रोमी 3 - चेपाङ1 ओउःत झ्यान्ते मान्ता यहुदीलेः खेःनाः त खेःया ओउःमयःकोः पुन् तात्ओ जवओ त खेःया ओउःपाय् अरु मान्तासै दोह् पेतो स्याव्नाः दाय्ह्सा 2 नाःतो लेःआः बा। ङ्हापाय् ओउः यहुदीलम्कायःलेः परमेस्वर्इ लयःकोः आखरः बयःआथास। 3 यात्नीस् यहुदीलम्इ बुरु परमेस्वर्कोः कुरा ङ्हाम्साकायः फेआकानी त खेःया ओउःमयःकायः बयःओ तोती गम्ओ कुरापाय् परमेस्वर्इ वाय्उलु। 4 परमेस्वर्इ तोती गम्ओ कुरापाय् दोङ् ङ्हाम्सीःओ कुरा लेःआः बा। माःहै मान्तालम्खेपाय् सबै माःओलेः मुचै त खेःया परमेस्वर्खे दोङ्सीःओ मुलेःनाः। ओउःकोः आखरःहाङः “लौ त्यानःकाय्ती नोःतोक्हाङःमा तय्छनःती योओ बेलाहाङःमा नाङ्कोः कुरा दोङ् पेओ कुरा लेःआः त सबैकायः छ्यानःसाआः” त दाय्ह्ओ परमेस्वर्कायः तोओ कुरा आखरःहाङः लेखती मुनाः। 5 ङीइ पेमालो जाङ्ह्धार्नालेः परमेस्वर्पाय् अरुसै न्हाङ्तोलेः पेनाः त छ्यानःओ लेःआः। ओउःत खेःओ ङीइ ओउःत रेव्तो हायःती परमेस्वर्कायः पेओ लेःआः त छ्यानःनाःतय्ह्नी त खेःया “ओउःइ ङीकायः न्युम्ह्ताक्सा स्याव्ल” त दाय्ह्ती मान्तालम् दाय्ह्नै यादो। 6 खेःल बा। परमेस्वर्इ स्याव्मालो कुरा जाङ्ह्चौ त खेःया ओउःइ गत हायःती सबै ल्हाव्ह्दैबाङ्कोः मान्तालम्कायः तय्छनःती योसा खाय्चौ र। 7 ओहाङःसैको अरुइ “लौ ङाकोः माःती तोओपाय् परमेस्वर्कोः दोङ् कुराकुस् घार्आक्तीको ओउःपाय् पेओमा ताङ्ह्ओमा त न्हाङ्तोलेः पेतो छ्यानःसा खाय्नाः। एतलेः ङाइ रेव्ओ काम् जाङ्ह्ती परमेस्वर्कायः ताङ्ह्ताक्नाङः त खेःया ओउःइ दोह् हायःती ‘पेमालो’ त दाय्ह्ती ङाकायः गाल्तुम्नाःताङः” त दाय्ह्ओ मुनाः यादो। 8 ओउःत दाय्ह्ओ कुरापाय् इलो लेखा मुनाः “लौ पेओ स्याव्ताक्साकायः पेमालो जाङ्ह्पानी” त दाय्ह्ती दाय्ह्ओ लेखा लेःआः। माः रैस ङीकायःपाय् “लौ ओउःमयःइ ओउःतलेः स्यान्लेःनानी” त दाय्ह्ती यात्नीस् मान्ता गाल्तुम्ती तोनाःताङी। ओउःपाय् माःओ कुरा लेःआः ओउःत माःती तोओलम्कायः न्युम्ह्ताक्तोलेः स्याव्नाः। 9 लौ उया “ङी यहुदी खेःओलम्पाय् अरु जात्कोः मान्तालम्सै पेतोलेः स्याव्नाःतय्ही यादो” त दाय्ह्ती व्हत्ओलेः मुनाः। खेःल बा यहुदीलम्मा यहुदी खेःमालोलम्मा नीस्जात्इमा ब्राङ्तीलेः रेव्आ ल्हुङ्कोः मोह्हाय्ओ जाङ्ह्नानी। ओउःत ङाइ ङ्हापाय् छ्यानःती तोनेःआलाङ्स। 10 इतलेः परमेस्वर्कोः आखरःहाङः लेखती मुनाः “परमेस्वर्कोः मीक्हाङः पेतो छय्ङ्ओ मान्तापाय् सुमा नाःल यातैज्याङ्मा नाःल। 11 सुइमा ओउःकायः पेतो तय्ह्मानीली सुइमा ओउःकायः पेतो बोङःमानीली। 12 सबै मान्तालम्इ परमेस्वर्कोः वाह्सा ल्याम्पाय् फेती रेव्ओ काम्लम् जाङ्ह्नानी पेओ काम् जाङ्ह्ओ मान्तापाय् सुमा नाःल यातैज्याङ्कायःमा नाःबाय्ल। 13 मान्ताकोः म्होतोङ्सै माःआ कुरा आन ग्ल्युङ्ह्नाः। ओउःमयःकोः लेइ आन पेमालो खह्र्ओमा नोःनै 14 ओउःमयःकोः म्होतोङ्सै आन प्रनःओ कुरामा वाङ्नाः। 15 ओउःमयःइ रेन्ह्तोलेः सात्सा बोङःनानी। 16 गाःहाङः ओउःमयः वाह्नै ओउःहाङःलेः लीह्ओमा ह्र्योक्ती वाय्ओमा छ्याःतोलेः वाङ्नाः। 17 ओउःमयः अरुकुस् कायःकाय्माःतो वाह्सामा चीःनीली 18 परमेस्वर्कः एङःती वाह्सामा चीःनीली” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 19 ओहाङःसैको ओउः आखरःहाङः लेखओ ऐन्कोः कुरापाय् सबै ऐन् सायःओ मान्तालम्कायः स्याव्लेःनाः एत चीःनाःतय्ह्नी। माः रैस ऐन्कोः कुरा चीःती झ्यान्ते द्याह्हाङःसै सुइमा “लौ ङाइ रेव्ओ काम्पाय् दोह्मा हायःङल” त तोसा खाय्नीली सबै ल्हाव्ह्दैबाङ्कोः मान्तालम्कायः परमेस्वर्इ गाल्तुम्ती तोसा खाय्नौ। 20 ऐन्कोः कुरा जाङ्ह्ती ह सुमा परमेस्वर्कोः मीक्हाङः पेतो नीङ्तो स्याव्इली। ओउः त झ्यान्ते ऐन् चीःसाकायः दोह् काम् लोनाः दाय्ह्सा “लौ इत इत हायःसा पेल” त मान्ताकायः व्हक्ताक्नाःथास ओउःत हायःसाकायः ओउः ऐन्पाय् बयःओ लेःआः। 21 ओउः उय्ह्ले बयःओ ऐन्कोः कुरा जुदालेः जाङ्ह्माःत झ्यान्ते मान्ता परमेस्वर्कोः मीक्हाङः गत हायःती पेतो नीङ्तो स्याव्सा खाय्नानी त दाय्ह्सा द्याह्पाय् छ्यानःओ लेःआः। एतलेः ओउः ऐन्मा परमेस्वर्कोः कुरा छ्यानःओलम्इमा ङ्हाहाङः छ्यानःआकानी। 22 सुसुइमा येसु ख्रीस्कायःलेः ङ्हाम्नानी ओउःमयः सबैलेः यहुदीलम्मा यहुदी खेःमालोलम्मा ओउःकोः मीक्हाङः पेओ नीङ्ओ मान्ता स्याव्लेःनै। 23 सबै मान्तालम्इ रेव्ओ काम् जाङ्ह्ओ लेःआः ओउःमयःपाय् परमेस्वर्च्युक् पेओमा ताङ्ह्ओमा स्याव्सा जुगाङ् खाय्आक्नीली। 24 मान्तालम् लयःइलेः पेतो स्याव्सा खाय्नीली ओउःमयःकायः योनःती योती परमेस्वर्इलेः लयः झाक्ती झ्यान्ते लयःकोः मीक्हाङः जुगाङ् पेतो योनाःथास ओउःत हायःसाकायः येसु ख्रीस्इ लयःकोः आङ् बयःती मान्तालम्कायः ल्हाङ्ती रेव्ओसै दल्ताक्आथास। 25 मान्ताकोः रेव्झ्याङ्कोः ल्हाङःसा थेङा येसु ख्रीस्कायः परमेस्वर्इ सीसा ताक्आथै। ओहाङःसैको मान्तालम्इ ओउःकायः ङ्हाम्आक्तीको ओउःकोः वयः बयःधार्नालेः ओउःमयःकोः रेव्झ्याङ्कोः मीह्ती वाय्सा स्याव्नाः। एतलेः मान्ताकोः रेव्ओपाय् मीह्ती वाय्ताक्ती परमेस्वर्इ लयःकोः पेतो हायःओ छ्यानःनौ। ङ्हासै येसु ख्रीस् वाङ्धाङ्आक्मालो बेलाहाङः मान्ताकोः रेव्झ्याङ्कोः परमेस्वर्इ बयःआक्उलु रेव्ओ मान्तालम्कायः ओउःइ न्युम्ह्आक्थासल 26 द्याह् लयःकोः पेओ काम् छ्यानःती ओउःइ येसु ख्रीस्कायः ल्हाती ङ्हाम्ओ मान्तालम्कायः ल्हाङ्ती ओउःमयःकोः रेव्झ्याङ्कोः वाय्आथास। 27-28 ओउःत झ्यान्ते ङीइ लयःकोः नेह्रो ओर्ताक्सा जुगाङ् खाय्ङुसुलु दोह् हायःती दाय्ह्सा ङीइ ऐन्कोः कुरा जाङ्ह्ओकायः खेःल येसु ख्रीस्कायः ङ्हाम्आक्तीको ह परमेस्वर्इ लयःकोः मीक्हाङः पेतोलेः योनाःतय्ही। ओउःत खेःओ ङीइ लयः जाङ्ह्ओ नेह्रो ओर्ताक्सा कुराखे खेःल परमेस्वर्इ जाङ्ह्ओ कुराखे लेःआः। 29 फेरी परमेस्वर्पाय् यहुदीलम्कोः परमेस्वर् ह खेःल ओउःपाय् यहुदी खेःमालोलम्कोः परमेस्वर्मा खेःलेःनाः माःहै। 30 परमेस्वर्पाय् यातैज्योः लेःआः यहुदीलम्इमा यहुदी खेःमालोलम्इमा ङ्हाम्आ त खेःया ओउःमयःकायः परमेस्वर्इ लयःकोः मीक्हाङः पेओलेः योनाःथास। 31 “ङ्हाम्साकायः ह परमेस्वर्इ मान्ताकायः पेतो योनौ त खेःया ओउः ऐन्कोः कुरापाय् आह्रे लेःआः” त यात्नीस् दाय्ह्नै यादो। खेःल बा ओउःत हायःती ओउः ऐन्कोः कुरापाय् लोतोलेः वाम्ह्तो स्याव्नाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.