रोमी 14 - चेपाङ1 यात्नीस् मान्तालम् पेतो ङ्हाम्धाङ्नीली त खेःया ओउःमयःकुस् काय्काय्माःत रोम्काय्न। 2 कोय् मान्तालम्खेइ आन चीःती ङ्हाम्ती झ्यान्ते सबै थोक् जेःनानी अरुखेइ पेती चीःतीलेः ङ्हाम्माःत झ्यान्ते मायःलम् जेःसा क्रीनै। 3 ओउः सबै जेःसा ज्याक्ओ मान्ताइ ओउः मायः क्रीती जेःमालो मान्ताकायः क्लुनःती तोलाम्। फेरी ओउः मायः जेःसा क्रीओ मान्ताइमा ओउः सबै थोक् जेःओ मान्ताकायः गाल्धै बयःलाम् दोह् हायःती दाय्ह्सा ओउः नीस् मान्ताकायः परमेस्वर्इ लयःकोः मीक्हाङः घार्तोलेः पेतो योआथाच। 4 ङ्हाम्ओलम्पाय् सबै परमेस्वर्कोः नोकरी लेःआः इ। ङ्हाम्ओ मान्ताकोः काम्लम् योती “इपाय् पेलेःनाः ओउःपाय् पेल” त दाय्ह्ती तोसा परमेस्वर्कोः काम् लेःआः नीङ्कोः काम् खेःबाय्ल। ओउः मान्तापाय् परमेस्वर्कोः मीक्हाङः काम् पेतोलेः जाङ्ह्नौ त खेःया प्रभु परमेस्वर्इलेः ओउःतलेः जाङ्ह्ताक्आथै। 5 यात्नीस् मान्तालम्खेइ “इ दीन्मा ओउः दीन्मा अरु दीन्सै क्रोःओ लेःआः” त दाय्ह्ती तोनानी अरुखे सबै दीन्लम्पाय् यातैज्योः लेःआः त दाय्ह्नै। ओउःत खेःओ सबै मान्तापाय् “लौ ङाकायःखे इत हायःसा स्याव्लेःनाः” त लःलयःकोः ल्हुङ्हाङः म्हर्ती पेतो चीःती जाङ्ह्सा खेःतो। 6 सुसुखे “लौ इ दीन्पाय् क्रोःओ दीन् लेःआः” त म्हर्नै ओउःलेः परमेस्वर्कायः माननानी। सुसुखेइ सबै थोक् जेःनानी ओउःइमा परमेस्वर्कायः माननानी दोह् हायःती दाय्ह्सा जेःतोक्हाङः ओउःइ परमेस्वर्कायः “च्युता” त तोनानी। ओउःतलेः ओउः मायःलम् जेःमालो मान्ताइमा परमेस्वर्कायः “च्युता” त तोती ओउःकायः माननानी। 7 ङीकःहाङःपाय् लयःकायः ह स्याक्ओ मान्ता सुमा नाःल लयःकायः ह सीओ मान्तामा सुमा नाःल। 8 ङी सेलः मुनाःतय्ही त खेःया ओउःत स्याव्ओ प्रभुकायःलेः सीनाःतय्ही त खेःया ओउःमा प्रभुकायः लेःआः। स्याक्नाःया सीनाःया दोह् खेःयामा ङीपाय् प्रभुकोः मान्ता लेःआः तय्ही। 9 सेलः मुओलम्कोः प्रभुलेः स्याव्साकायःमा सीओलम्कोः प्रभुलेः स्याव्साकायःमा ख्रीस्लेः सीओआः। सीआक्तीको उह्ती च्योक्माआ। 10 ओउःत झ्यान्ते नीङ्कोः ङ्हाम्ओ पुःचोङ् हौचोङ्कायः दोह् हायःतीतेः गाल्तुम्तीतेः नोःतेःनानी। दोह् हायःतीतेः ओउःमयःकायः मीतोतेः योतेःनानी। ङी सबैकायः लोने परमेस्वर्इ तय्छनःती योनाःतय्ही। 11 “लौ दोङ्सी दाय्ह्भनाङ् सबै मान्तालम् ङा जीङः नाःओ परमेस्वर्कःताङ् घ्रुस्ती बाःती ‘लौ प्रभु परमेस्वर्य’ त दाय्ह्ती ङाकायः माननाःताङः” त दाय्ह्ती परमेस्वर् दाय्ह्ओ कुरा आखरःहाङः लेखती मुनाः। 12 ङी सबैइ “इ काम्लम्मा ओउः काम्लम्मा जाङ्ह्आलाङः” त दाय्ह्ती परमेस्वर्कायः छ्यान्ह्साकायः घोती तोसा खेःनाःतय्ही। 13 ओउःत झ्यान्ते यात्चाक्इ अरुकायः गाल्तुम्ती ताः ताः नोःताःउलु। ओउःत हायःमामाःत दोह् दोह् हायःओइ नाङ्कोः ङ्हाम्ओ हौकायः रेव्तो जाङ्ह्ताक्नाःथै ओउःपाय् जाङ्ह्लाम्। 14 ङा प्रभु येसुकोः मान्तालेः मुनाङः त झ्यान्ते क्रीसीःओ थोक्पाय् दोह्मा नाःल एत चीःलेःनाङः। ओउःत चीःसापाय् ङाखेइ चीःङोतो अरुखेइ यात्ज्योः थोक्पाय् “क्रीसीःओ लेःआः” त सायःचाःइसी त खेःया ओउःकायः ओउः थोक्पाय् क्रीसीःओलेः स्याव्आनाः। 15 ओहाङःसै यात्ज्योः थोक् जेःयाकायः नाङ्कोः ङ्हाम्ओ हौकायः नाङ्इ ब्रःताक्तेःनौ त खेःया ओउःत हायःसा स्याव्ल। जेःतेःनौ त खेःया ओउःकायः नाङ्इ पेतो राप्तेःउलु। ओउः मान्ता दल्ताक्साकायः ख्रीस्पाय् सीलेःआ ओउःत झ्यान्ते ओउः मान्ताकायः नाङ्इलेः वाय्ताक्तेःचनौ। 16 दोह् दोह्कायः “इपाय् पेलेःनाः” ततेः म्हर्तेःनै ओउःकायः अरुइ “पेमालो” त तोताक्लाम् 17 दोह् हायःती दाय्ह्सा परमेस्वर्कोः राजीहाङः दोह् दोह् जेःसा दोह् दोह् तुङ्सा त दाय्ह्ती जवओ कुरालेः नाःल। ओउःकोः राजीहाङः दोह् दोह् कुरापाय् ताङ्ह्लेःनाः दाय्ह्सा पेतो छय्ङ्तो मुओलेःमा ल्हुङ् धोमाय्ओमा ल्हुङ् चोङाय्ओमा इ सबै कुरा परमेस्वर्कोः ग्वालामःइ बयःओ लेःआः ओउःकोः राजीहाङः ताङ्ह्ओ लेःआः। 18 सुसुइ एत चीःती ख्रीस्कोः काम् जाङ्ह्नानी ओउःइलेः परमेस्वर्कायः म्रोताक्नानी आने ओउः मान्ताकायःपाय् अरु मान्ताइमा पेतोलेः लुङ्ती नोःनाःथास। 19 लौ उया ब्राङ्ताक्ओमा अरुकायः पेतो स्याव्ताक्ओ कुरामा त्युस्तीलेः जाङ्ह्साकायः बोङःनी। 20 परमेस्वर्इ अरु मान्ताकायः जाङ्ह्ओ पेओ काम्पाय् नीङ्कोः जेःधार्नालेः वाय्ताक्लाम्। जेःगालम्पाय् सबै जेःसा स्याव्लेःनाः। स्याव्सापाय् स्याव्लेःनाः यात् थोक् जेःती झ्यान्ते नाङ्इ अरुकायः रेव्तो हायःताक्तेःनौ त खेःया ओउःखे जेःसा स्याव्ल। 21 इत हायःसा उया पेलेःनाः मायः जेःओयामा हान् तुङ्ओयामा दोह् खेःयामा नाङ्कोः ङ्हाम्ओ हौकायः ब्रःताक्नाःथै ओउःत हायःलाम्। 22 जेःओ तुङ्ओकायः दोह् दोह् नाङ्कोः ल्हुङ्हाङः “इ जेःसा तुङ्सा स्याव्लेःनाः बा” त म्हर्तेःनाः ओउःपाय् नाङ्इ परमेस्वर्कुस् ह होम्काय्सा कुरा लेःआः अरुकायः तोसा परल। होम्काय्आक्ती नाङ्इ ल्हुङ् ब्रेह्माःत सोकार्तो जेःतेःनौ तुङ्तेःनौ त खेःया नाङ् चोङाय्तीलेः मुतेःनाः बा। 23 नाङ्इ ल्हुङ् ब्रेह्तोलेः जेःनौ तुङ्नौ त खेःया ओउःखे पेल न्युम्ह्तोलेः स्याव्तेःनाः। नाङ्इ पेतो ङ्हाम्माःत जेःनौ त खेःया परमेस्वर्इ पेमालो योतेःनाः। दोह् दोह्तेः ङ्हाम्माःत हायःतेःनौ ओउःपाय् पेमालो लेःआः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.