रोमी 8 - चेपाङ1 लौ येसु ख्रीस्इ ङीकायः दल्आतय्ही त झ्यान्ते ङी ओउःकुस् ब्राङ्ती मुओलम्कायः द्याह् परमेस्वर्कःसै गाल्तुम्ती तोसा दोह्मा नाःल। 2 दोह् हायःती दाय्ह्सा परमेस्वर्कोः ग्वालामःसै वाङ्ओ जीङः बयःसा ऐन्इलेः ङाकायः ख्रीस्कुस् वाह्ताक्ती ओउः रेव्ओ काम् छ्यानःओ सीताक्सा खेःओ आय् ऐन्सै बेन्ताक्आताङः। 3 ङी रेव्ओ ल्हुङ् नाःओ मान्तालम्कायःपाय् ओउः आय् ऐन्खेइ दल्ताक्सा खाय्उलु ओउःत झ्यान्ते परमेस्वर्इ लयःकोः चोःपाय् मान्तालो लेखा स्याव्साकायः ल्होक्आकान्। ङी रेव्तो हायःओ मान्तालो स्याव्आक्तीको परमेस्वर्कोः चोःइ रेव्ओ काम्लम् क्युम्ह्ती वाय्ताक्साकायः लयःकोः आङ् ल्हाआकास। एतलेः परमेस्वर्इ मान्ताकोः रेव्ओ काम् न्युम्ह्ताक्माआकान् 4 ङीकायः ओउः ऐन्कोः कुरा पेतो स्याव्ताक्माआकान्। ओहाङःसैको ङी रेव्ओ ल्हुङ् फेओलम् परमेस्वर्कोः ग्वालामः दोःती परमेस्वर्कोः मीक्हाङः पेतो वाह्सा खाय्नाःतय्ह्नी। 5 ओउः रेव्ओ ल्हुङ् गम्ती वाह्ओलम्खेइ ओउः ल्हुङ्कोः रेव्तो मोह्हाय्ओखे जाङ्ह्सा बोङःनानी। परमेस्वर्कोः ग्वालामःइ बयःओ ल्हुङ् दोःती वाह्ओलम्खेइ ओउः ग्वालामःकोः कुराखे जाङ्ह्सा बोङःनानी। 6 रेव्ओ ल्हुङ् नाःओलम्खे लोने सीती वाय्तो स्याव्लेःनै। परमेस्वर्कोः ग्वालामःइ बयःओ ल्हुङ् नाःओलम्खे ल्हुङ् धोमाय्तो स्याव्ती रौ जीङः दोःनै 7 दोह् हायःती दाय्ह्सा रेव्ओ ल्हुङ् नाःओ मान्तापाय् परमेस्वर्कोः बीरोत् स्याव्नै परमेस्वर्कोः ऐन्कोः कुरा ग्याती जाङ्ह्नीली। माः रैस ओउः कुरा जाङ्ह्सापाय् जुगाङ् खाय्नीली। 8 ओउः खाल्कोः मान्तालम्इपाय् परमेस्वर्कायः म्रोताक्सा गल खेःयाकायःमा खाय्नीली। 9 ओउः खाल्कोः मान्तालम्खे ओउःत लेःआः नीङ्खेपाय् परमेस्वर्कोः ग्वालामःतेः दोःतेःआकाय् त खेःया ओउःकोः पेओ ल्हुङ्कोः कुरा जाङ्ह्तेःनानी। सुसु ख्रीस्कोः ग्वालामः दोःमाःत मुनै ओउःपाय् ख्रीस्कोः मान्ता खेःइली। 10 खेःल ख्रीस्पाय् नीङ्कःहाङः मुनाः त खेःया नीङ्कोः रेव्ओ काम् जाङ्ह्ओ आङ्खे सीसापाय् सीलेःनाः नीङ्कोः रुआङ्खे परमेस्वर्कोः मीक्हाङः पेतो स्याव्ती झ्यान्ते सेलःलेः मुसा दोःनाः। 11 ओहाङःसै परमेस्वर्इ येसुकायः सीओसै च्योक्ताक्आकान्। ओउःत झ्यान्ते ओउःकोः ग्वालामःपाय् नीङ्कःहाङः मुनाः त खेःया ओउः ख्रीस्कायः उह्ती च्योक्ताक्ओ परमेस्वर्इपाय् नीङ्कोः सीओ आङ्कायःमा ओउःकोः ग्वालामःइ सेलः स्याव्ताक्तेःनै। 12 लौ उया पुःचोङ् हौचोङ्य ङीइ रेव्ओ ल्हुङ्कोः मोह्हाय्ओखे जाङ्ह्सा परल पेओ ल्हुङ्कोः कुराखे जाङ्ह्सालेः खेःतो। 13 रेव्ओ ल्हुङ्कोः मोह्हाय्ओ जाङ्ह्तेःचानी त खेःया नीङ् सीतेःनै बुरु परमेस्वर्कोः ग्वालामः दोःती ओउः रेव्ओ ल्हुङ्कोः काम्लम्कायः सीताक्तेःनानी त खेःया नीङ्पाय् रौ जीङः दोःतेःनै। 14 सुसुपाय् परमेस्वर्कोः ग्वालामःइ दोःती ओउःइ स्यालःओ ल्याम्हाङः वाह्नै ओउःमयः परमेस्वर्कोः चोःलो लेखालेः मुनै। 15 नीङ्पाय् फेरीलेः मालीक्कः रैओ नोकरीकोः ल्हुङ् मुओलम् लेखालेः खेःतेःइली परमेस्वर्कोः ग्वालामःइ ओउःकोः चोःकोः ल्हुङ् बयःतेःनै। ओउःत झ्यान्ते ङीइ परमेस्वर्कायः “आपाय” त दाय्ह्ती तोनाःतय्ह्नी। 16 ओउःत तोतोक्हाङः परमेस्वर्कोः ग्वालामःइ ङीकोः रुआङ्कुस् पाःती तोती “इमयः परमेस्वर्कोः चोःलम् लेःआः इ” त छ्यानःनौ। 17 फेरी ङीपाय् परमेस्वर्कोः चोःलम् खेःनाःतय्ही त खेःया ङी चोःलम्लो लेखालेः परमेस्वर् आपासै पेओ दान् दोःनाःतय्ही। दोह् दोह् पेओलम् परमेस्वर्इ ख्रीस्कायः सेती गम्लेःआकान् ओउःलेः येसु ख्रीस्कुस्इ थाःतोलेः त्याक्मातय्ह्नी। ङीइ ख्रीस्कुस् लीह्सीःओ गोरःमानाःतय्ह्नी त खेःया ओउःकुस् ब्राङ्ती ताङ्ह्तोलेः स्याव्मानाःतय्ही। 18 इ ल्हाव्ह्दैबाङ्हाङः मुतोक्हाङः ङीइ लीह्सीःओ च्यवःसापाय् च्यवःतय्ह्नीतो लोने न्हाङ्तोलेः आन पेओमा ताङ्ह्ओमा च्यवःनाःतय्ह्नी त ङाइ ताःनाङः। 19 परमेस्वर्कोः चोःलम् पेओमा ताङ्ह्तो स्याव्ओ त छ्यानःनम् दीन्कायः सबै जापीनःती गम्ओ थोक्लम् झाह्तीलेः ल्युङ्ह्ती मुनाः। 20 दोह् हायःती दाय्ह्सा सबै परमेस्वर्इ जाङ्ह्ओ थोक्लम्पाय् दोह्मा लोमालो स्याव्सा खेःओ खेःतो लयः झाक्ती खेःल ओउःपाय् परमेस्वर्कोः लयः झाक्ओ लेःआः। सबै जाङ्ह्ओ थोक्लम् ओउःत स्याव्सा खेःओ खेःतो लोने वाङ्सा पेओ दीन्कायः आसती ल्युङ्ह्ती मुलेःआ। 21 ओउः लोने वाङ्सा दीन्हाङः सबै थोक्लम्पाय् वाय्ओसै दल्ती परमेस्वर्कोः चोःलम्कुस् पेओमा ताङ्ह्ओमा स्याव्नै। 22 द्याह्च्युक्हाङः सबै जाङ्ह्ओ थोक्लम्पाय् चोः ओत्सा खेःओ मोमःचोःलो लेखालेः लीह्ती ङान्ह्नै। 23 फेरी ओउः जाङ्ह्ओ थोक्लम् ह खेःल ङी परमेस्वर्कोः ग्वालामःसै ङ्हा त्याक्ओलम्मा परमेस्वर्कोः चोःलम् स्याव्साकायःमा आङ् दल्साकायःमा ल्युङ्ह्ती मुओहाङः लीह्ती ङान्ह्नाःतय्ही। 24 एत हायःसा थेङा ङीइ परमेस्वर्कायः झाह्ती ल्युङ्ह्ती ङ्हाम्आतय्ह्नी ओउःत झ्यान्ते ओउःइ दल्ताक्आतय्ही। ओउः दल्ताक्सा दीन्पाय् ङीइ झाह्तीलेः ल्युङ्ह्नाःतय्ह्नी। झाह्ओ कुरापाय् च्यवःधाङ्मालो कुरा लेःआः। च्यवःती च्यवःआ त खेःया ओउः झाह्ओपाय् अम्लेःनाः अम्आक्तीको झाह्ती ल्युङ्ह्सा परल। 25 ङीइ झाह्ओ कुरापाय् च्यवःधाङ्मालोहाङः ओउः झाह्ओ स्याक्साकायः गुह्र्माःत ल्युङ्ह्नाःतय्ही। 26 ओहाङःसै परमेस्वर्कोः ग्वालामःमा ङी ध्यव्ओ मान्तालम्कायः लव्ह्साकायः वाङ्लेःनाः दोह् हायःती दाय्ह्सा ङीइ परमेस्वर्कायः पेतो तेती तोसा चीःतय्ह्नीली। ओउःत झ्यान्ते ङीकोः पेतो नोःसा खाय्मालो ङान्ह्ती नोःओ कुराकायः “पेतो नोःपनै” त दाय्ह्ती ओउःकोः ग्वालामःइ इ कुरा पाःती नोःती ङीकायः परमेस्वर्कः तेती तोनाःतय्ही। 27 ओउःकोः ग्वालामःइ ङी ङ्हाम्ओलम्कायःपाय् परमेस्वर् झाक्ओ कुरा तेती तोनौ ओउःत झ्यान्ते ङी मान्तालम्कोः ल्हुङ्तुक् चीःओ परमेस्वर्इ ओउः ग्वालामःइ तोओ कुरामा चीःलेःनौ। 28 ओहाङःसै लयःइ झाक्ती गोत्ओमा लयःकायः राप्ओ मान्तालम्कायः परमेस्वर्इ गल खेःयाकायःमा ओउःमयःकायः पेतो स्याव्ताक्नाःथास एतलेः चीःनाःतय्ह्नी। 29 ओउः मान्तालम्कायःपाय् परमेस्वर्इ उय्ह्लेहाङःसै “ङाकोः मान्तालम्लेः स्याव्नै” त चीःती “ङाकोः चोःलो लेखालेः स्याव्पै” त दाय्ह्ती छ्युङ्ह्ती गम्आथास। ओहाङःसै लयःकोः मान्तालम् एतलेः छ्युङ्ह्आक्तीको ख्रीस्पाय् नाःतो हौचोङ्लम्सै पुःनाः। 30 फेरी ओउः छ्युङ्ह्ती गम्ओलम्कायः परमेस्वर्इ गोत्आथास। ओउःमयःकायः गोत्आक्तीको लयःकोः मीक्हाङःलेः पेतो स्याव्ताक्आथास। पेतो स्याव्ताक्आक्तीको ओउःमयःकायः परमेस्वर्इ लयःकुस् लयःलो लेखालेः ताङ्ह्ताक्नाःथास। 31 लौ उया ओउःत खेःया द्याह् दोह् त दाय्ह्सा खाय्चाःतय्ह्नी र परमेस्वर्इपाय् ङीकुस् मुनाः त खेःओ सुइमा ङीकायः क्लीमःसा खाय्तय्हीली। 32 ओउःपाय् लयःकोः चोःकायः लयःकुस् ओम्पायःती गम्माःत ङी सबैकायः दल्ताक्साकायः ल्हाआथै। ओहाङःसैको लयःकोः चोःपाय् ल्हाआतय्ही त झ्यान्ते ओउःइ अरु सबै न्हाङ्तोलेः बयःनाःतय्ही माः र। 33 परमेस्वर्इ लयः छीङ्ह्ओ मान्ताकायःपाय् सुइमा गाल्तुम्ती तोसा खाय्नीली। परमेस्वर्इलेः “लौ इमयः नीङ्ओ लेःआः इ” त दाय्ह्ती दाय्ह्नाः बा। 34 ओउःत झ्यान्ते अरुइ सुइमा गाल्तुम्ती तोसा खाय्नीली। ङीकायः दल्ताक्साकायः येसु ख्रीस्लेः सीओआः। माः रैस सीओ झुङ्आले खेःल ओउःपाय् उह्ती च्योक्माआ। उह्ती च्योक्आक्तीको द्याह् परमेस्वर्कोः गुल्ह्दाङ् स्याव्ती ओउःकोः ङोय्दोहाङः मुती ङीकायः परमेस्वर्कः तेती तोनाःतय्ही। 35 लौ उया सुइमा दोह्इमा ङीकायः राप्ओ ख्रीस्सै वेङ्ताक्सा खाय्बाय्नीली। दोह्इ खेःयाकायःमा खाय्नीली लीह्सीःओ खेःयाकायःमा चाक्ओ काम् खेःयाकायःमा अरु घान्याकायःमा योङ्क्राय्ओ न्याम् झ्युङ्ओ प्रात्याकायःमा सीखेःओ सात्खेःओ स्याव्याकायःमा दोह् खेःयाकायःमा ङीकायः राप्ओ ख्रीस्सै ङीकायः वेन्ताक्सा खाय्बाय्तय्हीली। 36 “लौ नाङ्कोः काम् जाङ्ह्साकायः न्हीदीङ्हाङः याह्दीङ्हाङः सीखेःनाःतय्ही। सात्सा खेःओ भेदा मेत्छ्याःलो लेखालेः स्याव्नाःतय्ही” त परमेस्वर्कोः आखरःहाङः ओउः लीह्सीःओ कुरा लेखती मुनाः। 37 एत स्याव्सापाय् स्याव्लेःनाः ङीकायः राप्ओ येसु ख्रीस्कोः ग्वम् दोःती जुगाङ्लेः ग्रमःत मुसामा सबै क्लीमःसामा खाय्नाःतय्ह्नी। 38 एत ङाइ पेतोलेः चीःलेःनाङः दोह् खेःयामा ङीकायः राप्ओ ख्रीस्सै ङी वेङ्ह्तोपाय् स्याव्तय्हीली। सीयाकायःमा स्याक्याकायःमा वेङ्ह्ताक्तय्हीली। दोह्इमा लाङ्काकोः ल्होक्ओमयःइमा नालाकोः ग्वम् नाःओ रेव्ओमयःइमा द्याह्कोःमा लोनेकोःमा 39 त्यावःअकोःमा कामःअकोःमा दोह् दोह् जाङ्ह्ओलेः मुनाः ओउःकोः दोह्इमा ङीकायः राप्ओ परमेस्वर्कःसै वेङ्ह्ताक्सा खाय्तय्हीली दोह् हायःती दाय्ह्सा ङीकोः प्रभु येसु ख्रीस्इमा राप्आतय्ही। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.