1 Timote 4 - Caekäcai Kangthae (Lemi)

Kätüng y mätu saite särae na

¹ Muilaw Käcai ma aenysy-a thui saite lä kangkhüng üng käni-a, khimi phütä na lä kätüng khaw yng saite tea khaisö ö ai. Äni ce lä kaeling sa saite angra na üng lo tängai ea, angra na üng mätu saite na te mang-a hui ö vi ai.

² Honi khimi ce lä älo mitang mätu hethang käjüng aesa kha kaeling thui ö te kae. Khimi lawngtä lä süng käbi phi hai äma kö kang dylä sa pitui kha naw te aeny y vi dy. Honi kätyng äni ce la käsi kähawi mäny saite bälung awng ö y vi dy.

³ Äni ce lä khimi ce tea ingthawng sa hethang kae y näte hai, käca känei phütä na tea ca hethang kae y näkha mätu ö te vi. Tungaila Säthaw lä käca känei angxynlyng na tea sa saite Kung vi. Yng ea lo mitang mäny saite khimi na lä Säthaw tea kawng te lo thui kha ca haw ö te vi.

⁴ Säthaw ma sa saite angxynlyng na lä hawi vi. Tukätephüng-a mä-ai lä Äni tea kawng te lo thui ea ca dylä, käca känei phütä tea lä jae hethang ngai y lyng.

⁵ Säthaw üng lo hai aetang te phüng-a, käca känei angxynlyng na lä cai vi dy.

Isu Khrista üng mawsawng kähawi

⁶ Nang lä hini kai üng täru te lo yng saite khimi na tea mätu dylä nang lä Isu Khrista üng mawsawng kähawi-a aelawng ai mang. Nang lä nang ma üng yng saite hai tängai kha mätu saite kähawi hai Säthaw ma nang tea aethaw py vi ai.

⁷ Säthaw hai aesui y saite cäkae kangrüng na tea lä aehi tätang khü ba. Honi jüng-a Säthaw üng ngai te hai hing hethang nang lä aetu ba.

⁸ Khimi lawngtä äma üng ätabung-a aethaw awng hethang aethaw aesa bärai te lä hawi vi. Tungaila Säthaw üng kängai-a awng ea hing hethang aethaw sa dylä hawiky vi. Honi kätyng aethaw sa te lä, hini älawngpre-a hing te hai, vaimaw mang tähang hing te lä ävang ting bärai vi.

⁹ Vaihi kai ma thui saite lä lo mitang kha ae-y nae hawi ea yng king hethang aeteng khaw te lo na vi.

¹⁰ Hini lo phüng-a, mä-ai lä hikä sa hethang aethaw sa ö te vi. Ätephüng-a mei nädylä mä-ai lä hing tätang saite Säthaw tea aethang khai te phüng-a vi. Äni lä khimi angxynlyng na üng Aeqangkung vi. Äni tea yng saite khimi na bung lä aeqang lyng pa te vi.

¹¹ Kai ma tärü pyng saite lo na yng saite khimi na tea mätu kha tängai hethang särilo hai thui pa.

¹² Nang lä khösäning na te phüng-a, ämi ma la mäthi y te awng hang sy ba. Nang lä älo aepe saite, hing saite, khimi kälang na tea bälung aevaw saite, yng saite, sa tämang y käla awng saite hai yng saite khimi na tähang aetu hai nae lawng sy ba.

¹³ Kai tyng te khytä, Säthaw üng Caekäcai tea yng saite khimi na maw-a, phai pa, thui pa te hai mätu hethang kätü aela ba.

¹⁴ Nang lä Muilaw Käcai ma py te sa kaw saite tea aedawng ba. Kangkawng üng mätawngky na ma nang qawng-a äkö thyng kha aetang ea Säthaw lä buisaw na üng lo hai-a, nang tea lä Muilaw Käcai üng sa kaw saite py pyng te vi dy.

¹⁵ Hini kai tärü saite na aethaw aela kha sa ba. Honi na tea nang lä tängai khü ba. Tudylä khimi qütä ma nang üng ryng saite yng te tea nung haw ai.

¹⁶ Nang üng hing saite hai mätu saite lo na tea lä sädi khai khü ba. Hini na tähang nang lä aethawsi y käla sa jawjaw ba. Hini kätyng nang sa dylä, nang hai nang üng lo tängai saite khimi na tea lä Säthaw ma aeqang vi ai.