1 Thesalon 4 - Caekäcai Kangthae (Lemi)

Säthaw üng aely kängai-a hing te

¹ Kangkhüng-a lä yng saite kangby jä-ai na ä, nang ce lä Säthaw üng kängai-a makä sa kha awng ai mei näsaite phüng, kai ce lä mätu ö pyng te vi dy. Tätang khaw, nang ce lä hini kätyng awng ö te vi. Mä-ai lä Areng Isu hai bungtä te phüng-a, nang ce lä Säthaw üng kängai-a aeme aeqa rae hethang mäteng ma awng hethang kai ce lä vaihi aesi aebai kha mäci ö te vi.

² Nang ce lä Isu Khrista üng aenae hai-a kai ce ma täru saite lo na tea mäny ö vi.

³ Säthaw lä nang ce tea täkübäjang sa saite na aehi king kha käcai-a awng hai hethang ngai te vi.

⁴ Nang ce angxynlyng lä nang ma ce üng ätabung kängai na aeküng ö he kae. Khimi ce ma tämö khai haw hethang käcai-a awng ö hethang kae.

⁵ Säthaw tea mäny y saite na kätyng ngaiphi tüng y saite mang-a hui ö hang.

⁶ Hini kai ma thui te kätyng-a nang ce lä yng saite kangby jä-ai na tea kaeling kaemae hai sa tämang he kae y. Nang ce tea kai ce lä sädi py kha thui ö pyng te vi dy. Hokä sa saite khimi na tea lä Säthaw ma tärawitha tyng vi ai.

⁷ Säthaw lä känyng he kähawi-a hing hai hethang mä-ai bung ka te y. Käcai ping-a hing hethang ka te vi dy.

⁸ Tukätephüng-a hini mätu saite na tea elekhei sa saite lä khimi tea e te y. Nang ce tähang äma üng Muilaw Käcai py saite Säthaw tea e te kae vi.

⁹ Nang ma ce tingtawi bälung aevaw ö qi hethang phüng lä tärü he ngai näpi y dy. Lawng lawngtä tea bälung aevaw hethang kae näsaite lä Säthaw khekhe ma nang ce tea mätu pyng te vi dy.

¹⁰ Tätang khaw, nang ce lä Makedonia khö üng yng saite angxynlyng na tea bälung aevaw ö te vi. Tungaila yng saite kangby jä-ai na ä, hini qawng-a cang y bälung aevaw rae hethang mäteng ma nang ce tea kai ce lä mäkai ö te vi.

¹¹ Nang ce tea kai ce ma thui pyng te kätyng lä khimi ce thung-a xhu y käla, sitäri-a awng pü hethang hai aethawli y käla aemäcaw ö hethang kae.

¹² Hini kätyng sa dylä yng y saite khimi na lä nang ce üng hing saite tea nung kha nang ce tea tämö khai ö ai. Nang ce üng aely kängai lä ämi te üng säbawng saite la ngai y vi ai dy.

Areng üng ly haile tyng saite

¹³ Yng saite kangby jä-ai na ä, yng kha dü saite khimi na phüng nang ce tea kai ce lä mäny hai he ngai ö te vi. Ätephüng-a mei nädylä nang ce lä yng y käla aethang khai saite awng y te khimi na kätyng bälungsi hai hethang kai ce lä ngai te y vi.

¹⁴ Isu Khrista lä dü kha aetha haile tyng saite tea mä-ai lä yng ö te vi. Tukätephüng-a äni tea yng kha dü pyng saite khimi angxynlyng na bung lä Säthaw ma Isu hai mangtä awng hai hethang la vi ai näte mä-ai lä yng ö te vi.

¹⁵ Kai ce ma nang ce tea thui saite lo lä Areng üng mätu khe saite lo vi. Areng ly haile te kätü-a, vaihi hing kha awng saite mä-ai lä dü pyng saite khimi na y kälang-a, Äni hai aeting y lyng.

¹⁶ Areng äma lä äma üng särilo ätüng käleng hai, Känipre angtawtha kälengky üng ätüng hai, Säthaw ma baw üng te ätüng hai, Känipre mang üng hai cäqa ai. Khrista tea yng kha dü pyng saite khimi na lä kangmangky-a hing haile tyng ö vi ai.

¹⁷ Tupyng-a vaihi hing saite mä-ai lä yng kha dü pyng saite khimi na hai mangtä Areng hai aeting hethang khösang üng khö angnüng thung-a mä-ai angxynlyng na bung lä Säthaw ma nähai tähang ja ö ai. Honi kätü üng hai, mä-ai lä Areng hai mangtä awng jawjaw ö ai.

¹⁸ Tukätephüng-a kai ma thui pyng saite phüng hai nang ce lä lawng lawngtä tea aethaw aepy ö ba.