1 Thesalon 3 - Caekäcai Kangthae (Lemi)

¹ Tukätephüng-a kai ce lä nang ce phüng mäny y kha änawngsa haw y te kätü-a, Athen märü-a kai ma ce qaitä awng hethang aedawng ö vi dy.

² Hi-a kai ce awng te thüng-a, mä-ai üng kangby Timothe bung nang ce tea kai ce lä mätaw te vi dy. Äni lä Khrista üng Angthang Kähawi thui tea kai ce hai mangtä Säthaw üng kälu sa te vi. Nang ce üng yng saite na tea säbawng hethang hai aethaw py hethang äni bung kai ce ma mätaw te vi.

³ Ätephüng-a äni bung mätaw te mei nädylä, hini mätang bälai saite na aeting te phüng-a nang ce thung üng lä ämi lawngtä la yng saite aene hai y hethang vi. Hini kä mätang bälai saite aeting te na lä Säthaw üng aely kängai vi näte nang ce lä mäny ö dy.

⁴ Tätang khaw, nang ce hai kai ce lä mangtä awng te thüng-a, mä-ai lä mätang bälai te aeting ai te phüng, nang ce tea thui rüng ö te vi dy. Honi lä mä-ai aeting tätang khaw te tea nang ce lä mäny ö khaw saite vi.

⁵ Tukätephüng-a kai lä Timothe bung mätaw hethang kae te vi. Kai lä änawngsa haw y vi dy. Nang ce üng yng saite phüng mäny hethang tähang äni bung kai ma mätaw te vi dy. Setan angra ma nang ce tea the haw te hai mä-ai üng kälu sa saite angxynlyng na lä aetütü lawng ai te tähang-a kai lä bälung mawng phi vi dy.

⁶ Timothe lä nang ce te üng hai vaihi ma kai ce tea tyng haile vi dy. Äni lä nang ce üng bälung aevaw saite hai yng saite phüng angthang na kai ce tea thui pyng te vi dy. Kai ce la nang ce hai aeting hethang tengxyng y ngai te kätyng, nang ce ma kai ce üng ämaw aedawng ö phi jawjaw te phüng na äni lä thui pyng te vi dy.

⁷ Tudylä yng saite kangby jä-ai na ä, kai ce üng mätang bälai kha bälung aethawsi te kätü-a, kai ce lä nang ce üng yng saite phüng-a aethaw dang ö vi dy.

⁸ Nang ce lä Areng tea yng khü te phüng-a, vaihi kai ce la anghawtho kha hing haw ö te vi.

⁹ Vaihi nang ce phüng-a mä-ai üng Säthaw tea kai ce lä kawng te lo thui lei ö y. Nang ce tähang Säthaw üng maw-a, kai ce lä anghawtho haw ö te vi.

¹⁰ Nang ce üng yng saite aely kängai säbawng haw hethang hai nang ce hai ämaw aeting khe hethang kai ce üng bälung angxynlyng na aepy kha kai ce lä Areng tea kärung käni aetang ö te vi dy.

¹¹ Nang ce tea kai ce ly hethang lolang sa rüng sy näkha mä-ai üng Pä-ai Säthaw hai Areng Isu tea kai ce lä aetang ö dy.

¹² Areng lä nang ce üng lawng lawngtä tea bälung aevaw hethang hai khimi qütä bälung aevaw saite leng rae, leng rae hethang tähang säbawng sy näte kai ce la aetang ö by dy. Hini kätyng kai ce la nang ce tea bälung aevaw ö te by vi.

¹³ Säthaw ma nang ce tea bälung cakhi saite aethaw py sy. Tudylä mä-ai üng Areng Isu Khrista hai äni tea yng saite angxynlyng na mangtä ly haile te kätü-a, nang ce lä mä-ai üng Pä-ai Säthaw üng maw-a caiping kha cy nae awng ö y vi ai. Amen.