2 Korin 11 - Caekäcai Kangthae (Lemi)

Pawlae hai käjüng sa saite angtawtha na

¹ Kai lä kangthö lawngtä kätyng älo äje cäcaw aepe dylä, kai tea khung ö. Tätang khaw nang ce lä khung ö te vi.

² Säthaw lä nang ce tea dökhaw te kätyng kai la nang ce tea dökhaw te vi. Kai lä nang ce bung anglaw käcai ping kätyng nawngmäcaw lawng saite Khrista lawngtä xyng hai aepawng hethang älo aedo pa te vi.

³ Tungaila Setan lawng saite bärui lä äma üng kaeling kaemae sa te hai Evi tea hunghö sa hai hethang the te kätyng khimi phütä ma nang ce tea älang tämang hai kha nang ce lä Khrista bung bälung aevaw saite tea kädephae ö ai näte kai lä bälung mawng te vi.

⁴ Khimi lawngtä lä nang ce tea ly kha kai ce ma Isu phüng thui saite hai aetawng y saite phüng thui dylä, nang ce lä anghawtho kha tängai ö te vi. Y dylä Säthaw ma nang ce tea py saite Muilaw hai aetawng y saite phüng tea khimi lawngtä ma thui dylä, nang ce lä lady ö vi. Nang ce yng saite hai aetawng y saite Angthang Kähawi tea khimi lawngtä ma thui dylä, nang ce lä jahaw-a yng ö vi.

⁵ Nang ce ma aesangky te kätyng mäthi saite angtawtha na lä kai qawng-a aesangky vi näkha kai lä aedawng te y vi.

⁶ Kai lä älo thuikaw phi saite y ngaila, ätete na mäny haw hethang bälungkähae awng te vi. Hini lä kai ce ma älang cawngkhang na hai nang ce tea mäny hai rüng ö pyng te vi dy.

⁷ Kai lä nang ce tea äte ävang la y käla Säthaw üng Angthang Kähawi thui te vi dy. Kai lä aemäneng te hai-a nang ce tea aely leng hai te vi. Hini kätyng kai üng sa saite lä tämang te vi mei.

⁸ Kai lä nang ce tähang kälu sa haw hethang kangkawng kälang na üng tangkae la te vi dy. Nang ce tea säbawng hethang äni ce te üng bäru te vi näkha lawng lawngtä ma thui haw te vi.

⁹ Kai lä nang ce hai mangtä awng te thüng-a, kai hae haetä aely ngai te kätü-a lä nang ce thung üng ämi tea la bälungbi hai te y lyng. Makedonia khö üng tyng saite yng te kängby jä-ai na ma kai aely ngai saite angxynlyng na säbawng ö te vi dy. Kai lä nang ce tea äte manila bälungbi hai hethang awng vai te y näte kai lä ae-y te vi. Vaimaw mang-a la hini kätyng awng by ai näte kai lä ae-y te vi.

¹⁰ Kai üng bälung thung-a lä Khrista üng lo mitang awng te phüng-a, Käri pre angxynlyng-a ämi lawngtä la kai hini kätyng aethaw te tea mäkhang haw ö y ai.

¹¹ Kai lä nang ce tea bälung aevaw y te phüng-a, hini kätyng thui te mei. Kai lä nang ce tea bälung aevaw vi näte Säthaw lä mäny te vi.

¹² Kai lä vaihi sa saite kätyng sa jawjaw ai. Hini kätyng hai-a, käjüng sa saite angtawtha na ma äma ce üng sa saite kälu lä kai ce hai aetawng vi näkha aethaw jawjaw haw ö y vi ai dy.

¹³ Hini khimi ce lä angtawtha na lawng hethang käjüng aesa ö te vi. Äni ce lä kaeling kaemae thui saite khimi na vi. Äni ce lä Khrista üng kälu sa saite angtawtha na lawng hethang käjüng aesa ö te vi.

¹⁴ Äni ce sa saite na lä cangxei hethang awng te y. Setan angra äma lä Känipre kaevang üng angtawtha lawng hethang käjüng aesa te vi dy.

¹⁵ Tukätephüng-a äni üng mawsawng na lä cüng saite üng mawsawng na lawng hethang käjüng sa saite lä cangxei hethang awng te y. Kangkhüng-a Säthaw lä äni ce tea äma ce sa te hai aeteng khaw saite deng py ai.

Pawlae üng mätang bälai saite na

¹⁶ Kai thui tynglyng he ngai saite lä, ämi lawngtä la kai tea kangthö kätyng dawng hang. Tungaila nang ce ma kai tea kangthö kätyng dawng dylä, kangthö lawngtä kätyng kai bung lady ö. Tukä dylä kai lä äje cäcaw aethaw haw vi ai.

¹⁷ Kai üng aethaw saite lä Säthaw üng älang kätyng y. Kai lä kangthö kätyng thui vi ai.

¹⁸ Khimi awng mang saite na lä älawngpre üng älang kätyng aethaw ö te phüng-a, kai la aethaw by ai.

¹⁹ Nang ce lä nang ma ce tea bälunghae phi te kätyng dawng te phüng-a, kangthö na tea anghawtho te hai tängai ö te vi.

²⁰ Hini qawng-a cang y, nang ce tea mawsawng na kätyng pyng saite khimi qütä tea nang ce lä änawngsa ö te vi. Nang ce tea kaeling kaemae sa kha bäru saite na, mäthi y saite na, nang ce üng mimai na tea täbeng saite na tea nang ce lä khung ö te vi.

²¹ Kai ce lä nang ce tea hini kä sa hethang aethaw awng y kha saerae te hai thui hethang kae te vi. Tungaila khimi lawngtä lä hae haetä phüng tea aethaw vawng dylä, kai la aethaw vawng te by vi. Kai lä kangthö kätyng thui te vi.

²² Hini angtawtha na lä Hebärai khimi na mei. Kai la by vi. Äni ce lä Isrelae khimi na mei. Kai la by vi. Äni ce lä Abraham üng kaesui kaebeng na mei. Kai la by vi.

²³ Äni ce lä Khrista üng mawsawng na mei. Kai lä hawiky saite mawsawng vi. Kai lä kangthö kätyng älo aepe te vi. Kai lä äni ce qawng-a cang y Khrista üng kälu mäsaexa te hai sa vi dy. Kai tea lä äni ce qawng-a cang y thawng thung-a pä-ung leilae te vi dy. Khimi ce ma kai tea lä äni ce qawng-a cang y boky te vi dy. Kai lä äni ce qawng-a cang y dü saite hai aeting leilae te vi.

²⁴ Judae khimi na ma kai tea ruinawng na hai qeng rui thung täkawtä bo te äbangawtä mäteng ma awng te vi dy.

²⁵ Rom khimi na ma kai tea pawngpai hai ry te lä ämäthung vi dy. Khimi ce lä kai bung bädü hethang älung aeke na hai käde vai ö te vi. Kai lä tui sangphaw käpra qeng thungtä aedang vai te vi. Kai lä pangle thung-a kärung rungtä hai käni nitä tui thung-a awng vai te vi dy.

²⁶ Kai lä khölawng tho leilae te vi. Hini kätyng ly te kätü-a, kai lä tävaw käleng thung üng käsi aeting saite, damärae na hai aeting saite, kai ma üng ceng khekhe Judae khimi na ma kai tea ri saite sa hethang ngai te hai khimi ceng kälang na ma ri saite sa hethang ngai ö te vi. Kai lä märü thung-a ri hethang aeting saite na, daithung kärang-a ri hethang aeting saite hai pangle thung-a ri hethang na aeting te vi. Kai üng kängby jä-ai na kätyng käjüng sa saite khimi na ma la kai tea ri saite sa hethang ngai ö by vi dy.

²⁷ Kai lä kälu sa te mäsaexa vi dy. Kai lä i haw y käla awng saite, bö aelang saite, tui aehe saite, ca nei hethang awng y saite, aekhu aena hethang awng y saite hai de phi saite na aeting leilae te vi dy.

²⁸ Honi qawng-a cang y kai lä käsi kälai kälang na aeting te vi rawng. Kai la kangkawng angxynlyng na tähang käni qütä bälungbi te by vi.

²⁹ Kai lä aethawdi saite khimi phütä hai aeting te kätü-a, aethawdi saite khimi kätyng lawng te by. Kai lä hunghö sa hai hethang the pyng saite khimi phütä na hai aeting te kätü-a, hunghö sa hai saite khimi na tea kädawtho te vi.

³⁰ Kai aethaw hethang kae te lä, kai üng aethaw awng y näte phüng na tea mätü hethang aethaw ai.

³¹ Kai lä kaeling kaemae sa y näte Areng Isu üng Pä-ai Säthaw lä mäny te vi. Äni üng ämüng tea khimi ce lä bälaw ö jawjaw sy.

³² Kai lä Damasaka märü-a awng te thüng-a, sanphrang Arita täkui-a awng saite Aecörae mätawngky lä kai bung ne hethang Damasaka märü üng reisae na tea rui hai ö te vi dy.

³³ Tungaila kai üng äkähui na lä kai bung paeceng thung-a mäceng kha märü üng baesung äkhaw mang ruinawng hai bäla te phüng-a kai lä honi sanphrang kö thung üng lawi haw te vi dy.