रोमी 5 - चेपाङ1 ङीइ ङ्हाम्ती झ्यान्ते परमेस्वर्कोः मीक्हाङः पेतो स्याव्आतय्ही ओउःत खेःओ ङीकोः प्रभु येसु ख्रीस्इ परमेस्वर्कुस् ल्हुङ् ब्राङ्काय्ताक्आतय्ही। 2 येसु ख्रीस्इ ल्हुङ् ब्राङ्काय्ताक्आतय्ही ओउःइपाय् ङी ङ्हाम्ओलम्कायः परमेस्वर्कःताङ् वानःआतय्ही ओहाङःसैको परमेस्वर्इ ङीकायः योनःती योती लयःकुस् पेतोलेः वाह्ताक्आतय्ही। फेरी “ङी परमेस्वर्कुस् लोने पेतो ताङ्ह्तोलेः स्याव्नाःतय्ही” त ल्हुङ्हाङः तय्ह्ती झ्यान्ते आन म्रोनाःतय्ही। 3 ओउःत तय्ह्ओकायः म्रोनाःतय्ही फेरी ङी लीह्सीःओ च्यवःसाकायःमा म्रोनाःतय्ही दोह् हायःती दाय्ह्सा लीह्सीःओ गोरःओ मान्तापाय् ग्रमःतलेः स्याव्नाः 4 ओहाङःसैको ग्रमःत मुओ मान्तापाय् परमेस्वर्कायः म्रोताक्ओ मान्ता लेःआः त चीःओ लेःआः। परमेस्वर्कायः म्रोताक्ओ मान्ताइ “लौ ङा लोने पेतो स्याव्नाङः” त ल्हुङ्हाङः आसती चीःनानी। 5 ओउःत चोङाय्तो चीःओ कुरापाय् आह्रे खेःल दोह् हायःती दाय्ह्सा परमेस्वर्इ लयःकोः ग्वालामः बयःआतय्ही। ओहाङःसैको ओउःकोः ग्वालामःइ ङीकायः राप्सा ल्हुङ् दोःताक्आतय्ही। 6 ङ्हापाय् ङीइ लयःकायः दल्ताक्सा खाय्मालो मुआलाङी ओहाङःसैको क्रोःओ बेलाहाङःपाय् ख्रीस्लेः ङी रेव्ओ मान्तालम्कायः दल्ताक्साकायः सीलेःआ। 7 पेओ मान्ता दल्ताक्साकायः लयः सीसापाय् नाःतो मान्ता ग्याइली दोङ् नीङ्ओ मान्ताखेकायः यात्नीस्चाक् लयः सीसा ग्याचै यादो। 8 मान्तालम्खेपाय् ओउःतलेः हायःनानी परमेस्वर्खेइ ङीकायः गुच्युक् पेतोलेः राप्आतय्ही त खेःओ ङीइ रेव्ओ काम्लम् जाङ्ह्धाङ्ओ बेलाहाङःपाय् ङीकायःलेः ख्रीस् सीबाय्आ। 9 ओउःकोः वयः होती सीधार्नालेः ङीपाय् परमेस्वर्कोः मीक्हाङः पेतो स्याव्नाःतय्ही ओउःत झ्यान्ते ङीकायः परमेस्वर्इ बयःसा खेःओ न्युम्ह्ताक्ओसै ओउःइ न्हाङ्तोलेः दल्ताक्नाःतय्ही। 10 ङ्हापाय् ङी परमेस्वर्कोः दुस्मान् खेःतय्हीतो द्याह् ओउःकोः चोः सीधार्नालेः ङी परमेस्वर्कुस् ब्राङ्नाःतय्ही ओउःत झ्यान्ते ख्रीस्पाय् उह्ती सेलः स्याव्धार्नालेः ङी न्हाङ्तोलेः गुच्युक् पेतो दल्ताक्नाःतय्ही। 11 माःहै ओउःतलेः दल्तो स्याव्नाःतय्ही ओउः झुङ्आले खेःल परमेस्वर्कुस् ङीकोः प्रभु येसु ख्रीस्इलेः ब्राङ्ताक्आतीकोः ङी द्याह् परमेस्वर्कःहाङः म्रोती मुनाःतय्ही। 12 ओउः अरुसै ङ्हा जाङ्ह्ओ आदम् त तोओइ ल्हाव्ह्दैबाङ्हाङः ङ्हापाय् रेव्ओ काम् जाङ्ह्आकान् ओउःत रेव्ओ जाङ्ह्आक्तीको आदम्पाय् सीलेःआ ओउः ह खेःल सबै मान्तालम्कायः सीती वाय्ओ खाल्लेः स्याव्ताक्आथास दोह् हायःती दाय्ह्सा सबै मान्तालम्इमा ओउःकः तेःती रेव्ओलेः जाङ्ह्आकानी। 13 परमेस्वर्इ बयःओ ऐन्कोः ङ्हासै मान्तालम्इ रेव्तोपाय् जाङ्ह्लेःनीतो ओउः बेलाहाङःपाय् ऐन् नाःआक्धाङ्ल त झ्यान्ते ओउःकोः रेव्झ्याङ्कोःपाय् थेङ्ओलेः खेःआक्ल। 14 रेव्झ्याङ्कोः थेङ्सापाय् थेङ्ओ खेःआक्ल आदम् मुओहाङःसै ओउः ऐन् लेखओ मोसा मुतोक्हाङः च्युक्कायःलेः सबै मान्ता सीआकाय्। ओउःमयः आदम्लो लेखालेः परमेस्वर्इ बयःओ हुकुम् सायःसा ग्यामालो मान्तालम् सबै खेःइली। खेःसापाय् खेःइली सीसापाय् सबै खेःइतो। ओहाङःसैको आदम्कोः गुल्ह्दाङ् येसु ख्रीस्लेः खेःतो 15 खेःसापाय् खेःतो ख्रीस्कोः काम्मा आदम्कोः काम्मा थेथेलेः ख्रीस्खेकोः पेओलेः खेःतो आदम्खेकोः रेव्तोलेः। दोह् हायःती दाय्ह्सा आदम्खेइ रेव्तो हायःती सीताक्ओ बयःआकान् परमेस्वर्खेइ मान्ताकोः रेव्झ्याङ्कायः वाय्सा थेङा येसु ख्रीस्पाय् सोह् बयःआकान्। फेरी ओउः यात्चाक् आदम् त तोओकोः रेव्तो हायःधार्ना नाःतो मान्तालेः सीआकाय् परमेस्वर्इ योनःती योधार्नामा यात्चाक् येसु ख्रीस्इ सोह् बयःधार्नामा न्हाङ्तोलेः पेतो हायःती झ्यान्ते नाःतो मान्तालम्कायः पेओ रौ जीङः दोःलेःनाः। 16 ओहाङःसै ओउः यात्चाक्कोः रेव्झ्याङ्कोःमा परमेस्वर्इ सोह् बयःओमा आन थेथे लेःआः च। यात्चाक्कोः रेव्ओ काम् जाङ्ह्झ्याङ्कायः सबै मान्तालम् न्युम्ह्तोलेः स्याव्नै। मान्तालम्इ नाःतो रेव्ओ काम्लम् जाङ्ह्आक्तीको ओउःमयःकायः परमेस्वर्इ योनःती योती झ्यान्ते येसु ख्रीस् बयःती ओउःमयःकायः न्युम्ह्ताक्मामाःत लयःकोः मीक्हाङः पेतो स्याव्सा दोःताक्आथास। 17 यात्चाक्इ रेव्ओ काम् जाङ्ह्आक्तीको मान्तालम् सीओलेः स्याव्नै त खेःया गुच्युक् न्हाङ्तोलेः यात्चाक् येसु ख्रीस्इलेः पेतो जाङ्ह्आक्तीको परमेस्वर्इ योनःती योओ ओउःकोः मीक्हाङः पेतो स्याव्ताक्ओलम्पाय् जीङः दोःओलम् स्याव्नै। 18 ओउःत झ्यान्ते यात्चाक्कोः रेव्ओ काम् जाङ्ह्धार्नालेः सबै मान्तालम् न्युम्ह्तो स्याव्नै। ओउःतलेः यात्चाक्कोः पेओ काम् जाङ्ह्धार्नालेः सबै मान्तालम् परमेस्वर्कोः मीक्हाङः पेतोलेः स्याव्ती रौ जीङः दोःनै। 19 यात्चाक् आदम्खेपाय् परमेस्वर्कोः हुकुम् सायःसा ग्यामाःत झ्यान्ते नाःतो मान्तालम्लेः रेव्तो जाङ्ह्ओ मान्ता स्याव्आकाय्। ओउःलो लेखालेः यात्चाक् ख्रीस्खेइपाय् परमेस्वर्कोः हुकुम् ग्याती जाङ्ह्ती झ्यान्ते नाःतो मान्तालम् परमेस्वर्कोः मीक्हाङः पेतो स्याव्नै। 20 रेव्ओ काम्लम् न्हाङ्तोलेः छ्यानःसाकायः परमेस्वर्कोः ऐन् बयःओ खेःतो। रेव्ओ काम्लम् न्हाङ्तोलेः छ्यानःआक्तीको परमेस्वर्इ योनःती योओमा न्हाङ्तोलेः छ्यानःओ खेःतो। 21 ओहाङःसै ङ्हापाय् रेव्ओ काम्लम्खेइ सीओलेः वानःआथै ओउःतलेः परमेस्वर्इ योनःती योओखेइ स्याक्ओलेः वानःनाःथै। मान्तालम् परमेस्वर्कोः मीक्हाङः पेतो स्याव्आक्तीको प्रभु येसु ख्रीस्इपाय् गलमा द्योक्मालो जीङःलेः वानःनौ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.