2 Korin 10 - Caekäcai Kangthae (Lemi)

Pawlae lä äma üng kälu phüng mäthang saite

¹ Kai, Pawlae, lä Khrista üng bälung aemäneng kha äkäneng awng saite hai-a nang ce tea thui hethang ngai te vi. Khimi phütä ma, kai lä nang ce hai aeting te kätü-a, äkäneng-a awng ngaila, hanglaw-a awng te kätü-a lä nang ce tea pring vawng vi näkha kai üng phüng thui ö te vi.

² Khimi phütä ma kai ce lä älawngpre üng älang kätyng awng te vi näkha kai ce phüng thui ö te vi. Kai ce tyng te kätü-a, hini khimi ce tea kai ce lä pring vawng ö vi ai. Hini kätyng nang ce tea kai ce lä pring he aely ngai y hethang näkha aesi aebai ö te vi.

³ Kai ce lä hini älawngpre-a awng ngaila, älawngpre üng älang kätyng aety ö te y.

⁴ Kai ce ma süng saite maiphaw maicae na lä, hini älawngpre üng tho saite na y vi. Säthaw ma kai ce tea hini haidae awng saite maiphaw maicae na py te vi. Setan te üng aethaw awng saite kaedawng na tea täphra haw hethang vi. Tüng y saite älo ae-e te na tea täphra hethang vi.

⁵ Kai ce lä khimi ce ma Säthaw bung mäny y hethang Setan üng mäkhangky saite na tea täphra ö king te vi. Kai ce lä khimi ce üng dawng saite angxynlyng na tea ne king kha äni ce bung Khrista üng älo tea tängai hai ö pa te vi.

⁶ Nang ce lä Khrista üng älo tea tängai king te kai ce ma nung ö te kätü-a, Khrista tea elekhei sa saite khimi angxynlyng na bung lä kai ce ma dengpy hethang awng rüng ö vi ai.

⁷ Nang ce lä ärang mang kheng kha ämaw äcae haetä tea xyng nung ö te vi. Nang ce thung üng phütä lä äma ma tea Khrista üng äkähui vi näkha ae-y khü dylä, äni lä Khrista hai aesui te kätyng kai ce la Khrista hai aesui ö te vi näkha dawng te lä hawi khaw te vi.

⁸ Kai lä Areng ma py saite aenae phüng qengtä cang y aethaw dylä, saerae te y vi. Säthaw lä nang ce üng yng saite cakhi hai hethang kai ce tea aenae py vi dy. Honi aenae lä nang ce üng yng saite aethawdi hai hethang y vi.

⁹ Kai ma tärü saite cae na hai-a nang ce tea ri hai hethang ngai te vi näkha dawng ö hang.

¹⁰ Khimi phütä ma, “Pawlae lä äma üng cae na hai aenae mätü kha tengxyng y haidae awng te vi. Tungaila äma khekhe lä kai ce üng maw-a tyng te kätü-a, äni lä aethawdi kha älo na thui lä aetütü kae vi” näkha thui ö te vi.

¹¹ Kai lä hanglaw-a awng kha cae na tärü te hai nang ce tea tyng kha sa saite lä aetawng khaw vi näte hini khimi ce ma mäny hethang kae.

¹² Kai ce lä mä-ai ma tea aely leng te vi näkha aedawng saite khimi na hai aetawng khaw te vi näkha thui hethang ngai ö te y. Honi khimi ce lä äma ce tea “Kai ce lä hawi te vi, kai ce lä tüng te vi” näkha dawng kha aethaw dylä, honi khimi ce lä äte haetä la mäny y näte mätü ö te kae.

¹³ Kai ce lä Säthaw ma py saite aethaw hai aenae qawng-a cang y aethaw ö te y vi. Kai ce lä Säthaw ma py saite kälu phüng xyngtä ni aethaw ö vi ai. Kai ce üng kälu sa saite lä nang ce awng saite mityng khytä tyng vi dy.

¹⁴ Kai ce lä Säthaw ma särilo thui y saite mityng-a, kälu sa ö te y vi. Kai ce lä nang ce tea tyng te kätü-a, Säthaw ma särilo thui saite mityng-a kälu sa ö te vi dy. Kai ce lä nang ce awng te khytä ly kha Khrista üng Angthang Kähawi nang ce tea thui ö te vi dy.

¹⁵ Kai ce lä Säthaw ma py saite kälu phüng xyng aethaw ö te vi. Kai ce lä khimi kälang na üng kälu phüng tea aethaw ö te y lyng. Kai ce lä nang ce üng yng saite ryng jawjaw kha nang ce thung-a kai ce kälu sa hethang lä leng rae ai näkha aethang khai ö te vi.

¹⁶ Honi pyng-a, kai ce lä nang ce awng saite mityng cang y mityng kälang kangthae na-a Angthang Kähawi thui haw ö vi ai. Kai ce lä khimi kälang na äma ce üng mityng-a sa saite kälu phüng tea aethaw hai hethang ngai ö te y lyng.

¹⁷ Caekäcai thung-a, “Khimi lawngtä aethaw hethang ngai dylä, Areng üng sa saite phüng tea xyng ni aethaw hethang kae” näkha näte vi.

¹⁸ Ätephüng-a mei nädylä, khimi lawngtä ma äma üng phüng aethaw saite tea Säthaw lä ngai te y. Areng lä äma khekhe tea bälaw saite khimi na xyngtä tea ni ngai te kae vi.