रोमी 16 - चेपाङ1 लौ द्याह् ङीकुस् ङ्हाम्ओ हौद्याङ् फैबी त तोओ ङाइ नीङ्कःताङ् लुङ्ती तोती ल्होक्नेःनाङ्स। ओउःइपाय् केङ्क्रीया सहर्हाङः मुओ ङ्हाम्ओमयःकःहाङः परमेस्वर्कोः काम् जाङ्ह्ओ मोमःचोः लेःआः 2 ओउःकायःपाय् “प्रभुकोः मान्ता लेःआः” त दाय्ह्ती परमेस्वर्कायः ङ्हाम्ओ मान्तालो लेखालेः ओउःकायः रोम्ती ओउःकोः दोह् दोह् राह्ओलेः मुनाः ओउःलेः बयःनु। ओउःइपाय् नाःतो अरु मान्ताकायःमा आन लव्ह्आकान् ङाकायःमा आन लव्ह्आताङः। ओउःत खेःया ओउःकायः पेतो रोम्नु दा। 3-4 ङाकुस् येसु ख्रीस्कोः काम् जाङ्ह्ओ नीस् प्रीस्कीला अक्वीलाकायः ङाइ नमस्ते ल्होक्नाङःचु। ङाकायः दल्ताक्साकायः ओउःनीस् सीसा ग्याओ आन खेःचतो। ओउःत झ्यान्ते ङामा सबै यहुदी खेःमालो ङ्हाम्ओमयःमा ओउःनीस्कः आन म्रोलेःनाङी। 5 ओउःनीस्कोः कीम्हाङः थनःती वाङ्ओ ङ्हाम्ओलम्कायःमा नमस्ते ल्होक्नाङःसु। फेरी ङाइ राप्ओ असीया देस्कोः जुगाङ् ङ्हालेः ख्रीस्कायः ङ्हाम्ओ एपैनेतस्कायःमा नमस्ते ल्होक्नाङः। 6 मरीयम्कायःमा नमस्ते ल्होक्नाङः ओउःइपाय् नीङ्कायः काम् आन त्युस्ती जाङ्ह्तेःआकाय्। 7 फेरी ङाकुस् झ्याल्खानहाङः थुनओ यहुदीकोः लयःमयःचोङ्कायः अन्द्रोनीकस् जुनीयस्नीस्कायःमा नमस्ते ल्होक्नाङःचु। ओउःनीस्पाय् ङासै ङ्हालेः ख्रीस्कोः मान्ता स्याव्आकाच। येसुइ छ्युङ्ह्ती ल्होक्ओमयःकःहाङः ओउःनीस्कोः मय्ङ् पेतो तय्ह्ओ लेःआः। 8 अम्प्लीयातस्कायःमा नमस्ते ल्होक्नाङः ओउःपाय् ङाकोः आन राप्ओ प्रभुकायः ङ्हाम्ओ क्वा लेःआः। 9 ङीकुस् ख्रीस्कोः काम् जाङ्ह्ओ उर्बानस्कायःमा ङाइ राप्ओ स्ताकीस्कायःमा नमस्ते ल्होक्नाङःचु। 10 ख्रीस्कायः ग्रमःतलेः ङ्हाम्ओ अपेलेस्कायःमा अरीस्तोबोलस्कोः कीम्कोः मान्ताकायःमा नमस्ते ल्होक्नाङःसु। 11 ङाकोः यहुदी लयःमयःचोङ् हेरोदीयोन्कायःमा नार्कीसस्कोः कीम्हाङः मुओ ङ्हाम्ओ पुःचोङ्कायःमा नमस्ते ल्होक्नाङःसु। 12 प्रभुकोः काम् जाङ्ह्ओनीस् त्रीफैना त्रीफोसाकायःमा ङाइ राप्ओ पेर्सीस्कायःमा नमस्ते ल्होक्नाङःसु। पेर्सीस्इमा प्रभुकायः नाःतो काम् जाङ्ह्आकान्। 13 प्रभुइ दोक्ती छीङ्ह्ओ काम् जाङ्ह्ओ रुफस्कायःमा ओउःकोः आमाकायःमा नमस्ते ल्होक्नाङःचु। ओउःकोः आमापाय् ङाकायः लयःकोः आमालो लेखा मुनाः। 14 असीन्क्रेतस् फलेगोन् हर्मेस् पत्रोबास् हर्मेस्कायःमा ओउःमयःकुस् हुम्लाङ् वाङ्सा ङ्हाम्ओलम्कायःमा नमस्ते ल्होक्नाङःसु। 15 फीलोलोगस् जुलीया नीस्कायःमा नेरीयस् ओउःकोः हौद्याङ्कायःमा ओलीम्पास् ओउःकुस् हुम्लाङ् वाङ्सा ङ्हाम्ओमयः सबैकायः नमस्ते ल्होक्नाङ्स। 16 सबै थाव्हाङः मुओ ख्रीस्कोः ङ्हाम्ओमयःइ नीङ्कायः नमस्ते ल्होक्तेःनै। लौ सबै ङ्हाम्ओमयःकायः पेतोलेः ग्रोम्काय्ती रोम्काय्न दा। 17 लौ पुःचोङ् हौचोङ्य “ङ्हाम्ओलम्कायः वेङ्काय्ताक्ओ काय्काय्ताक्ओ मान्तालम्कःसै धय्ती मुन दा” त ङाइ तेती तोनेःनाङ्स। ओउः खाल्कोः मान्तालम्इपाय् अरुकायः ब्रःताक्नानी। नीङ्इ दोःओ स्यान्राय् सायःमाःत ओउःमयः थेथे खाल् स्यान्नानी। ओउःमयःकुस् वाह्तेःचनै क्लेत्ती मुन 18 ओउःत हायःओलम्इपाय् ङीकोः प्रभु ख्रीस्कोः काम्खे जाङ्ह्नीली लयःकोः रेव्ओ ल्हुङ्कोः कुराखे जाङ्ह्लेःनानी। ङोस्तोमा फोल्यावःतो नोःओइमा ओउःमयःइ माःती झ्यान्ते व्हक्मालो ल्हुङ् नाःओलम्कायः ल्हुङ् रेव्ताक्नानी। 19 नीङ्खेकायः “प्रभुकोः कुरा आन ग्याती जाङ्ह्नानी” त दाय्ह्ओ सबैइ नीङ्कायः सायःआकानी ओउः त झ्यान्ते ङा चोङाय्तीलेः मुनाङः। फेरी नीङ्कायः “रेव्ओ काम्खे चीःमाःत पेओ काम्खे व्हाय्तोलेः स्याव्पै” त दाय्ह्ती झाक्नाङः। 20 ओहाङःसैको ङाकोः ल्हुङ् धोमाय्ताक्ओ परमेस्वर्इलेः रेन्ह्तोलेः नीङ्कायः सैतान् क्लीमःती वाय्ताक्तेःनै। ङाकोः प्रभु येसुइ नीङ्कायः योनःतीतेः योतेःपै। 21 ङाकुस् काम् जाङ्ह्ओ तीमोथीइमा नीङ्कायः नमस्ते ल्होक्तेःनै। ङाकोः यहुदी लयःमयःचोङ् लुसीयस् जासोन् सोसीपातर्इमा नमस्ते ल्होक्तेःनै। 22 पावुल्इ इ चेती लेखताक्ओ ङा तर्तीयस्इमा नीङ् प्रभुकायः ङ्हाम्ओलम्कायः नमस्ते ल्होक्नेःनाङ्स। 23 ङाइ मुओ कीम्कोः आपा गायुस्इमा नमस्ते ल्होक्तेःनै। ओउःकोः कीम्हाङःपाय् इहाङःकोः ङ्हाम्ओमयः सबै थनःती वाङ्नै। इ सहर्कोः पैसा थेङ्ओ एरास्तस्इमा क्वार्तस्इमा नीङ्कायः नमस्ते ल्होक्लेःनै। 24 लौ ङीकोः प्रभु येसु ख्रीस्इलेः योनःती योतेःपै। 25 लौ परमेस्वर्कायः ताङ्ह्ताक्पाःथै। ओउःइपाय् नीङ्कायः ग्रमःत ङ्हाम्ताक्सा खाय्तेःनै। येसु ख्रीस्कोः पेओ नोःराय् थोल्ह्ती तोतोक्हाङःमा ओउःतलेःमा तोआलाङः। ओउः उय्ह्लेहाङःसै आन ज्याङःतोकायः छ्यानःआक्मालो कुरा छ्यानःतोक्हाङः ओउःतलेःमा छ्यानःओ लेःआः। 26 द्याह्पाय् परमेस्वर्कोः कुरा छ्यानःओलम्इ लेखती झ्यान्ते ओउः ङ्हा छ्यानःआक्मालो दोङ् कुरापाय् सबैकायः छ्यानःओ लेःआः। फेरी ओउः गलमा वाय्मालो परमेस्वर्इ तोती झ्यान्ते ओउः कुरापाय् सबै जात्कोः मान्तालम्कायः थोल्ह्ती तोओ लेःआः ओउःत खेःओ सबैइ ग्याती ङ्हाम्सा खाय्नानी। 27 लौ ओउः यातैज्योः सबैसै व्हाय्ओ परमेस्वर्कायः येसु ख्रीस्इलेः गलकायःमा ताङ्ह्ताक्पाःथै। ओउःतलेः स्याव्पाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.