü saite tea aenai ö jawjaw te vi. Tukätephüng-a kai ce üng dü haw saite ätabung hai-a Khrista üng hing saite tea khimi ce lä nung haw ö te vi.

¹² Kai ce lä dü saite hai aeting ö jawjaw te vi. Tungaila nang ce lä dungtäsa kähing tea dang ö ai.

¹³ Caekäcai thung-a, “Kai lä yng te phüng-a, thui te vi” näkha tärü te vi. Hini kätyng aetawng saite yng te hai kai ce lä Angthang Kähawi thui ö te vi.

¹⁴ Areng Isu bung mäning haile tyng pa saite Säthaw ma Isu hai bungtä kai ce bung mäning haile tyng by ai näte kai ce lä mäny ö te vi. Äni lä nang ce hai kai ce bung äni üng maw-a ka vi ai.

¹⁵ Hini angxynlyng na lä nang ce üng tähang vi. Säthaw üng tähang kähawi lä khimi awng mang rae, awng mang rae saite na tea tyng bawi te phüng-a, khimi ce lä Säthaw tea bälaw kha Säthaw üng phung-ang tea tengxyng y mäsang ö vi ai.

Yng te hai-a hing saite

¹⁶ Tukätephüng-a mä-ai lä manila aethawdi vai ö y lyng. Mä-ai üng ätabung na lä dü hethang täretäre aenai rae ngaila, Muilaw Käcai ma mä-ai tea py te hing saite lä känitä pyng-a känitä lä aethaw awng hai rae ö te vi.

¹⁷ Mä-ai lä tänaetä tähang aeting saite hini mätang bälai te lä jahaw vi. Hini kätyng aeting saite hai-a, Säthaw lä mä-ai tea lengky saite dungtäsa phung-ang py vi ai.

¹⁸ Tukätephüng-a ämi hai nung haw saite na kheng y käla, mä-ai lä nung haw y saite na tea kheng khü ö te vi. Nung haw saite na lä tänaetä awng kha nung haw y saite na lä dungtäsa awng te vi.