1 Thesalon 1 - Caekäcai Kangthae (Lemi)

¹ Hini cae lä kai, Pawlae, ma Thesalonika märü üng Areng Isu Khrista hai mä-ai üng Pä-ai Säthaw yng saite khimi na tea tärü te vi. Kai hai mangtä awng saite Saila ni Timothe ma la nang ce tea ämaw aedawng te lo thui hawi by dy. Säthaw ma nang ce tea tähang kähawi hai awngneng saite py sy.

Thesalonika märü üng yng saite khimi na tähang kawng to lo thui pa

² Kai ce lä aetang te qütä nang ce angxynlyng tähang Säthaw tea kawng te lo thui jawjaw ö te vi.

³ Mä-ai üng Pä-ai Säthaw maw-a nang ce üng yng kha sa saite kälu tea kai ce lä aedawng haile jawjaw ö te vi. Nang ce üng bälung aevaw saite hai, kälang na tea aethaw rae kha säbawng saite hai, mä-ai üng Areng Isu Khrista tea aethang khai khü te phüng na tea kai ce lä aedawng haile jawjaw ö te vi.

⁴ Yng saite kangby jä-ai na ä, nang ce bung Säthaw ma bälung aevaw kha re saite phüng tea kai ce lä mäny ö vi.

⁵ Ätephüng-a mei nädylä kai ce lä Angthang Kähawi nang ce tea thui te kätü-a, älo na hai qaitä thui te y. Muilaw Käcai üng haidae hai-a la thui te by vi. Kai ce üng thui saite Angthang Kähawi lä tüng king te vi näte kai ce lä yng ö khü te vi. Nang ce hai mangtä awng te kätü-a, kai ce üng awng saite na tea nang ce lä mäny ö vi. Kai ce üng awng saite na lä nang ce tea säbawng hethang tähang vi.

⁶ Nang ce lä Areng Isu hai kai ce ma sa te täthei-a sa ö te vi dy. Nang ce lä tengxyng y mätang bälai te aeting ngaila, Muilaw Käcai te üng anghawtho saite hai-a Angthang Kähawi tea yng ö te vi dy.

⁷ Hikäte phüng-a Makedonia khö hai Käri pre üng yng saite khimi angxynlyng na tähang nang ce lä aetu nae-a aelawng ö vi dy.

⁸ Ätephüng-a mei nädylä, nang ce üng yng saite phüng-a Areng üng Angthang Kähawi lä Makedonia khö hai Käri pre mang-a aethang haidü te vi dy. Nang ce üng Säthaw tea yng saite phüng kai ce ma thui hethang lä ngai näpi y vi dy. Mityng qütä khimi ce lä thai ö te vi dy.

⁹ Khimi angxynlyng na lä kai ce ly te kätü-a, nang ce ma bälung kähawi hai lady te phüng thui ö bawi te vi. Nang ce lä hing saite Säthaw tätang tea aekö haile tyng ö vi dy. Nang ce lä makä sa kha mimi na bung khaisö ea Säthaw tea cäphaw hethang phüng lä khimi qütä ma thui ö te vi.

¹⁰ Tukha nang ce lä Säthaw ma kädü thung üng mätha haile pa saite Äcäpaw Isu Khrista lä Känipre mang üng cäqa haile tyng ai te tea aering hethang phüng khimi qütä ma thui ö vi dy. Isu Khrista ly haile tea lä Säthaw üng kädawtho saite thung üng mä-ai bung Äni ma aelawi hai pa vi ai.