रोमी 7 - चेपाङ1 नीङ् पुःचोङ् हौचोङ्लम्इ ऐन्कोः कुरा सबैतेः तय्ह्तेःनानी बा ओउःत खेःओ ङाइ द्याह् तोसा खेःओ कुरा नीङ्इ चीःसा खाय्तेःनानी। मान्ता सीधाङ्माःच्युक्हाङः ह ऐन्कोः कुराइ मान्ताकायः ग्रक्सा खाय्नौ। 2 ओउः ऐन्कोः कुरा दोह्लो दाय्ह्सा मोमःचोःपाय् बुधा सीधाङ्माःखाहाङः अरु गोय्चोःकुस् पाय्ह्सा स्याव्ल। ओउःकोः बुधा सीआ त खेःया ह ओउः बेलाहाङःलेः अरुकुस् पाय्ह्सा स्याव्नाः। 3 बुधा सीधाङ्मालो बेलाहाङः मोमःचोःपाय् अरु गोय्चोःकुस् पाय्ह्आ त खेःया ओउःपाय् रेव्ओ जार्कोः काम् जाङ्ह्ओ लेःआः। ओउःकोः बुधा सीआक्तीको ह मोमःचोःपाय् ऐन्कोः कुरासै फेन्ओलेः अरु गोय्चोःकुस् पाय्ह्नाः त खेःया ओउःपाय् जार्कोः काम् खेःल। 4 नीङ् पुःचोङ् हौचोङ्पाय् ओउःतलेः खेःतेःइतो नीङ्मा ख्रीस्कुस् आङ्हाङः सीती झ्यान्ते ऐन्सै फेन्ओ लेःतेः इ। द्याह्पाय् परमेस्वर्कोः काम् पेतो जाङ्ह्साकायः ओउः सीओसै च्योक्ओ ख्रीस्कोःलेःतेः स्याव्तेःआकाय्। 5 ङ्हाहाङःलेः ङीइ रेव्ओ ल्हुङ्कोः मोह्हाय्ओ कुरा ग्याती वाह्ओ बेलाहाङःपाय् ओउः ऐन्इलेः ङीकोः ल्हुङ्कायः थ्योन्ह्ती ङीकायः आङ् सीताक्सा खेःओ काम्लम् जाङ्ह्ताक्आतय्ही। 6 ओउःतलेः खेःतय्हीतो द्याह्पाय् ङीकायः ग्रक्सा खेःओ ऐन्कोः काम् जाङ्ह्साकायः ङीपाय् सीती वाय्ओ लेःआः तय्ही ओउःत खेःओ ओउः ऐन्सै फेन्ओ लेःआः तय्ही। फेन्आक्तीको ङी द्याह् परमेस्वर्कोः ग्वालामःइ छ्यानःओ रौ ल्याम्हाङःखे परमेस्वर्कायः काम् जाङ्ह्ती वाह्नाःतय्ही। ओउः ङ्हा लेखती गम्ओ ऐन्इ छ्यानःओ आय् ल्याम्हाङःखे द्याह् फेआतय्ह्नी। 7 लौ उया ओउः ऐन्पाय् “रेव्ओलेः” त दाय्ह्चाःतय्ही र। खेःल ओउः ऐन्पाय् लयःलेः रेव्ओ खेःल बा ओउः ऐन्इपाय् रेव्ओ काम्लम् “दोह् दोह्लो” त छ्यानःआतय्ही। ऐन्हाङःपाय् “लौ अरुकोः थोक्लम् मीक्इ लह्ती झाक्लाम्” त लेखमाःदीक् ओउःत लह्ती झाक्ओपाय् “रेव्ओलेः” त चीःसा खाय्आक्ङल। 8 ओउः ऐन् चीःआक्तीको ऐन्कोः त्याःओ कुरापाय् “लौ जाङ्ह्उ” त ङाकोः रेव्ओ ल्हुङ्पाय् थ्योन्ह्ती दाय्ह्ती ङाकायः आन लह्ती वाह्ताक्आताङः। ओउः ऐन्कोः कुरापाय् नाःल त खेःया रेव्ओ ल्हुङ्इ ओउःत हायःसा खाय्उलु ओउः ऐन्इपाय् सीओ मान्तालो लेखालेः दोह्मा हायःसा खाय्उलु। 9 ऐन् चीःधाङ्आक्मालोहाङः ङापाय् सेलः मुआलाङः सीसा खेःओ मान्ता खेःआक्ङल। ऐन् चीःआक्तीको ङाकोः रेव्ओ ल्हुङ्खे थाती वाङ्ओआः 10 ओहाङःसैको ङाखे सीसा खेःओ मान्ता स्याव्आलाङः। एतलेः ओउः जीङः बयःसा खेःओ ऐन्इपाय् जीङःखेपाय् वानःओ खेःल सीताक्साखे वानःआकान्। 11 ऐन्कोः कुरापाय् ङाकोः ल्हुङ्हाङः पोक्आक्तीको ङाकोः रेव्ओ ल्हुङ्इ ङाकायः थ्योन्ह्ती झ्यान्ते सीसा खेःओ मान्ता स्याव्ताक्आताङः। 12 ओउः ऐन्पाय् लयःलेः पेओ लेःआः ओउः ऐन्कोः कुरापाय् पेओ नीङ्ओ खेःलेःनाः। 13 ओउःत झ्यान्ते “ओउः पेओ ऐन्इपाय् ङाकायः सीताक्आताङः” त दाय्ह्ती मान्ता म्हर्नै यादो। खेःल रेव्ओ ल्हुङ्इ ओउः पेओ ऐन्कोः कुरा नोःती ङाकायः थ्योन्ह्ती सीसा खेःओ स्याव्ताक्आताङः। ओउःत हायःती रेव्ओ ल्हुङ्पाय् न्हाङ्तोलेः रेव्ओ लेःआः त छ्यानःओ लेःआः। 14 परमेस्वर्इ बयःओ ऐन्खे नीङ्तो लेःआः त चीःनाःतय्ह्नी ङाखे नीङ्मालो ल्हुङ् नाःओ मान्ता लेःआः ङ रेव्ओकोः नोकरीलेः खेःनाङः। 15 ओउःत खेःओ ङाइ जाङ्ह्ओ काम्लम्पाय् “दोह् हायःती जाङ्ह्आलाङः” त ङाइ पेतो चीःङसल। ङा झाक्ओ काम्लम्खे ङा जाङ्ह्ङल दोह् दोह् काम्लम्खे ङा अह्र्नाङः ओउः काम्लम्पाय् ङाइ जाङ्ह्लेःनाङः। 16 ङा झाक्मालो काम् जाङ्ह्नाङः त खेःया “ओउः ऐन्पाय् नीङ्ओलेः” त म्र्याःतोलेः छ्यानःनाङः। 17 ओउःत झ्यान्ते ङा झाक्मालो रेव्ओ काम् जाङ्ह्नाङः त खेःया ङाखेइ जाङ्ह्ओ खेःल ङाहाङः मुओ रेव्ओ ल्हुङ्खेइ जाङ्ह्ओलेः बा। 18 ङाकोः ल्हाव्ह्दैबाङ्हाङः मुओ आङ्कोः ल्हुङ्पाय् नीङ्ओपाय् खेःल त चीःलेःनाङः दोह् हायःती दाय्ह्सा ङा पेओ काम् जाङ्ह्सा झाक्सापाय् झाक्लेःङोतो ओउःत जाङ्ह्सा खाय्ङल। 19 ङा झाक्ओ पेओ काम्लम्खेपाय् जाङ्ह्माःत ङा झाक्मालो रेव्ओ काम्लम्खे जाङ्ह्नाङः। 20 ओउःतलेः ङा झाक्मालो काम्लम् जाङ्ह्नाङः त खेःयाकायः ङाखेइ जाङ्ह्ओ खेःल ङाहाङः मुओ रेव्ओ ल्हुङ्खेइ जाङ्ह्ओ लेःआः बा। 21 लौ उया एत स्याव्नाः त चीःआलाङः पेओ काम् जाङ्ह्सा झाक्तोक् बेलाहाङः लौ रेव्ओ ह जाङ्ह्सा खाय्नाङः रैस। 22 ङा दोङ् आखीमःइ परमेस्वर्कोः ऐन् जाङ्ह्सा म्रोनाङः। 23 ओउःत म्रोङोतो ङाकोः दोम् क्रुत् आङ्ज्याङ्इपाय् अरु थे पेमालो ऐन्कोः कुरालेः जाङ्ह्नाङः। ङाकोः दोङ् ल्हुङ्कोः ऐन्खे यात्ज्योःलेः ङाकोः आङ्इ जाङ्ह्ओ ऐन्खे अरु यात्ज्योःलेः ओउःनीस् थेथेलेः मुनाःच। ओहाङःसैको ओउः पेमालो आङ्कोः ऐन्इ रेव्ओ काम् जाङ्ह्ओ फेसा ङाकायः ताक्ताङःल। 24 ङा गुच्युक् पेमालो स्याव्जेःआलाङः बा। इ सीसा खेःओ आङ्सै सुइ ङाकायः बेन्ताक्चाःताङः। 25 लौ परमेस्वर्कायः “च्युता” त तोपाःथै ङीकोः प्रभु येसु ख्रीस्इलेः ङाकायः बेन्ताक्सा खाय्नाःताङः। लौ उया ङा ओउःतलेः मुनाङः लयःइलेः ङाकोः दोङ् ल्हुङ्हाङः ह परमेस्वर्कोः ऐन्खे जाङ्ह्सा खाय्नाङः ङा आङ्इ पेमालो थे ऐन्कोः कुरा जाङ्ह्नाङः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.