1 Korin 8 - Caekäcai Kangthae (Lemi)

Mimi na tea löci sa saite mawi phüng

¹ Vaihi mä-ai lä Säthaw bung mäny y saite khimi na ma mimi na tea löci sa saite mawi phüng thui ö si. Mä-ai angxynlyng na lä hini tea mäny saite bälung awng näte nang ce lä thui haw ö vi. Mäny saite khimi phütä na tea bälung leng ö te vi. Tungaila mä-ai Khristen na tingtawi bälung aevaw dylä, mä-ai ma tingtawi aethaw aepy ö te vi.

² Äte angxynlyng na mäny hethang äma ma dawng saite khimi lawngtä lä äma mäny hethang kae saite tea mäny te y vi rawng.

³ Tungaila khimi lawngtä ma Säthaw tea bälung aevaw dylä, Säthaw lä honi khimi bung mäny te vi.

⁴ Tukätephüng-a kai lä nang ce tea mimi na tea löci sa pyng te mawi ca saite phüng, thui hethang ngai. Mimi hai aesui saite äte khömang la älawng-a awng y näte hai Säthaw lä lawngtä xyng awng näte tea mä-ai yng saite na lä mäny ö te vi.

⁵ Käni hai älawng qawng-a khimi ce ma khömang hai Areng näkha mäthi saite awng mang te vi. Tungaila äni ce lä haidae awng tätang te y vi.

⁶ Tungaila mä-ai tähang lä Säthaw lawngtä xyng kha äni lä mä-ai üng Pä-ai vi. Äni lä äte angxynlyng na tea sa vi dy. Äni tähang mä-ai lä hing ö te vi. Mä-ai tähang Areng lawngtä xyng awng kha äni lä mä-ai üng Areng Isu Khrista vi. Säthaw lä äte angxynlyng na tea äni hai-a sa vi dy. Äni hai-a mä-ai lä Säthaw tähang hing ö te vi.

⁷ Tungaila khimi qütä lä honi tea mäny y. Khimi phütä na lä vaihi khytä mimi cäphaw saite reitae na tea tämang haw ö te y vi. Tukätephüng-a äni ce lä mimi na tea löci sa pyng saite mawi ca dylä, mimi na hai aesui vi näkha vaihi khytä äni ce lä dawng ö te vi. Äni ce üng käsi kähawi mäny saite bälung lä aethawdi te phüng-a, äni ce lä mimi na tea löci sa pyng saite mawi ca te lä äma ce tea pawprae hai te vi näkha äni ce lä dawng ö te vi.

⁸ Tungaila mä-ai lä ca saite amäjy na hai-a Säthaw tea kawng hai haw te y. Mä-ai lä hini löci mawi ca te, ca y te lä Säthaw üng maw-a aely leng te y lyng.

⁹ Säthaw ma mä-ai tea ngai saite amäjy na ca hethang py pyng te vi dy. Tungaila nang ce lä mä-ai ma üng ca saite na phüng-a yng te aethawdi saite mä-ai üng kangby jä-ai na hunghö sa y hethang sädi khai ö he kae.

¹⁰ Käsi kähawi mäny saite bälung aethawdi saite nang ce üng yng saite kangby jä-ai lä mimi üng ing-a nang ce ma ca saite tea nung vi näkha thui ö nä mai si. Nang ce lä bälunghae saite khimi vi näte äni lä mäny te vi. Tukätephüng-a äni lä mimi tea löci sa pyng saite mawi tea lä ca haw vi näkha dawng haw te vi.

¹¹ Hini kangby jä-ai tähang Khrista lä dü pa te vi dy. Tungaila äni üng yng saite lä aethawdi te phüng-a, nang ce üng mänykaw saite ma äni üng yng saite tea lä täphra vi ai.

¹² Hini kätyng-a käsi kähawi mäny saite bälung lä aethawdi saite nang ce üng kangby jä-ai tea tämaw ca kha sa tämang hai te vi. Hini kätyng nang ce lä Khrista tea sa tämang ö te by vi.

¹³ Tukätephüng-a kai üng ca saite, yng saite hai-a kai üng kangby jä-ai tea hunghö sa hai vi dylä, kai lä manila ängang ca haile tyng y vi ai. Tudylä yng saite na lä hunghö sa hai ö y vi ai.