1 Korin 7 - Caekäcai Kangthae (Lemi)

Ingthawng sa saite phüng

¹ Nang ce ma cae tärü kha älo düng saite phüng tea kai lä älo mäthang te vi. Ingthawng sa y käla awng te dylä hawi vi.

² Tungaila khimi ce lä täkübäjang sa vävawi te phüng-a, nawngmäcaw qütä lä äma ce üng nawngpui awng hethang kae. Nawngmädi qütä la äma üng nawngpaw awng hethang kae.

³ Nawngpaw lä änawngpui hai i hethang kae. Änawngpui la änawngpaw hai i hethang kae te by vi.

⁴ Ingthawng sa saite nawngmädi lawngtä üng ätabung lä äma qaitä pyng te y. Äni üng ätabung lä änawngpaw hai la aesui te vi. Honi kätyng ingthawng sa saite nawngmäcaw la äma üng ätabung tea äma qaitä pyng te y by vi. Äni üng ätabung la änawngpui hai aesui te by vi.

⁵ Änawngpui hai änawngpaw lä mangtä i y käla awng hethang kae te y. Änini lä aetang he kätü awng mang rae hethang ngai hawi dylä, lawng netä bälung aedü saite kätü khai kha, i y käla awng haw vi. Honi pyng dylä, änini lä mangtä i haile hethang kae. Hokä dylä Setan angra lä änini tea täkübäjang sa hai hethang the y vi ai. Ätephüng-a mei nädylä, ingthawng sa saite nawngpui nawngpaw lä mangtä i y käla ma awng hethang lä jahaw te y vi.

⁶ Hini na kai lä nang ce tea särilo hai thui te y lyng. Älang kähawi mätü te kae vi.

⁷ Kai lä ingthawng sa y käla awng te kätyng, khimi qütä awng dylä, hawiky vi näkha kai lä dawng te vi. Tungaila khimi qütä tea lä Säthaw ma äma ce üng sakaw saite na py qi te vi. Säthaw ma khimi ce tea py te sakaw saite na lä haetä hai haetä aetawng te y vi.

⁸ Ingthawng sa y rawng saite nawngmädi nawngmäcaw na hai lömai na tea, kai lä thui hethang ngai. Kai kätyng mä-ai ma qaitä awng kha ingthawng sa y dylä, nang ce tähang lä hawiky te vi.

⁹ Tungaila nawngpui läsy, nawngpaw läsy kangby jä-ai hai i hethang ngaiphi saite bälung aepä-üng haw y dylä, ingthawng sa hethang kae. Nawngpui läsy, nawngpaw läsy kangby jä-ai hai i hethang ngaiphi saite bälung awng te qawng-a ingthawng sa te lä hawiky te vi.

¹⁰ Ingthawng sa saite khimi na tea hini särilo py hethang kai lä ngai te vi. Hini särilo lä kai te üng y. Areng üng särilo vi. Nawngpui lä änawngpaw hai aekhai hethang kae y dy.

¹¹ Nawngmädi ma aekhai dylä, äni lä ingthawng sa haile tyng hethang kae y. Tukä y dylä änawngpaw hai aebädü hai kha änawngpaw tea vawi haile tyng sy. Änawngpaw la änawngpui hai aekhai hethang kae y.

¹² Yng saite khimi kälang na tea kai lä älo thui hethang ngai. Hini särilo lä Areng te üng y. Hini lä kai te üng vi. Yng saite nawngpaw lawngtä lä yng y saite nawngpui lawngtä hai ingthawng sa vi nä mai si. Änawngpui lä änawngpaw hai mangtä awng hethang ngai dylä, änawngpaw lä äni hai aekhai hethang kae y.

¹³ Yng saite nawngpui lawngtä lä yng y saite nawngpaw lawngtä hai awng vi nä mai si. Änawngpaw lä änawngpui hai awng hethang ngai dylä, änawngpui lä äni hai aekhai hethang kae y.

¹⁴ Ätephüng-a mei nädylä, yng y saite nawngpaw lä, äma üng yng saite nawngpui hai-a Säthaw maw-a cai hai te vi. Honi kätyng yng y saite nawngpui lä äma üng yng saite nawngpaw hai-a Säthaw maw-a ca hai te vi. Hokä dylä, änini üng caw nade na lä Säthaw maw-a cai hai ö te vi. Hokä y dylä änini üng caw nade na lä Säthaw bung mäny y saite na kätyng vi ai. Tungaila änini üng caw nade na lä Säthaw maw-a cai hai tätang ö te vi.

¹⁵ Tungaila yng y saite änawngpui y dylä, änawngpaw lä yng saite änawngpui y dylä, änawngpaw hai aekhai he ngai dylä, yng saite khimi lä honi tea mäkhang hethang kae te y. Yng y saite kangby jä-ai lä äma üng yng saite kangby jä-ai hai aekhai dylä, yng saite khimi lä honi ingthawng sa saite üng aelawi te vi. Säthaw lä mä-ai bung awngneng-a hing hai hethang ngai te vi.

¹⁶ Änawngpui na ä, nang ce ma nang ma ce üng yng y saite nawngpaw na bung aeqang ai näte nang ce lä mäny haw ö y. Honi kätyng nawngpaw na ä, nang ce ma nang ma ce üng yng y saite nawngpui na bung aeqang ai näte nang ce lä mäny haw ö y.

Säthaw ma ka te kätyng awng ö

¹⁷ Tudylä nang ce bung Säthaw ma ka te kätü-a, nang ce awng saite kätyng-a nang ce lä awng ö jawjaw ba. Kai lä kangkawng qütä-a hini kätyng mätu te vi.

¹⁸ Säthaw lä lengkhüng täke pyng saite khimi bung ka vi dylä, äni lä äma üng lengkhüng täke pyng saite ätabung hai awng jawjaw ba. Säthaw lä lengkhüng täke y saite khimi bung ka vi dylä, äni tea lä lengkhüng täke hai vi hang lawi.

¹⁹ Khimi lawngtä lengkhüng täke te, täke y te lä aely leng te y. Säthaw üng lo tängai hethang xyng ni aely lengky te kae vi.

²⁰ Säthaw ma nang tea ka te kätü-a, nang ma ce awng saite kätyng-a awng ö jawjaw ba.

²¹ Säthaw ma nang ce bung ka te kätü-a mawsawng tangnae lawngtä vi dylä, nang ce lä bälungbi ö hang. Tungaila khimi kaelawi lawng hethang älang haetä awng dylä, honi kätyng tawng ba.

²² Nang ce lä mawsawng tangnae lawng te kätü-a Säthaw ma nang ce bung ka vi dylä, Areng Isu Khrista hai-a vaihi nang lä khimi kaelawi kätyng lawng vi dy. Honi kätyng Säthaw ma khimi kaelawi bung ka vi dylä, äni lä vaihi Khrista hai aesui kha äni lä Khrista üng mawsawng tangnae-a lawng te vi.

²³ Säthaw lä nang ce tähang ävang py kha nang ce bung rang vi dy. Tukätephüng-a nang ce lä khimi ce üng mawsawng tangnae na lawng ö hang.

²⁴ Kangby jä-ai na ä, nang ce bung Säthaw ma ka qi te kätü-a, awng saite kätyng-a Säthaw üng maw-a nang ce lä awng jawjaw hethang kae.

Ingthawng sa y saite anglaw na, särai na hai lömai na phüng

²⁵ Ingthawng sa vai y saite anglaw na hai särai na tähang särilo Areng ma kai tea py te y vi. Tungaila Areng üng tähang kähawi hai-a nang ce lä kai tea ae-y haw ö te phüng-a, kai üng dawng saite na tea kai lä thui vi ai.

²⁶ Mä-ai lä rae saite kätü-a hing te phüng-a, awng saite kätyng nang ce lä awng jawjaw ö hethang hawiky vi näkha kai lä dawng te vi.

²⁷ Nang ce lä ingthawng sa rüng pyng te vi dylä, aekhai hethang bälung awng he kae y. Ingthawng sa y te rawng nädylä, nang ce lä ingthawng sa ö y ma hang.

²⁸ Tungaila nang ce ingthawng sa dylä, nang ce lä hunghö awng ö y. Anglaw lawngtä ingthawng sa dylä, äni lä hunghö awng y. Tungaila nang ce ingthawng sa dylä, mätang saite na hai aeting ö ai. Kai lä nang ce tea hini mätang saite na aeting hai hethang ngai te y vi.

²⁹ Kangby jä-ai na ä, Säthaw üng kälu sa hethang kätü lä awng mang y vi näte kai thui hethang ngai te vi. Nawngpui awng saite yng te khimi lawngtä lä änawngpui awng y te kätyng awng hethang kae.

³⁰ Bälungsi xüng saite na lä bälungsi y te kätyng awng hethang kae. Anghawtho hethang awng saite na lä anghawtho hethang awng y te kätyng awng hethang kae. Lawng lawngtä ma ätete hae haetä tea rang dylä, honi lä äma hai aesui y te kätyng äni lä awng hethang kae.

³¹ Vaihi khimi phütä na lä älawngpre üng khimi na kätyng awng ngaila hini älawngpre hai aesui saite na tea lä bälungrui sui jawjaw ö hethang kae y. Ätephüng-a mei nädylä, älawngpre hai hini älawngpre qawng-a awng saite angxynlyng na lä la ö vi ai.

³² Tungaila kai lä nang ce tea hini na phüng bälungbi hai hethang ngai te y vi. Ingthawng sa y saite khimi lä Areng üng kälu sa saite hai äma tea kawng hai saite phüng xyng tea dawng te vi.

³³ Tungaila ingthawng sa saite lawngtä lä änawngpui aely ngai saite phüng dawng he kae. Äni lä äma üng nawngpui kawng hethang ngai hai te vi.

³⁴ Tukätephüng-a äni üng bälung lä phü netä awng te vi. Ingthawng sa y saite nawngmädi, y dylä anglaw lä Areng üng kälu sa saite phüng xyng dawng te vi. Äni lä Areng hai aesui king kha cai hethang ngai te vi. Ingthawng sa saite nawngmädi lä käni qütä änawngpui hai caw nade na tähang aely ngai saite phüng dawng hethang kae te by vi. Äni lä änawngpaw üng bälung kawng hai hethang la ngai te vi.

³⁵ Kai lä nang ce tea säbawng hethang ngai te phüng-a, hini kätyng thui te vi. Nang ce tea kai lä särilo thui te y lyng. Nang ce lä Säthaw üng khimi na tähang aeteng khaw-a awng hai hethang kai lä nang ce tea säbawng he ngai te vi. Areng üng kälu tea bälung känetä awng y käla ma sa hethang kai lä nang ce tea ngai hai te vi.

³⁶ Nawngmäcaw lawngtä ma ingthawng sa hethang nawngmädi lawngtä bung aengang vi dy nä mai si. Äni ma honi nawngmädi hai aepawng y dylä aevaw y näkha äni lä dawng te vi. Y dylä äni lä nawngmädi hai mangtä i hethang ngaiphi vi näre mai si. Hokä dylä äni lä ingthawng sa hethang kae. Hini lä hunghö awng te y lyng.

³⁷ Tungaila khimi lawngtä lä kähawi-a dawng kha äma üng kängai tea aepä-üng haw dylä, äma aengang saite nawngmädi hai mangtä i hethang ngaiphi te bälung awng y dylä, äni hai aepawng y te lä hawiky te vi.

³⁸ Tukätephüng-a aengang pyng saite nawngmädi bung khimi lawngtä ma ingthawng sa dylä hawi. Tungaila äni lä ingthawng sa y käla awng dylä, hawiky te vi.

³⁹ Ingthawng sa saite nawngmädi lä änawngpaw hing te khytä äni üng nawngpui-a lawng jawjaw te vi. Tungaila änawngpaw dü dylä, äma ngai saite nawngmäcaw hai ingthawng sa haw te vi. Hini nawngmäcaw lä yng saite khimi lawng hethang kae.

⁴⁰ Tungaila nawngmädi lömai lä ingthawng sa y käla awng dylä, äni tähang lä hawiky näkha kai lä dawng te vi. Kai tea Säthaw üng Muilaw la awng vi dy näkha kai lä dawng te vi.