1 Timote 5 - Caekäcai Kangthae (Lemi)

Yng saite na tea rui hethang kälu

¹ Nang qawng-a nawngmäcaw mätawngky lawngtä tea lä älo aethaw paitae hai pring pa hang. Äni tea lä nang üng äpä-ai kätyng tämö khai kha älo hai aepe pa. Nang qawng-a nade nawngmäcaw na tea lä äkangby na kätyng thui ba.

² Nawngmädi mätawngky na tea lä änä-awi na kätyng tämö khai kha nang ma qawng-a nade saite nawngmädi na tea lä ticaw na kätyng älo aepe ea bälung käcai hai thui ba.

³ Säbawng kha mäcaw hethang amäjy awng y saite lömai nä-awi na tea lä tämö khai kha säbawng pa.

⁴ Tungaila lömai nä-awi lawngtä tea caw nade na, y dylä kätö käteng awng dylä äni ce lä aely lengky te hai engthung khaw-a awng saite khimi na tea säbawng ea Säthaw üng kängai kätyng hing te mätü ö sy. Honi kätyng-a äni ce lä äma ce üng nä-awi pä-ai na hai kangsi kangjaw na tea säbawng te hai tärawitha haile tyng ö te vi dy. Äni ce hini kätyng sa ö te lä Säthaw tea kawng hai te vi.

⁵ Nang ma säbawng hethang ngai saite lömai nä-awi lä äni tea säbawng hethang ämi la awng pa y. Honi kätyng nawngmädi lömai lä äma tea säbawng hethang tähang Säthaw tea kädüng kädang aetang jawjaw kha aethang khai te hai awng saite nawngmädi lawng he kae.

⁶ Tungaila äma üng kängai xyng-a awng kha Säthaw hai aesui y-a awng saite nawngmädi lömai lä hing ngaila dü rüng te vi dy.

⁷ Hini täru saite lo na yng saite khimi na tea la thui pa jo. Tudylä äni ce tea ämi lawngtä ma la sa tämang saite awng näkha cy haw y ai mang.

⁸ Khimi lawngtä lä äma üng amäjy na tähang hai äma üng engthung khaw tea mäteng ma rui hethang ngai y dylä, äni lä Khrista tea yng y näkha mätü te vi. Honi khimi lä Khrista bung mäny y saite khimi qawng-a siky vi dy.

⁹ Khösäning rui täru cang y saite nawngmädi lömai dylä, lömai na üng ämüng cae-u thung-a täbawi kha tärü sy. Äni lä äma üng nawngpaw lawngtä xyng hai cakhi-a awng hethang kae.

¹⁰ Äni lä khimi ce tea säbawng saite khimi vi näte tea khimi kälang na ma lä mäny ö bawi vi. Honi lä caw nade na tea kähawi-a mäsang saite, angvüng angvaw na bung äma üng ing-a lady kha mäkung saite, yng saite na üng äkho na tea mäse saite, mätang saite na tea säbawng saite hai kälu kähawi angxynlyng na sa jawjaw hethang äni lä kae vi.

¹¹ Säning rui täru täkui üng lömai nä-awi na bung lä lömai na üng ämüng cae-u thung-a täbawi kha tärü pa ö hang. Äni ce lä nawngpaw nang haile tyng hethang bälung kaedawng awng dylä, äni ce lä Khrista üng kälu sa hethang tämang ö ai.

¹² Tukha äni ce lä angcü üng Khrista tea aedo saite älo täphra te phüng-a, Säthaw ma äni ce tea lä deng py vi ai.

¹³ Hokä cang y, honi lömai nawngmädi käna na tea lä kangkawng ma mäcaw dylä, kälu sa ö y vi ai. Äni ce lä khimi ce ing qütä dawnghang ly tütü kha äma ce üng kätü tea bärawng ö te vi. Hokä äni ce lä aethaw käli na lawng te cang y, äni ce lä khimi ce phüng thui rungrang te hai khimi ce tea xhu hai saite älo na, hai äni ce thui he hawi y saite na phüng thui ö te vi.

¹⁴ Tukätephüng-a lömai nä-awi säning käna na lä nawngpaw na nang haile ea caw nade na dang kha äma ce üng engthung na tea rui ö hethang kai lä mäci te vi. Tudylä mä-ai üng bälung kae-i na ma yng saite na tea cy hethang awng ö y ai.

¹⁵ Lömai nawngmädi phütä na lä Säthaw te mang aekö haile te hai ma Setan angra tea hui ö te vi näte lä tüngkhaw vi dy.

¹⁶ Yng saite nawngmädi na üng engthung-a nawngmädi lömai na awng dylä, äni ce lä honi na tea säbawng pa hethang kae. Kangkawng lä honi äma ce üng engthung na thung-a awng saite nawngmädi lömai na tea mäcaw hethang kae y. Tudylä kangkawng lä mitang khaw säbawng hethang ngai saite lömai na tea lä hawihai pailai säbawng haw ai mang.

¹⁷ Kangkawng tea kähawi-a rui saite mätawngky na tea yng saite na lä tämö khai ea bälung aepy bärai te hai tangkae phawisae na hai säbawng ö hethang kae. Äni ce lä Säthaw üng angthang mätu ea thui te phüng-a, äni ce tea lä tämö khai hethang aeteng te vi.

¹⁸ Caekäcai-a thung-a, “Caw aeti saite raebawi üng täbawng tea lä tämüng pa hang” näkha awng vi. Vai kälang mang-a awng saite losai haetä lä, “Kälu sa saite khimi lä äma üng sa te ävang na dang hethang aeteng vi” näkha awng te vi.

¹⁹ Khimi lawngtä lä kangkawng mätawngky tea hunghö sa näkha cy dylä, tängai ö hang. Khimi lawng ne, lawng thungtä ma äni tea hunghö sa näkha thui xang ea ni tängai ö kae ba.

²⁰ Hunghö sa saite mätawngky tea lä yng saite angxynlyng na üng maw-a pring pa. Honi kätyng sa dylä, mätawngky kälang na lä hunghö sa hethang ri ö ai mang.

²¹ Säthaw üng maw-a, Isu Khrista hai re saite Känipre üng angtawtha na üng maw-a, hini täru saite lo na tea täphü te awng y hethang hai, mimai kheng y hethang kai lä nang tea särilo hai thui khü te vi.

²² Mätawngky sa hethang khimi lawngtä üng äqawng-a, nang üng äkö na thyng dawde hang ba. Tukädylä äni üng sa saite hunghö thung-a nang la qa te kätyng by kae dy. Nang ma ma hunghö sa y hethang sädi khai ba.

²³ Nang lä tui ma qaitä xyng nei hang. Nang lä naw leilae te hai äjo känaw awng te phüng-a, Cäpje tui äje cäcaw nei jo.

²⁴ Khimi phütä na üng hunghö sa te na lä aeny lyng te vi. Honi hunghö na tähang-a Säthaw lä äni ce tea deng py ai näte mäny haw vi. Tungaila khimi phütä na lä kangru mang-a hunghö sa ö te vi. Khimi kälang na lä honi hunghö tea kangkhüng mang-a lä nung ö ai.

²⁵ Hini kätyng-a, khimi phütä na üng kälu kähawi tea mäny praw haw te vi. Khimi kälang na lä kangru-a kähawi sa ngaila, kangkhüng mang-a lä khimi qütä ma mäny ö ai mang.