1 Thesalon 2 - Caekäcai Kangthae (Lemi)

Thesalonika märü-a Pawlae dawnghang ly pyng te phüng

¹ Yng saite kangby jä-ai na ä, nang ce tea kai ce ly kha mangtä awng te kätü lä aetütü y lyng näte nang ce ma mäny ö te vi.

² Kai ce lä Thesalonika märü-a nang ce tea ly y te kälang-a, Philipi märü üng khimi na ma kai ce tea mätang bälai-a sakälö khü te hai käsi thui saite na tea nang ce lä kähawi-a mäny ö te vi. Khimi ce lä kai ce tea elekhei sa täto ngaila, nang ce tea Angthang Kähawi thui vawng hethang Säthaw ma mä-ai tea lä säbawng te vi dy.

³ Kai ce lä sa tämang kha cai y te kaedawng hai mäci te y. Kai ce lä ämi tea la kaeling sa hethang aethaw aesa te y lyng.

⁴ Honi jüng-a, Säthaw ma mä-ai tea Angthang Kähawi thui hethang aeteng khaw saite hai ae-y haw saite khimi na kätyng-a dawng saite angtawtha na kä, kai ce lä thui ö te vi. Khimi ce ma kawng hai hethang kai ce lä aethawsa te y lyng. Mä-ai üng bälung na tea käny saite Säthaw ma kawng hai hethang ni sa ö te kae.

⁵ Nang ce ma mäny te kätyng, kai ce lä nang ce tea mäthaw te lo thui vai ö te y. Kai ce lä tangkae dang hethang tähang-a Säthaw lo käjüng sa kha thui te y. Hikä kai ce ma kätüng thui saite tea Säthaw la mäny khe te vi.

⁶ Nang ce, y dylä khimi kälang na ma bälaw hethang kai ce lä sa ö te y lyng. Kai ce lä Khrista üng angtawtha na vi te phüng-a, aely leng saite khimi na kätyng-a, nang ce tea särilo hai thui haw ö te vi.

⁷ Honi jüng-a nang ce hai mangtä kai ce lä awng te kätü-a, äcaw na tea änä-awi ma rui te kätyng lä nang ce tea bälung äkäneng hai kai ce lä rui ö te by vi dy.

⁸ Kai ce lä nang ce tea bälung aevaw phi te phüng-a, Säthaw üng Angthang Kähawi tea kawng te hai thui hethang ngai te qaitä y, säbawng haw saite angxynlyng na sa hethang la ngai ö te vi. Ätephüng-a mei nädylä kai ce lä nang ce tea bälungrui sui ö te phüng-a vi.

⁹ Yng saite kangby jä-ai na ä, kai ce lä nang ce hai awng te thüng-a, aethaw rae bärai te hai kälu sa tätang mei näte nang ce lä aedawng haile tyng ö te vi mei. Säthaw üng Angthang Kähawi thui te kätü-a, kai ce tea mäcaw mänei hethang lä bälungbi hai ö y ma ba. Tukätephüng-a kai ce lä kärung käni kälu sa ö te vi dy.

¹⁰ Kai ce lä nang ce yng saite na hai awng te thüng-a cai saite, cüng saite, cy nae awng y-a hing saite phüng lä Säthaw hai nang ce ma sasi tho haw ö khe te vi.

¹¹ Äpä-ai lä caw nade na tea rui te kätyng, kai ce la nang ce tea rui qi te nang ce ma mäny ö te by vi.

¹² Nang ce bung Säthaw lä äma üng pre hai phung-ang thung-a qa hethang tähang ka te vi. Tukätephüng-a kai lä nang ce tea Säthaw üng kängai-a hing hethang tähang aethaw py te, bälung bädang te hai mäci jawjaw te vi.

¹³ Kai ce ma Säthaw tea kawng te lo thui jawjaw te phüng lä, nang ce ma kai ce te üng Säthaw lo thai kha yng ö te phüng-a vi. Honi lä khimi ce üng lo angthang y käla Säthaw üng lo angthang kätyng aedawng ö te vi. Hini lä Säthaw üng lo tätang khaw vi. Honi lo angthang hai-a yng saite na üng bälung tea lä Säthaw ma mäqa pa te by vi.

¹⁴ Yng saite kangby jä-ai na ä, nang ce lä Judae khö-a Säthaw üng kangkawng na, Isu Khrista üng khimi na täthei-a awng ö te vi dy. Nang ce tea lä nang ma ce pre üng khimi na ma mätangca-a sakälö khü ö te vi. Hini kätyng-a Judae khimi na ma Judae khö-a Säthaw üng kangkawng na tea sakälö khü ö pyng te by vi.

¹⁵ Judae khimi na lä Areng Isu Khrista hai buisaw na tea bädü ö te vi dy. Kai ce bung la mäthoja ö te by vi. Hini kätyng-a äni ce lä Säthaw tea kädawtho hai kha khimi angxynlyng na tea elekhei sa ö saite na vi.

¹⁶ Äni ce lä ceng kälang na tea Säthaw üng aeqang te Angthang Kähawi thui saite kai ce tea mäkhang hethang ngai ö te vi. Hini kätyng äni ce üng sa tämang saite na lä aepu rae, aepu rae te phüng-a, kangkhüng-a Säthaw üng kädawtho saite lä äni ce tea tyng te vi dy. Tukätephüng-a Säthaw ma äni ce tea lä dengpy pa vi ai.

Pawlae lä khölawng tho he ngai haile saite

¹⁷ Yng saite kangby jä-ai na ä, kai ce lä nang ce hai ätabung-a aeprei ngaila, bälung kaedawng hai lä aeprei ö te y. Mä-ai aeprei pyng te üng tänaetä kätü-a lä, nang ce tea aeting haile tyng hethang kai ce lä ämaw aedawng bärai te hai aethaw aesa ö te vi.

¹⁸ Nang ce tea ly haile hethang kai ce lä ngai ö vi dy. Kai ce ma nang ce tea ly hethang aethaw qengtä cang y sa ngaila, Setan angra ma kai ce tea mäkhangky te vi.

¹⁹ Mä-ai üng Areng Isu Khrista ly haile te kätü-a, äni üng maw-a mä-ai lä aedaw te kätü-a, mä-ai üng aethang khai saite, anghawtho saite hai sanphrang lökhu kätyng ävang dang hethang awng saite na lä nang ce vi dy. Nang ce bung kai ce lä aethaw hai haw ö te vi.

²⁰ Tätang khaw nang ce lä kai ce üng anghawtho nae hai aethaw nae la vi.