तीतस् 2 - चेपाङ1 नाङ्खे दोङ् पेओ स्यान्ओ कुरा स्यान्सा खेःतो 2 बुधा स्याव्ओलम्कायःपाय् “मोह्हाय्ओ ल्हुङ् नाःमाःत व्हाय्ओ ल्हुङ्इ पेतो ङ्हाम्तीमा राप्तीमा ग्रमःत मुपै” एत स्यान्ती तोउ दा। 3 फेरी माझ्यार्मा बुधीलम्मा नीङ्तोलेः स्याव्सा खेःतो ओउःमयःइ “अरुकायः पेमालो नोःसामा हान् झाक्ती तुङ्सामा स्याव्ल” तमा स्यान्उसु दा। ओउःमयःइ पेतो व्हाय्तोलेः स्यान्ती 4 अरु तोहा वानःओ बुधीलम्कायः “लौ लयःकोः बुधाकायःमा चोःलम्कायःमा इत पेतो राप्उसु” त छ्यानःती तोपानी। 5 फेरी “लीङ्हायःमालो ओजायः जय्कुमःओ ल्हुङ्इ कीम्कोः काम् इत पेतो जाङ्ह्माउ लयःकोः बुधाइ तोओ कुरा ग्याती सायःमाउ” तमा छ्यानःती तोपानी। ओहाङःसैको परमेस्वर्कोः स्यान्राय्कायः “ओउःपाय् पेल” त सुइमा तोसा खाय्नीली। 6 लाव्मयःलम्कायःमा “लीङ्हायःमाःत वाह्ती मुन” तमा तोउ दा। 7 नाङ्इमा गलकायःमा पेओ काम् जाङ्ह्ती ओउःमयःकायः गत हायःती वाह्सा त छ्यानःउसु। स्यान्ओ बेलाहाङः दोङ् पेओ व्हाय्ओ कुरा स्यान्उ। 8 ओउःत स्यान्ओकायः सुइमा पेमालो नोःसा खाय्नीली। ओउः कुरा सायःआक्तीको नाङ्कोः बीरोत्लम् दोह्मा त्याङ्सा खाय्माःत झ्यान्ते लयःलेः ल्हुङ् घ्युम्तो स्याव्नै। ङीकायः गाल्तुम्तो नोःसा खाय्नीली। 9 नोकरीलम्इमा मालीक्कोः गानाक्ती तोओ कुरालम् काय्त्यानःमाःत ग्याती जाङ्ह्ती ओउःमयःकायः गलकायःमा म्रोताक्सा बोङःपानी। 10 ओउःमयःकोः मालीक्कोः चीस् दोह्मा कुःमाःत सबै काम् जाङ्ह्ओ बेलाहाङः ङ्हाम्सीःओ मुपै। ओउःत हायःती ङीकायः दल्ताक्सा परमेस्वर्कोः स्यान्राय् “पेओ लेःआः” त सबैकायः छ्यानःनानी। 11 परमेस्वर्इ सबैकायः योनःती दल्ताक्सा ग्वम्पाय् द्याह् छ्यानःओ लेःआः। 12 ओउःकोः ग्वम्इपाय् परमेस्वर्कः ग्यामालो ल्हुङ्मा ल्हाव्ह्दैबाङ्कोः मोह्हाय्ओ ल्हुङ्कायःमा फेताक्नाःतय्ही ओउः फेआक्तीको पेओ काङ्ओ परमेस्वर्कः झाक्ओ ल्हुङ् तेन्छ्याङ् दोःती वाह्ताक्नाःतय्ही 13 लोने दाङ्सा पेओ दीन्कायः झाह्ती ल्युङ्ह्तोक्कायः एतलेः वाह्नाःतय्ही। ओउः दीन्हाङः ङीकोः ताङ्ह्ओ परमेस्वर् ङीकायः दल्ताक्सा येसु ख्रीस्पाय् आङ्ग थाङ्ग त थाती वाङ्नै। 14 ओउः ख्रीस्इपाय् लयःकोः आङ् ल्हाङ्ती ङीकायः रेव्ओ काम्सै दल्ताक्आतय्ही छय्ङ्ताक्नाःतय्ही। ओहाङःसै ङीपाय् ओउःकोः मान्ता ह स्याव्ती पेओ काम् जाङ्ह्सा गेतो स्याव्तय्ही। 15 इ कुरापाय् व्हाय्तोलेः स्यान्ती अरुकायः गानाक्तीमा लुङ्ती तोउ। फेरी अरुइ नाङ्कायः सायःओ बेलाहाङः नाङ्कायः मीओ त म्हर्ताक्लाम्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.