1 Piter 5 - Caekäcai Kangthae (Lemi)

Kangkawng üng mätawngky na

¹ Kai ma khekhe lä kangkawng üng mätawngky vi kha nang ce thung üng kangkawng mätawngky na tea mäci te vi. Kai lä Khrista üng mätang bälai saite na tea nung khe kha thui te vi. Säthaw ma Khrista üng phung-ang täphawng te kätü-a, hini phung-ang thung-a kai lä qa vi ai.

² Beram rui saite na kätyng Säthaw ma nang ce tea py saite beram kanghö na lawng saite äma üng khimi na tea rui ö ba. Honi lä nang ce üng kälu lawng te phüng-a y, Säthaw üng aely kängai phüng-a kawng te bälung hai nang ce lä sa ö. Nang ce lä tangkae dang hethang tähang y ngaila äni ce tea säbawng hethang ngai tätang ö te phüng-a vi.

³ Nang ce üng beram kanghö na tea pyng hethang aethawsa ö hang. Tungaila nang ce tea Säthaw ma a saite beram kanghö na üng aetu nae-a lawng ö ba.

⁴ Beram rui te kung kälengky Khrista ly haile te kätü-a, nang ce lä phung-ang leng bärai saite ävang käting dang ö ai. Hini üng ang saite lä manila aemai y vi ai.

⁵ Honi kätyng, nang ce anghyngli na ä, nang ma ce üng mätawngky na üng älo na tängai hethang kae. Nang ce lä bälung aemäneng kha awng ö. Caekäcai thung-a, “Säthaw lä aethaw saite khimi na tea elekhei sa te vi. Tungaila aemäneng saite khimi na tea lä tähang kähawi py te vi” näkha nä vi.

⁶ Nang ce lä äte angxynlyng na sa haw saite Säthaw üng maw-a, bälung aemäneng ö. Tudylä äma üng khai saite kätü tyng tea lä nang ce bung mäsang vi ai.

⁷ Nang ce üng bälung mawng saite angxynlyng na äni tea a ö. Ätephüng-a mei nädylä äni lä nang ce üng ngai saite na py hethang ngai te phüng-a vi.

⁸ Nang ce lä aeküng kha canglailing te hai awng ö. Nang ce üng täre Setan angra lä lawng lawngtä tea täphra hethang ämaw ähawng sa saite xangsi täkai kätyng aevi kha mäqang te vi.

⁹ Nang ce üng yng te cakhi kha äni tea aedung ö. Ätephüng-a mei nädylä hini älawngpre angxynlyng na üng yng saite äpy na lä nang ma ce kätyng mätang bälai saite na tea nang ce lä mäny ö te vi.

¹⁰ Nang ce lä tänaetä mätang bälai pyng-a, tähang kähawi angxynlyng na üng Säthaw lä nang ce tea yng te cakhi hai kha aethaw awng hai ea cungrü hai ö vi ai. Äni lä Isu Khrista hai-a äma üng dungtäsa phung-ang thung-a qa hethang nang ce bung re te vi dy.

¹¹ Äni lä dungtäsa haidae awng jawjaw sy. Amen.

Peterae üng cibai sa te lo na

¹² Kai lä yng khü saite Khristen kangby jä-ai kätyng mäthi saite Saila ma säbawng te hai-a, hini cae kädawi nang ce tea tärü te vi dy. Kai lä nang ce tea aethaw py hethang tärü te vi. Hini lä Säthaw üng tähang kähawi tätang vi näkha kai lä thui he ngai te vi. Nang ce lä hini tähang kähawi tea yng khü ö ba.

¹³ Babilon märü-a awng saite Säthaw ma re saite kangkawng lä nang ce üng ticaw kätyng vi. Äni lä nang ce tea cibai sa te lo na thui te vi. Kai üng cäpaw khe kätyng awng saite Marka ma la nang ce tea cibai sa te lo thui by vi.

¹⁴ Bälung aevaw saite hai lawng lawngtä tea kawng te lo aethui ö. Awngneng saite lä Khrista hai aesui saite nang ce angxynlyng na tea awng sy.