1 Johan 1 - Caekäcai Kangthae (Lemi)

Kähing py saite Angthang Kähawi

¹ Angcü üng hai awng kha kähing py saite älo phüng kai ce ma nang ce tähang tärü ö te vi. Honi tea kai ce lä thai kha ämi hai kheng ea nung haw kha äkö hai aela khe ö saite vi.

² Honi älo lä khimi-a aelawng kha khimi angxynlyng na ma äni tea nung haw ö te vi. Kai ce lä nung pyng kha nang ce tea thui ö te vi. Honi dungtäsa kähing py saite lawngtä lä angcü üng hai ma awng kha mä-ai üng Pä-ai Säthaw hai mangtä awng te vi. Vaihi Säthaw lä äni bung mä-ai tea mätü te vi dy.

³ Kai ce nung kha thai saite na nang ce tea la thui te ö by vi. Hokä ea ni mä-ai lä mangtä rawijae aesa hethang dang ö ai. Mä-ai lä Pä-ai Säthaw hai Äcäpaw Isu Khrista hai rawijae aesa ö saite na vi.

⁴ Mä-ai üng anghawtho bärai saite bälung kawi hai haw hethang hini tea kai ce lä nang ce tea tärü ö te vi.

Kaevang thung-a awng saite

⁵ Hini lä Isu Khrista te üng kai ce ma thai saite Angthang nang ce tea thui te vi. Säthaw lä Kaevang vi. Äni tea lä käving haetä la awng y.

⁶ Mä-ai lä äni hai mangtä rawijae sa ea awng näkha thui ngaila käving-a awng kha sa tämang saite awng te vi rawng nädylä, lo mitang hai-a hing y kha kaeling kaemae thui ö saite na kae vi.

⁷ Tungaila Säthaw lä kaevang-a awng te kätyng mä-ai la kaevang-a awng nädylä, mä-ai lä lawng lawngtä tea rawijae sa ö te vi dy. Säthaw üng Cäpaw Isu üng äthi lä mä-ai üng hunghö angxynlyng na tea mäcai pang te vi dy.

⁸ Mä-ai lä hunghö awng y näkha thui dylä, mä-ai ma tea kaeling kaemae sa ö te kae. Säthaw üng lo mitang lä mä-ai üng bälung thung-a awng y.

⁹ Mä-ai üng hunghö na Säthaw tea täphawng dylä äni lä ae-y khü kha cüng saite phüng-a mä-ai üng hunghö na tea bälawi vi ai. Mä-ai üng kätüng y sa saite angxynlyng na tea la mäcai ai.

¹⁰ Mä-ai lä hunghö sa y näkha thui dylä, Säthaw lä kaeling kaemae sa saite Kung vi näkha mä-ai lä thui ö te vi dy. Säthaw üng lo mitang lä mä-ai üng bälung thung-a awng y lyng.