1 Timote 6 - Caekäcai Kangthae (Lemi)

¹ Mawsawng qütä lä äma ce üng ingkung na tea tämö khai hethang kae. Tukä dylä Säthaw üng ämüng hai mä-ai üng mätu saite tea ämi ma la thui rungrang hethang dang y lyng.

² Ingkung na lä yng saite na dylä, äni ce lä Khrista phüng-a kangby jä-ai na lawng by vi dy näkha tämö khai y käla awng ö hang. Äni ce lä äma ce üng ingkung na tähang mawsawng kälu sa rae hethang mäteng ma kae ö te vi. Äni ce üng kälu hai-a ävang dang te khimi na lä yng saite na hai Khrista hai-a bälung aevaw saite na lawng ö vi dy. Hini älo na nang ma äni ce tea mätu kha mäci pa ö ba.

Kätüng y mätu saite särae na

³ Khimi phütä na lä tüng y saite älo na mätu ö vi. Honi na lä mä-ai üng Areng Isu Khrista ma mätu saite älo mitang na hai aebäla te y. Kätüng mätu saite na lä Säthaw üng kängai hing saite na tea säbawng ö te vi.

⁴ Kätüng y mätu saite khimi na lä äte la mäny y käla bälung leng ö te vi. Äni ce lä ae-e hethang älo bälang na phüng aejaw aemang saite tea ngai ö xüng te vi. Honi älo na lä pä-e saite, ae-e saite, khimi ce phüng thui rungrang saite, khimi kälang na phüng käsi dawng saite, hai lawng lawngtä teng lei y te aekäsi saite na lawng ö te vi.

⁵ Hini kätüng y mätu saite särae na lä äma ce tingtawi ae-e hethang ngai jawjaw kha tüng te, tüng y te tea mäny haw y saite khimi na vi dy. Äni ce lä Säthaw phüng mätu saite lä tangkae dang hethang älang haetä vi näkha aedawng ö te vi.

⁶ Tungaila mä-ai lä Säthaw üng kängai sa kha Säthaw ma py saite hai bälung kawng ea awng hethang mä-ai tähang hawiky te vi.

⁷ Hini älawngpre-a mä-ai lä aepeng te kätü-a, äte haetä la nähai ö te y. Dü te kätü-a lä mä-ai hai mangtä äte haetä la nähai haw ö te y.

⁸ Mä-ai tea aely ngai saite käca känei hai aekhu aena nae awng dylä, bälung kawng hethang kae.

⁹ Tawngnang hethang ngai saite khimi na tea Setan lä hunghö sa hethang the pa vi. Äni ce lä kangthö na üng kängai hai ae-aw saite bälung phüng-a, mä-ai ma tea mätang bälai te hai Säthaw lä äni ce tea deng py vi ai.

¹⁰ Tangkae phawisae tea bälung aevaw te lä käsi angxynlyng na üng älangdüng vi. Khimi phütä na lä tangkae dang hethang ngai phi te phüng-a, äma ce yng saite na tea kädephae ö te vi. Äni ce lä mä-ai ma tea aeteng hai thung te kätyng nawphi rung khytä sa ö te vi.

Pawlae ma kangkhüng üng täru saite lo

¹¹ Säthaw tea yng saite Timothe ä, nang lä Säthaw hai aesui te vi. Tukätephüng-a nang lä honi angxynlyng na tea aehi ba. Tukha käcüng saite, Säthaw üng kängai-a awng saite, yng saite, bälung aevaw saite, änawngsa saite hai bälung kähawi awng hethang nang lä aethaw aesa ba.

¹² Täre aety jawjaw saite reisae kähawi kätyng, nang lä Khrista tea yng jawjaw ba. Säthaw ma nang tea dungtäsa hing saite dang hai hethang ka te vi. Tudylä dungtäsa hing saite tea nang lä cakhi-a süng khü ba. Nang lä khimi ce maw-a Khrista tea yng saite phüng thui pyng te vi dy.

¹³ Hing hethang äte angxynlyng na py saite Säthaw hai Pontia Pilata mätawngky üng maw-a älo mitang tho saite Isu Khrista üng maw-a, nang tea kai lä särilo thui te vi.

¹⁴ Sa tämang y käla Säthaw üng särilo tängai ba. Tudylä mä-ai üng Areng Isu Khrista ly haile tyng y rytä lä, ämi ma la nang tea cy haw y ai mang.

¹⁵ Säthaw ma üng khai rüng saite käni-a, Khrista lä ly haile ai. Säthaw lä bälaw hethang aeteng khaw saite lawngtä xyng awng te Sanphrang vi. Äni lä sanphrang na üng Sanphrang hai areng na üng Areng vi.

¹⁶ Dungtäsa hing saite lawngtä xyng lä Äni vi. Ämi lawngtä ma la äteng-a ly haw y kaevang pheng saite thung-a Äni lä awng te vi. Äni bung lä ämi lawngtä ma la nung vai y, nung la nung haw y. Khimi ce ma Äni tea tämö khai ö kha Äma üng haidae lä dungtäsa awng jawjaw ai. Amen.

¹⁷ Vaini älawngpre-a tawngnang saite khimi na tea bälung leng y hethang särilo hai thui pa. Äni ce lä äma ce üng tangkae na qawng-a ae-y y hethang thui pa. Tangkae lä la dawde haw te phüng-a vi. Honi jüng-a äni ce lä Säthaw tea ae-y hethang kae. Äni lä mä-ai kawng hethang angxynlyng na mäsai y käla, awngmang-a py te vi.

¹⁸ Khimi ce tea säbawng hethang thui pa. Äni ce lä hawi saite kälu na sa hethang kae. Khimi ce tea mäsai y käla py hethang hai äma ce üng vyngsai na khimi kälang na tea bäri hethang äma ce üng ngai te kätyng äni ce tea mätu pa.

¹⁹ Hini kätyng äni ce lä äma ce üng mawlang tähang vyngsai na mätung ö ai. Hini na lä äma ce üng hing hai hethang cakhi saite langdüng vi. Tudylä äni ce lä hing saite tätang dang haw ö vi ai.

²⁰ Timothe ä, Säthaw ma nang tea ae-y kha sa hethang py saite kälu tea kähawi-a rui ba. Säthaw hai aesui y saite lo, aetütü saite lo, ävang ting y saite lo na tea aehi ba. Säthaw phüng tea elekhei sa kha kätüng y mätu saite bälunghae te na näkha näsaite na hai nang lä älo aepe kha kätü byng hai hang ba.

²¹ Khimi phütä na lä hini mätu saite tea tängai ö vi dy. Hini hai-a, äni ce lä Khrista tea yng saite kädephae ö te vi. Säthaw üng tähang kähawi lä nang ce angxynlyng tea py jo sy.