तीतस् 3 - चेपाङ1 सर्कार्कोः मान्तालम्कोः कुरामा सर्कार्कोः हुकुम् बयःओलम्कोः कुरामा ग्याती सायःनु। “पेओ काम्मा गलकायःमा गेती जाङ्ह्नु” त दाय्ह्ती मान्तालम्कायः स्यान्ती तोउ दा। 2 फेरी “अरु सुकायःमा गाल्धै बयःतेःचानी। सबैकुस् ङ्र्याःती काङ्तोलेः मुन सबैकायः ‘ङापाय् ओउःसै ताङ्ह्लेःनाङः’ त म्हर्लाम्” तमा दाय्ह्ती तोउ 3 दोह् हायःती दाय्ह्सा ङ्हापाय् ङीमा चीःमालो ग्यामालो रेव्ओ ल्हुङ् नाःओलम् खेःतय्हीतो। पेमालो ल्हुङ्कोः मोह्हाय्ओ बोङःती अरुकः ल्हह्ती वाह्आतय्ही अरुलम् ङीकः ब्लाय्क्आकाय् ङीमा अरुलम्कः ब्लाय्क्आतय्ही। 4-5 एतलेः खेःतय्हीतो ङीकायः दल्ताक्सा परमेस्वर्इ लयःकोः योनःओ राप्ओ ल्हुङ् छ्यानःतोक्हाङः ङीइ जाङ्ह्ओ पेओ काम्कायः खेःल ङीकायः योनःती झ्यान्ते ह दल्ताक्आतय्ही। ओउःइ ङीकायः रौ जीङः बयःती लयःकोः ग्वालामःइ जल्ह्ताक्आतय्ही। 6 परमेस्वर्कोः ग्वालामःपाय् ङीकायः दल्ताक्सा येसु ख्रीस्इ आय्ह्ओ ल्हुङ्इ आन दोःताक्आतय्ही। 7 ओहाङःसैको ङीकायः योनःती योती लयःकोः मीक्हाङः ओजायः जय्कुमःत जाङ्ह्नाःतय्ही। ओहाङःसैको ङीइ गलमा द्योक्मालो जीङः “लोने दोःनाःतय्ही” त म्हर्ती झाह्तीलेः ल्युङ्ह्नाःतय्ही। 8 लौ इपाय् दोङ् ङ्हाम्सीःआ कुरा लेःआः। इ कुरामा नाङ्इ परमेस्वर्कोः ङ्हाम्ओलम्कायः सबै दोङ्ह्तोलेः स्यान्सा खेःतो ओहाङःसैको ओउःमयः पेतोलेः हायःती वाह्सा खाय्नानी। इ कुरापाय् सबैकायः पेलेःनाः स्याव्लेःनाः। 9 ओउः कुराखेपाय् स्याव्लेःनाः आह्रे त्यानःकाय्ओ कुरामा नाःतो होह्र् थेङ्सा कुरामा ऐन्कोः काय्काय्ओ कुराकायःमा फेउ। ओउःत जाङ्ह्ती दोह्मा काम् लोल। 10 ङ्हाम्ओलम्कायः वेङःकाय्सा बोङःओ मान्ताकायःपाय् नीस् पेन्ह्च्युक्कायः गानाक्ती तोउ। तोतीमा ओउःइ सायःउलु त खेःया लौ ओउःकायः पेङ्कलःती फेउ दा। 11 ओउः खाल्कोः मान्तापाय् जुगाङ् ल्हुङ् रेव्ओ मान्ता लेःआः लयःकायः लयःलेः गाल्तुम्नाःस। 12 ङाइ आर्तेमास्कायः खेःयामा त्युखीकुस्कायः खेःया यात्चाक्कायः नाङ्कःताङ् ल्होक्नाङः। ङाइ ल्होक्ओ मान्ता दाह्आक्तीको नाङ् खाय्नौ त खेःया ङाकःताङ् नीकोपोलीस् सहर्हाङः क्रुस्लाङ् वाङ्अ दा। ओहाङः ङा य्हुदा महीनाच्युक्कायः मुनाङः। 13 ओउः वकील् जेनास् त तोओमा आपोलस्मा ओउः नीस्चाक्कायः पेतो ल्होक्उचु। ओउःनीस्कायः दोह्मा राह्ताक्माःत ल्होक्सा खेःतो। 14 ङीकोः मान्तालम्इ दोह् दोह् थोक्लम् राह्तो लेःआः ओउः थोक् दोःताक्साकायः काम् पेतो जाङ्ह्सा खेःइतो। ओउःमयः काम् जाङ्ह्माःत मुसा स्याव्ल। 15 ङाकुस् मुओलम् सबै नाङ्कायः नमस्ते ल्होक्तेःनाः। नाङ्कुस् मुओ ङीकायः राप्ओ ङ्हाम्ओलम्कायः नमस्ते तोती बयःउसु। परमेस्वर्इ नीङ्कायः सबै योनःती योतेःपै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.