तीतस् 1 - चेपाङ1-4 इ चेती ङा पावुल्इ ङाकुस् दोङ् पेतो ङ्हाम्ओ हौ तीतस्कायः लेखती ल्होक्नेःनाङ्। ङाकायःपाय् परमेस्वर्कोः काम् जाङ्ह्साकायः येसु ख्रीस्इ छ्युङ्ह्ती ल्होक्आताङः। ओउःइ छीह्ओ मान्तालम्कायः पेतो ङ्हाम्ताक्साकायःमा ओउःकोः दोङ् कुरा पेतो चीःती वाह्ताक्साकायःमा परमेस्वर्इ छ्युङ्ह्आताङः। लोने दोःसा गलमा वाय्मालो रौ जीङःकायः ङीइ झाह्तीलेः ल्युङ्ह्ती मुनाङी। इ रौ जीङःकोः कुरापाय् ओउः गलमा माःताक्मालो परमेस्वर्इ उय्ह्लेहाङःसै ङीकायः तोती गम्ओ लेःआः। ओउःइपाय् लयःकोः क्रोःओ बेलाहाङः ओउः कुराकोः नोःराय् छ्यानःआकान्। ओहाङःसैको ओउः नोःराय्पाय् थोल्ह्ती तोसाकायः ङीकायः दल्ताक्सा परमेस्वर्इपाय् ङाकायःलेः बयःती ल्होक्आताङः। लौ तीतस्य ङीकोः परमेस्वर् आपाइमा ङीकायः दल्ताक्सा येसु ख्रीस्इमा नाङ्कायः योनःती योती ल्हुङ् धोमाय्ताक्तेःपाः। 5 क्रेते देस्हाङः “दोह् दोह् दप्धाङ्मालो काम्लम् वेती मुधाङ्नाः ओउःमा जाङ्ह्उ। फेरी सहर् सहर्हाङः ङ्हाम्ओलम्कायः स्यालःओ मान्तालम्मा छ्युङ्ह्ती गम्उ दा” त दाय्ह्ती नाङ्कायः ङाइ ओहाङः फेनेःआलाङ्। ओउःत हायःसा ङाइ तोनेःआलाङ्। 6 ङ्हाम्ओलम्कायः स्यालःओ थालवःपा मान्तापाय् पेओ अरुइ गाल्तुम्सा खाय्मालो मान्ता खेःसा खेःतो। फेरी यातैज्योः बुधी ह वानःओ मान्ता खेःतो ओउःकोः चोःलम् आमा आपाकायः सायःमालो लुङ्ह्जेःती लीङ्हायःओलम् खेःसा स्याव्ल ओउःमयःमा ख्रीस्कायः ङ्हाम्ओलम् स्याव्सा खेःतो। 7 स्यालःओ मान्तालम्इपाय् परमेस्वर्कोः काम् जाङ्ह्साकायः अरुकायः स्यालःसा खेःइतो ओउःत झ्यान्ते ओउःपाय् जुगाङ् पेओ अरुइ गाल्तुम्सा खाय्मालो मान्ता खेःसा खेःतो। ओउःपाय् लयः ङार्ओ खह्र्ओ हान् झाक्ती तुङ्ओ कायःकाय्ओ अरुकोः पैसा झाक्ती जेःओ मान्तापाय् स्याव्ल। 8 ओउःइ सबैकायः पेतो वाङ्ह्तीलेः रोम्सा खेःतो पेओ कुरा झाक्ती बोङःओ मान्ता खेःसा खेःतो। ओउःपाय् पेओ नीङ्ओ लीङ्हायःसा झाक्मालो व्हाय्ओ ओजायः जय्कुमःओ ल्हुङ् नाःओ मान्ता खेःसा खेःतो। 9 ङ्हा स्यान्ओ दोङ् कुरा फेमाःत ओउःइ अरुकायः पेतोलेः स्यान्सा खेःतो। एत हायःती ओउःइ अरुकायः लव्ह्सामा खाय्नौ कायःकाय्ओलम्कायः क्लीमःती नोःसामा खाय्नौ। 10 दोह् हायःती दाय्ह्सा नाःतो दोङ् सायःसा ग्यामालोलम् मुनै। ओउःमयःइ आन आह्रे कुरालेः माःती नोःती अरुलम्कायः ब्रःताक्नानी। ओउः यहुदीकोः ङ्हाम्ओलम्इ “ङीइ जवओ सबैइ हायःसा खेःतो” त दाय्ह्ती अरुसै न्हाङ्तोलेः एत हायःनानी। 11 ओउःमयःइ नोःओ खाल्कोः कुरापाय् तोल्ह्ताक्ती वाय्सा खेःतो दोह् हायःती दाय्ह्सा पैसा क्युसाकायः ह ओउःमयःइ आह्रे दोङ्मालो कुरा स्यान्ती कीम् कीम्कोः मान्तालम्कायः सबै ब्रःताक्ती वाय्नाःथास। 12 यात्चाक् क्रेते देस्कोः कुरा चीःओ मान्ताइ लयःमयःकायः तोती “क्रेतेकोः मान्तालम्पाय् माःओ मीन्ह्काय्ओ लुङ्ह्जेःओ मान्ता लेःआः इ” त दाय्ह्ती तोआकान्। 13 ओउःपाय् दोङ् कुरा लेःआः ओउःत खेःओ ओउः आह्रे नोःओ सायःसा झाक्ओ मान्तालम्कायः जान्ती दोङ् पेओ कुरा ग्रमःत ङ्हाम्ताक्तेःनौ। 14 ओहाङःसैको ओउःमयःइ यहुदीकोः वीनःराय्लम्मा दोङ् कुरा सायःसा ग्यामालोलम्कोः आह्रे नोःओमा सायःओकायः फेनानी। 15 नीङ्ओ ल्हुङ् नाःओलम्खेकायः सबै थोक्लम् नीङ्तो लेःआः। ल्हुङ् नीङ्मालो ङ्हाम्मालोलम्खेकायः सबै थोक्लम् नीङ्मालो लेःआः ओउःमयःकोः ल्हुङ्तुक् जुदा रेव्तो लेःआः पेओ कुरापाय् दोह्लो त जुगाङ् चीःनीली। 16 “ङीइ परमेस्वर्कायः तय्ह्नाङःसु” त दाय्ह्ती ओउःमयःइ नोःनीतो पेमालो काम् जाङ्ह्नानी त झ्यान्ते “परमेस्वर्कायः तय्ह्नीली” त सबैकायः छ्यानःओ लेःआः। ओउःमयःपाय् अह्र्सीःओमा ल्हुङ् चाक्ओमा मुलेःनै पेओ काम् दोह्मा जाङ्ह्सा खाय्नीली। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.