रोमी 9 - चेपाङ1 ङाइ द्याह् तोसा खेःओ कुरापाय् दोङ् कुरालेः खेःनाः बा। ङापाय् ख्रीस्कोः लेःआः ओहाङःसैको ङा ल्हुङ्हाङःपाय् परमेस्वर्कोः ग्वालामःकोः कुरा जुगाङ् म्रोती जाङ्ह्ती झ्यान्ते माःसा खाय्ङल। 2-3 लौ ङाकोः यहुदीलम् त तोओ लयःमयःचोङ्कोः कुरा ल्हुङ्हाङः लाय्ओ बेलाहाङःपाय् ङा आन लीह्ती ल्हुङ् जीक्ती मुनाङः। ओउःमयःकायः दल्ताक्साकायः “लौ परमेस्वर्इ प्रनःबाङ् बयःपाःताङः येसु ख्रीस्सै वेङ्ह्पाङः” त दाय्ह्ती तोसालेः ग्यानाङः दोह् हायःती दाय्ह्सा ओउःमयःपाय् ङाकोः लयःकोः मान्ता लेःआः इ। ङाकोः पुःचोङ् हौचोङ्लम् लेःआः बा 4 ओउःमयःकायः परमेस्वर्इ छीङ्ह्ओ इस्राएल्कोः प्लोमःदाने मोमःदानेलेः खेःनै। ओउःमयःकायः परमेस्वर्इ लयःकोः चोःलम्लो लेखा जाङ्ह्ती लयःकोः पेओ ताङ्ह्ओ ग्वम् छ्यानःआथास। ओउःमयःकुस् परमेस्वर्इ होम्काय्ओ कुरा गम्ती ओउःकोः ऐन्मा बयःआथास मन्दीर्हाङः जवती जाङ्ह्सा कुरामा तोती गम्ओ कुरामा बयःआथास। 5 ङाकोः लयःमयःचोङ्पाय् उय्ह्लेकोः ताङ्ह्ओ आय्कानः तोकानःसै ग्ल्युङ्ह्आकाय्। ख्रीस्मा मान्ता स्याव्तोक्हाङः ओउःमयःकोः जात्कोः मान्तालम्सै दोःओ खेःतो। ओउःपाय् ओउः सबैकायः हुकुम् बयःसा परमेस्वर्कायःपाय् गलकायःमा ताङ्ह्ताक्पाःथै माःहै एतलेः स्याव्पाः। 6 ओहाङःसै ओउःमयःइ तेन्छ्याङ् नाःतोलेः ख्रीस्कायः ङ्हाम्नीली त झ्यान्ते परमेस्वर्इ तोती गम्ओ कुरापाय् गत स्याव्ओ दाय्ह्सा ओउः कुरापाय् वाय्ओलेः खेःल दोह् हायःती दाय्ह्सा ओउः इस्राएल्कोः प्लोमःदाने मोमःदानेपाय् सबै परमेस्वर्इ छीङ्ह्ओमयः खेःइली। 7 फेरी इस्राएल् त तोओसै ङ्हा मुओ आब्राहाम्त तोओकोः चोःलम्मा प्लोमःदानेलम्मा ओउःमयःपाय् सबै परमेस्वर्कोः होम्काय्ती तोती गम्ओ चोःलम् खेःइली। आब्राहाम्पाय् नीस्ज्योः गोय्चोः दोःआ। यातैज्योःकायः ह परमेस्वर्इ “लौ नाङ्कोः दोङ् प्लोमःदाने मोमःदानेलम्पाय् नाङ्कोः चोः इसाक्सै ह ग्ल्युङ्ह्पै” त दाय्ह्ती आब्राहाम्कायः तोआथै। 8 ओउःकोः अरु चोःकोः प्लोमःदाने मोमःदानेलम्पाय् परमेस्वर्कोः खेःइली। परमेस्वर्इ तोती गम्ओ इसाक्कोः प्लोमःदाने आब्राहाम्कोः दोङ् प्लोमःदाने खेःइतो। 9 इतलेः परमेस्वर्इ आब्राहाम्कायः चोःकोः कुरा तोती गम्आकान् “लौ ङाइ तोओ बेलाहाङः ङा द्यान्ह्ती वाङ्नाङः। ङा द्यान्ह्ती वाङ्तोक्हाङः सराह्पाय् चोः दोःलेःनाः” त दाय्ह्ती परमेस्वर्इ तोती गम्ओआः। 10 ओहाङःसै ङीकोः तोकानः इसाक्कोः बुधी रेबेका त तोओमा नीस्ज्योः गोय्चोः दोःआ। ओउःनीस्कोः आपापाय् इसाक् खेःतो 11-12 ओउः नीस्चोःकोः आपा यात्चाक्लेः खेःतो। यात्चाक् खेःसापाय् खेःतो ओउःनीस् ओत्धाङ्मालो बेलाहाङः पेओ काम् जाङ्ह्ओमा चीःआक्चुलु रेव्ओ काम् जाङ्ह्ओमा चीःआक्चुलु। ओउः बेलाहाङःपाय् “लौ पुःपाय् हौकोः नोकरी स्याव्नाः” त दाय्ह्ती परमेस्वर्इ रेबेकाकायः तोआथै। एतलेः परमेस्वर्इ ओउः याकुब् त तोओ हौकायः लयः झाक्ती छीङ्ह्आथै ओउःनीस्इ जाङ्ह्ओ काम्कायः खेःल परमेस्वर्इ लयः झाक्ती छीङ्ह्आकान्। 13 इ कुरामा परमेस्वर्कोः आखरःहाङः लेखती मुनाः “लौ याकुब्खेकायः राप्आलाङः एसाव्खे अह्र्आलाङः” त परमेस्वर् दाय्ह्ओ कुरा लेखती मुलेःनाः। 14 परमेस्वर्इ एतलेः मान्ता योसा दोःमाखाहाङःलेः छीङ्ह्आकान् त खेःओ “ओउःइ पेतो हायःउलु” त दाय्ह्चाःतय्ही र। खेःल बा। 15 “लौ ङाइ लयः झाक्ओ मान्ताकायः योनःती योमानाङः पेतो हायःमानाङः” त दाय्ह्ती परमेस्वर्इ मोसाकायः तोआकान्। 16 ओउःत झ्यान्ते मान्ताकोः लयःकोः ल्हुङ् झाक्ओमा खेःल मान्ताइ जाङ्ह्ओमा खेःल परमेस्वर्इ लयः झाक्ती ह ओउःइ मान्ताकायः योनःती योआनौ। 17 उय्ह्लेहाङः मीस्रा देस्कोः फारोह् राजाकायः “लौ ‘ल्हाव्ह्दैबाङ्हाङः गाःहाङः खेःयामा मान्तालम्इ ङाकोः मय्ङ् ताङ्ह्ताक्पाःताङः’ त दाय्ह्ती नाङ्कायः ङाकोः ग्वम् छ्यानःनेःआलाङ्स। एत हायःसाकायः ह नाङ्कायः राजा स्याव्ताक्नेःआलाङ्” त दाय्ह्ती परमेस्वर्इ तोओ आखरःहाङः लेखती मुनाः। 18 ओउःतलेः परमेस्वर्इ लयः झाक्तीलेःमा मान्ताकायः योनःती योनौ लयः झाक्तीलेःमा मान्ताकायः ग्यामालो स्याव्ताक्नौ। 19 “परमेस्वर्इ यात्चाक्खेकायः योनःतीलेः योनौ अरु यात्चाक्खेकायः ग्यामालो स्याव्ताक्नौ त खेःया ओउःइ गत हायःती मान्ताकायः गाल्तुम्ती तोचौ। सुसुइलो परमेस्वर् झाक्ओ कुरा ग्यामाःत मुसा खाय्चौ” त दाय्ह्ती यात्चाक्इ तोतेःचानाङ्स यादो। 20 लौ नाङ्पाय् मान्ता ह खेःतेःनाः गत हायःतीतेः परमेस्वर्इ तोओकायः काय्काय्ती त्याङ्सा म्हर्तेःचाः। पोम् जाङ्ह्ओ मान्ताकायःपाय् पोम्इलेः “लौ दोह् हायःतीतेः ङाकायः एतलेः जाङ्ह्तेःनाःची” त दाय्ह्ती तोउलु। 21 ओउः पोम् जाङ्ह्ओ मान्ताइ पोम्पाय् लयः झाक्तीलेः साःसै जाङ्ह्सा खाय्नौ। ओउः मान्तापाय् यात् गोर् साःखेसै पेओ पोम् जाङ्ह्ती यात् अरु गोर्खेसै पेमालो जाङ्ह्सा झाक्नाः त खेःया ओउःत हायःसा स्याव्लेःनाः। 22 परमेस्वर्मा ओउःत हायःसा स्याव्लेःनाः। वाय्सा खेःओ मान्तालम्कः ओउःकोः ल्हुङ् मल्ह्ओमा ग्वम्मा छ्यानःसाकायः परमेस्वर्इपाय् ओउःमयःकायः रेन्ह्तोलेः न्युम्ह्ताक्थासल ज्याङःतोकायः गुह्र्माःत ल्युङ्ह्आकान्। 23 ओउःत हायःती ङी परमेस्वर्इ ङ्हासै छीङ्ह्ओ योनःती योओ मान्तालम्कायः “ङा गुच्युक् ताङ्ह्ओलेः मुनाङः। नीङ्कायः गुच्युक् पेतो जाङ्ह्नेःआलाङ्स” त छ्यानःआतय्ही। 24 ओउःइ छीङ्ह्ती गोत्ओ मान्तालम्पाय् ङी लेःआः तय्ही। यहुदीकोः मान्तालम्कायः झुङ्आले गोत्ओ खेःल यहुदी खेःमालोलम्कायःमा गोत्आतय्ही। 25 ओउः कुरापाय् उय्ह्लेकोः होसेआ त तोओ मान्ताइ लेखओ “लौ सुसु मान्तालो ङाकोः खेःआक्इली ओउः मान्तालम्कायः ‘ङाकोः लेःआः’ त द्याह् दोक्नाङःसु। ङाइ ङ्हा राप्आक्मालो मान्तालम्कायः द्याह् ङाकोः राप्ओ मान्तालम् स्याव्नै” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 26 फेरी “गाःहाङःलो ‘लौ नीङ्पाय् ङाकोः मान्तालम्लेःतेः खेःतेःइली’ त परमेस्वर्इ तोओ खेःतो ओहाङःलेः ओउःमयःकायः लोने ‘लौ नीङ्पाय् द्याह् ओउः जीङः नाःओ परमेस्वर्कोः चोःलम्लेःतेः इ’ त दाय्ह्ती लोने तोसा स्याव्लेःनै” तमा लेखती मुनाः। 27 ओहाङःसैको “ओउः इस्राएली मान्तालम्पाय् ल्हाव्ह्दैबाङ्कोः बाङ्च्युक् नाःतो ब्याव्चै त खेःया बल बल ह दल्नै। 28 दोह् हायःती दाय्ह्सा प्रभुइ ल्हाव्ह्दैबाङ्कोः न्युम्ह्ताक्ओ कुरा रेन्ह्तोलेः जाङ्ह्जेःनौ” त दाय्ह्ती एसायाइ इस्राएल्कोः कुरा नोःआकान्। 29 ङ्हाहाङः “लौ ओउः सबैसै ताङ्ह्ओ ग्वम् नाःओ प्रभुइ ङीकायः यात्नीस्चाक् प्लोमःदाने मोमःदाने वाय्माःतो स्याव्ती गम्आकान् बा। यात्नीस्चाक्पाय् मुइली त खेःया ङीपाय् सोदोम्नीस् सहर् गोमोराकोः मान्तालम्लो लेखालेः मीह्ताक्चाःतय्ही खेःतो” त दाय्ह्तीमा एसायाइ तोआकान्। 30 ङाइ तोसा कुरा इलेः। ओउः यहुदी खेःमालोलम्खेइ यहुदीलम्कोः ऐन्कोः कुरा जाङ्ह्सा बोङःमाःत परमेस्वर्कायः ङ्हाम्आकानी ओउःत झ्यान्ते ओउःमयःकायः परमेस्वर्इ लयःकोः मीक्हाङः पेतो स्याव्ताक्आथास। 31 ओउः इस्राएली त तोओ यहुदीलम्खेइ परमेस्वर्कोः ऐन् जाङ्ह्सा बोङःनीतो ओउः ऐन् जुगाङ् जाङ्ह्सा खाय्माःत झ्यान्ते परमेस्वर्कोः मीक्हाङः पेतो स्याव्सा खाय्नीली। 32 दोह् हायःती दाय्ह्सा ओउःमयःइ ख्रीस्कायः ङ्हाम्माःत लयःइलेः पेओ काम् जाङ्ह्ती पेतो स्याव्ती परमेस्वर्कःताङ् वाङ्सा बोङःनीतो ओउःमयःकायः ख्रीस्पाय् बाङ्लो लेखा मुती झ्यान्ते ओउः ङ्हाम्मालो मान्तालम्पाय् ओउःकःहाङः दाह्तोक्हाङः क्वेन्ह्ती त्योक्ती तोन्ओ मान्तालो लेखा स्याव्ती परमेस्वर्कःताङ् वाङ्सा खाय्नीली। 33 परमेस्वर्कोः आखरःहाङःमा “लौ यहुदीलम्कोः सीओन् त तोओ मुल् सहर्हाङः यात्चाक् ङाकोः मान्ता गम्नाङः। ओउःपाय् ल्याम्हाङः मुओ क्वेन्ह्सा बाङ्लो लेखालेः मुनाः। नाःतो मान्तालम्खे ओउःकः दाह्ती त्योक्ती तोन्इतो सुसुखेइ ओउःकायः ङ्हाम्नौ ओउःपाय् ल्हुङ् घ्युम्तोलेः स्याव्ल” त दाय्ह्ती लेखती मुनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.