1 Timote 3 - Caekäcai Kangthae (Lemi)

Kangkawng üng mätawngky na

¹ Hini lä ae-y nae hawi saite lo na vi. Kangkawng üng mätawngky-a lawng hethang ngai saite khimi dylä, äni üng ngai saite lä tengxyng y hawi bärai vi.

² Tukätephüng-a äni lä khimi ce ma cy haw y hethang kae. Äni lä änawngpui lawngtä xyng ni awng he kae. Äni lä äma tea aeküng saite, bälunghae saite hai hing hethang kae. Khimi ce ma tämö khai saite khimi-a lawng te hai angvüng angvaw na tea lady kha mäcaw mänei hethang kae. Khimi ce tea la Säthaw üng angthang hawi hai pailai mätu kaw saite khimi lawng hethang kae.

³ Äni lä Cäpje tui neipro hethang kae y. Aejaw aemang rungrang hethang y käla bälung kähawi awng te hai awng pü he kae. Tangkae tea ngai ngae he kae y.

⁴ Äni lä äma üng ingthung takö tea kähawi-a bälung bäcai hethang kae. Äni üng caw nade angxynlyng na lä äma üng lo tängai kha tämö khai hethang mätu he kae.

⁵ Khimi lawngtä lä äma üng engthung takö tea kähawi-a bälung bäcai hethang kaw y dylä, Säthaw üng khimi na tea bälung bäcai haw y lyng.

⁶ Säthaw tea yng saite khimi kangthae lawng hethang kae y. Y dylä äni lä bälung leng lae ai. Hokä dylä Säthaw ma Setan angra tea deng py te kätyng-a äni tea la deng py by ai.

⁷ Yng y saite khimi na ma kangkawng mätawngky lawngtä lä tämö khai saite khimi lawng hethang kae. Hokä dylä yng y te khimi na ma äni tea ämüng täphra haw y lyng. Äni lä Setan angra üng mäthang-a la aemang y lyng.

Kangkawng üng bähawi kung na

⁸ Hini kätyng-a kangkawng üng bähawi kung na la khimi ce ma tämö khai te khimi lawng ö hethang kae. Älo mitang thui saite khimi na lawng hethang kae. Cäpje tui neipro y saite na, tangkae tea ngai ngae y saite na lawng he kae.

⁹ Säthaw lä äni ce tea täphawng saite lo mitang käthu tea äni ce lä yng khi ö hethang kae. Käsi kähawi mänykaw saite bälung hai sa tämang te awng y näkha aedawng saite khimi na-a lawng ö hethang kae.

¹⁰ Yng saite khimi na ma bähawi kung lawng hethang ngai saite khimi ce tea lä käny mang hethang kae. Äni ce tea sa tämang saite nung y dylä, mätawngky kälu na sa ö mai sy.

¹¹ Honi kätyng-a mätawngky na üng änawngpui na lä khimi ce ma tämö khai saite nawngmädi na lawng ö hethang kae. Khimi ce phüng käsi thui rungrang hethang kae y. Äni ce lä äma ce tea aeküng hethang kae. Kätü qütä khimi ce üng ae-y nae hawi saite nawngmädi na lawng ö hethang kae.

¹² Mätawngky na lä nawngpui lawngtä xyng awng hethang kae. Nade na hai engthung takö na tea kähawi-a bälung bäcai kaw hethang kae.

¹³ Bähawi kung üng kälu tea kähawi-a sakaw saite na tea lä khimi ce ma tämö khai ai mang. Äni ce lä ri te, aejae te awng y käla Isu Khrista tea yng saite Angthang khimi ce tea thui haw ö ai.

Ho saite phüng

¹⁴ Kai lä nang awng tea Ephesi märü-a qae y te kätü-a tyng hethang aethang khai tätang ngaila, hini täru saite lo na nang tea tärü te vi.

¹⁵ Ätephüng-a mei nädylä kai qae mai dylä, Säthaw üng engthung khaw lawng saite kangkawng-a, yng saite na makä sa kha awng ö ai mei näte nang tea mäny hai hethang kai lä ngai te vi. Ing aeling hai aenyng nae lä ing tea ca hai te vi. Honi kätyng kangkawng lä Säthaw üng älo mitang ma cakhi hai te vi dy.

¹⁶ Ho ea khai saite na tea Säthaw ma mä-ai tea täphawng saite na lä cangxei hethang hawi bärai vi. Honi tea ämi ma eja haw y lyng. Khrista lä khimi cüngtang-a aelawng vi dy. Muilaw Käcai hai-a mä-ai tea Isu lä Säthaw üng Cäpaw tätang vi näkha mätü vi dy. Äni bung lä Känipre angtawtha na ma nung ö vi dy. Äni üng angtawtha na lä äni üng phüng ceng qütä na tea thui ö te vi dy. Hini älawngpre mityng qütä üng khimi na lä Äni tea yng ö dy. Säthaw ma Äni bung lä Känipre-a nähaija vi dy.