रोमी 15 - चेपाङ1 ङी पेतो ङ्हाम्ओलम्इपाय् ओउः पेतो ङ्हाम्धाङ्मालोलम्कायः लुङ्सामा लव्ह्सामा खेःतो। लःलयःखेकायः म्रोताक्सा बोङःमामाःत 2 ङीइ ओउःमयःखेकायः म्रोताक्सा बोङःती “लौ ङाकोः हौकायः गत हायःती पेतो ङ्हाम्ताक्सा खाय्चाङः” त म्हर्सा खेःतो। 3 ओउःतलेः ख्रीस्इलेः हायःआकान् ओउःइपाय् लयःकायः म्रोताक्सा गलमा बोङःउलु। ओहाङःसैको इ कुरापाय् परमेस्वर्कोः आखरःहाङः लेखती मुनाः “लौ नाङ् परमेस्वर्कायः रेव्तो नोःओ कुरापाय् ङाकःहाङः वाङ्ओ लेःआः” त दाय्ह्ओ लेखती मुनाः। 4 ओहाङःसैको परमेस्वर्कोः आखरःहाङः लेखओ कुरापाय् सबै ङीकायः स्यान्सा थेङा उय्ह्लेहाङः लेखओ खेःतो। दोह् हायःती दाय्ह्सा ओउः कुरा पह्रती ङी ल्हुङ् ग्रमःत स्याव्ती ओउःकोः ताप्तो स्याव्सा दीन्कायः गुह्र्मामाःत आसती ल्युङ्ह्सा खाय्नाःतय्ह्नी। 5 ओहाङःसैको ङीकायः लुङ्ती ग्रमःत मुसा दोःताक्ओ परमेस्वर्इपाय् नीङ् सबैकायः ल्हुङ् ब्राङ्ताक्ती येसुलो लेखालेः वाह्ताक्तेःपै। 6 ओहाङःसैको नीङ् ङ्र्याःती यातैज्योः हाव्नयः नोःती ङीकोः प्रभु येसु ख्रीस्कोः परमेस्वर् आपाकायः ताङ्ह्ताक्ती मानसा खाय्तेःनानी। 7 परमेस्वर्कोः मय्ङ् ताङ्ह्ताक्साकायः ख्रीस्इ हायःओ लेखालेः नीङ्मा लःलयःकायः रोम्काय्ती त्याक्काय्न दा। 8 दोह् हायःती दाय्ह्सा यहुदीकोः आय्कानः तोकानःलम्कायः तोती गम्ओ कुरा ताप्ताक्साकायः ख्रीस्इलेः परमेस्वर्कोः दोङ् कुरा छ्यानःती यहुदीलम्कायः काम् जाङ्ह्लाङ् वाङ्ओआः त ङाइ तोनेःनाङ्स। 9 यहुदी खेःमालोलम्कायःमा परमेस्वर्इ गुच्युक् योनःती योनाःथास तमा ख्रीस्पाय् छ्यानःलाङ् वाङ्ओ लेःआः ओहाङःसैको ओउःमयःइमा परमेस्वर्कायः ताङ्ह्ताक्ती मानसा खाय्नानी। “ओउःत हायःओकायः ङाइ यहुदी खेःमालोलम्कःहाङः नाङ् परमेस्वर्कायः ‘च्युता’ त तोलेःनेःनाङ् नाङ्कोः मय्ङ् ताङ्ह्ताक्ओ गीत्लेः मेनाङः” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 10 फेरी “लौ नीङ् यहुदी खेःमालोलम्य परमेस्वर्कोः मान्तालम्कुस् ब्राङ्ती चोङाय्ती मुन” तमा लेखती मुलेःनाः। 11 फेरीलेः “लौ नीङ् यहुदी खेःमालोलम्पाय् प्रभुकायः ताङ्ह्ताक्नु दा। सबै जात्कोः मान्तालम्इ ओउःकायः मेती ताङ्ह्ताक्नु” तमा लेखती मुनाः। 12 ओहाङःसैको एसायाइ लेखओ आखरःहाङः “लौ येसेकोः प्लोमःदानेसै यात्चाक् वाङ्लेःनाः ओउःपाय् यहुदी खेःमालोलम्कोः राजालेः स्याव्नाः। ‘ओउःइलेः ङीकायः पेतो स्याव्ताक्नाःतय्ही’ त दाय्ह्ती ओउः वाङ्साकायः ओउःमयः झाह्ती ल्युङ्ह्ती मुनै” त दाय्ह्ओ लेखती मुनाः। 13 लौ उया लोने वाङ्सा कुराकायः परमेस्वर्इ नीङ्कायः झाह्ती ल्युङ्ह्ताक्तेःनै। ओउःकायः नीङ्इ ङ्हाम्तेःनानी त खेःओ परमेस्वर्इ नीङ्कायः चोङाय्ताक्तेःपै ल्हुङ् धोमाय्ताक्तेःपै। ओहाङःसै ओउःकोः ग्वालामःकोः ग्वम्इ नीङ्कायः न्हाङ्तोलेः झाह्ती ल्युङ्ह्ताक्तेःनै। 14 लौ ङाकोः पुःचोङ् हौचोङ्य नीङ्कोः ल्हुङ् पेतोमा जुगाङ् व्हाय्ओ लेःआः त चीःनाङः ओउः त झ्यान्तेलेः लःलयःकायः पेतो स्यान्सा खाय्तेःनानी। 15 ओउःत चीःसापाय् ल्हुङ्हाङः चीःलेःनाङः इ चेतीहाङः ङाइ यात्नीस् कुरा क्लुनःती फुतीलेः लेखनेःआलाङ्। ओउःत हायःसापाय् परमेस्वर्इलेः ग्वम् बयःआताङः। 16 यहुदी खेःमालोलम्कःहाङः येसु ख्रीस्कोः काम् जाङ्ह्साकायः ङापाय् ओउःकोः नोकरी लेःआः ङ। ओउः मान्तालम्कायः परमेस्वर्कोः पेओ समचार् थोल्ह्ती तोआक्तीकोमा परमेस्वर्कोः ग्वालामःइ छय्ङ्ताक्आक्तीकोमा ओउःमयःकायः ङाइ पुरोहीत्लो लेखालेः परमेस्वर्कायः ल्हासालेः खाय्नाङः। 17 ङाइ येसुकुस् ओउः काम् जाङ्ह्आलाङः त झ्यान्ते ङाइ ङाःतोलेः नोःसा खाय्नाङः। 18-19 खाय्सापाय् खाय्ङोतो ङाइ ख्रीस्कुस् जाङ्ह्ओ काम्कोः कुरालेः ह तोनाङः। ओउःकोः ग्वालामःकोः ग्वम् दोःती ङाइ होम्ती तोधार्नामा ग्याङ्ह्राय् जाङ्ह्धार्नामा यहुदी खेःमालोलम्कायः परमेस्वर्कः ग्याताक्आलाङःसु। ओउःत हायःसाकायः ङा यरुसालेम्सै इलरीकुम्ताङ् ब्याह्ती ख्रीस्कोः पेओ समचार्पाय् जुदालेः थोल्ह्ती तोआलाङः। 20 गाःहाङःलो मान्तालम्इ ख्रीस्कोः कुरा सायःआक्धाङ्नीली ओहाङःलेः ओउःकोः कुरा तोलाङ् आल्सा बोङःआलाङः। ओउःत हायःओलेः अरु मान्ताइ ङ्हालेः स्यान्ती तोओ थाव्हाङः ङाइमा चाङःती स्यान्लाङ् आल्ङल। 21 एतलेः परमेस्वर्कोः आखरःहाङः “लौ सुखेकायः ओउःकोः कुरापाय् तोधाङ्मालो लेःआः ओउःइलेः लोने च्यवःसा खाय्नानी। सुखेइ ओउःकोः कुरा सायःधाङ्मालो लेःआः ओउःइलेः लोने चीःनानी” त लेखती मुनाः। 22 ओउः नया नया थाव्लम्ताङ् ब्याह्ती वाह्आलाङः त झ्यान्ते नीङ्कःताङ् आल्सा बोङःझुङ्ङोतो कोरःधाङ्ङल। 23 ङ्हापाय् कोरःआक्ङल द्याह् ओउः अरु देस्कोः काम्लम् द्युम्जेःआ त झ्यान्ते ङा आल्सा कोरःलेःनाङः। नाःतो साल्कायः ङा नीङ्कायः योसा झाह्आलाङः 24 ओउःत झ्यान्ते एस्पैन् देस्ताङ् आल्तोक्हाङः ङाइ नीङ्कायः ल्होती क्रुस्सा म्हर्नाङः। ओहाङःसै नीङ्कुस् ल्हुङ् म्हत्तोलेः ब्राङ्काय्ती मुआक्तीको ङाकायः एस्पैन्ताङ् ल्होक्सा खाय्तेःनानानाङ्स। 25 ओउःत हायःसा बोङःलेःनाङः देङीलेः ङा यरुसालेम्हाङः मुओ परमेस्वर्कोः मान्तालम्कायः यात्ज्योः काम् जाङ्ह्लाङ् आल्नाङः। 26 ओहाङःकोः यरुसालेम्कोः नाःतो नाःमालो ङ्हाम्ओलम्कायः मासीदोनीया आखया नीस् देस्कोः ङ्हाम्ओलम्इ ङाकुस्इ पैसा ल्होक्सा म्रोनै। 27 एत ल्होक्साकायः ओउःमयः लयः झाक्ती ग्याइतो। यहुदीलम्खेइ ओउः अरु जात्कोः मान्तालम्कायः परमेस्वर्इ बयःओ कुरा पाःती बयःआथास त झ्यान्ते अरु जात्कोः मान्तालम्खेइ द्याह् मुह्ती त्युम्ह्ती लयः गम्ओ थोक्लम्कोः यहुदीलम्कायः पाःती पाय्क्सा खेःतो। 28 ओहाङःसैको ओउः मान्तालम्इ ल्होक्ओ पैसा जुगाङ् दाक्तीलेः ल्हाआक्तीको ङा एस्पैन्ताङ् आल्नाङः। आल्तोक्हाङः नीङ्कायः क्रुस्सा खाय्नेःनाङ्स। 29 फेरी नीङ्कःताङ् वाङ्तोक्हाङः ङाइ येसु ख्रीस्कोः पेओ कुरालेः जुदालेः वानःनेःनाङ्स एत चीःलेःनाङः। 30 लौ पुःचोङ् हौचोङ्य नीङ्पाय् ङीकोः प्रभु येसु ख्रीस्कोः मान्ता लेःतेः इ। ओउःकोः ग्वालामःइ बयःओ राप्ओ ल्हुङ् दोःती ङाकोः काम्कायः “पेतो स्याव्पाः” त ङाकुस् धुःतीलेः परमेस्वर्कः आन तेती तोनु दा। 31 ङाकायःपाय् “यहुदीयाकोः ङ्हाम्मालोलम्कःसै दल्ताक्पाःथै” दाय्ह्ती तेनाङ्स दा। फेरीलेः ओउः यरुसालेम्हाङः मुओ ङ्हाम्ओलम्इ ङाइ वानःओपाय् च्यवःआक्तीको “म्रोपै” तमा तेती तोनाङ्स। 32 ओहाङःसैको परमेस्वर् झाक्नाः त खेःया नीङ्कःताङ् चोङाय्तोलेः वाङ्नाङः नीङ्कुस्मा ल्हुङ् स्याङ्तोलेः मुनाङः। 33 लौ ङीकोः ल्हुङ् धोमाय्ताक्ओ परमेस्वर्पाय् नीङ् सबैकुस् मुपाः। ओउःच्युक्लेः स्याव्पाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.