रोमी 12 - चेपाङ1 लौ उया पुःचोङ् हौचोङ्य परमेस्वर्इ ङीकायः एतलेः योनःती योआतय्ही ओउःत झ्यान्ते ओउःकायः म्रोताक्साकायः रेव्ओसै छय्ङ्ती पेङ्कलःतो स्याव्ती ओउःकोः काम् जाङ्ह्सा थेङा परमेस्वर्कायः लयःकोः आङ्मा ल्हुङ्मा जुदालेः ल्हाइसी एतलेः तेती तोनेःनाङ्स। ओउःत हायःसापाय् परमेस्वर्कायः दोङ् पेओ मानसा लेःआः बा। 2 ओहाङःसै परमेस्वर्कायः चीःमालो ल्हाव्ह्दैबाङ्कोः मान्तालम्लो लेखालेः वाह्लाम् परमेस्वर्इ बयःओ रौ ल्हुङ् दोःती वाह्न। ओहाङःसै परमेस्वर्कोः ल्हुङ्हाङः झाक्ओ कुरालेः चीःसा खाय्तेःनानी। दोह् दोह् कुरा पेओ लेःआः दोह् दोह् कुरा ओउःकायः म्रोताक्ओ लेःआः दोह् दोह् छय्ङ्तो नीङ्ओलेः मुनाः ओउःमा चीःसा खाय्तेःनानी। 3 परमेस्वर्इ ङाकायः बयःओ त खेःओ इ कुरा ङाइ द्याह् सबैकायः तोनेःनाङ्स। लयःकायः “ताङ्ह्नाङः” ततेः ताःतेःचाःइसी। ताङ्ह्तोलेः ताःमाःत गुच्युक्लेः परमेस्वर्इ ङ्हाम्ताक्तेःआकाय् ओउःच्युक्लेः “लौ परमेस्वर्इ ङाकायः इच्युक् जाङ्ह्सा बयःआताङः बा” त लःलयःकायः चीःसातेः खेःतो। 4 ङीकोः यातैज्योः आङ्हाङः क्रुत् दोम् मीक् ले नो अरु नाःतो मुलेःनाः। फेरी क्रुत्इ जाङ्ह्सा काम्लम् थेलेः दोम्इ जाङ्ह्सा काम्लम् थेलेः मीक्इ जाङ्ह्सा काम्लम् थेलेः। 5 ओउःतलेः ङी ङ्हाम्ओलम्पाय् नाःतोलेः मुसापाय् मुनाःतय्ही। ख्रीस्कोः क्रुत् दोम्लो लेखालेः ङी यातैज्योः ख्रीस्कोः आङ्हाङः मुनाःतय्ही लयःमयःकुस् ब्राङ्तीलेः मुनाःतय्ही। 6 फेरी ख्रीस्कोः क्रुत् दोम्लो लेखालेः ओउःकोः काम् जाङ्ह्साकायः परमेस्वर्इ मान्ता मान्ताकायः थेथेलेः बयःआतय्ही। यात्चाक्खेकायः परमेस्वर्कोः कुरा छ्यानःती तोसा बयःओलेः त खेःया ओउः मान्ताकोः ङ्हाम्जम्च्युक्लेः परमेस्वर्कोः कुरा छ्यान्ह्ती तोपनौ। 7 यात् अरुखेकायः सबै ङ्हाम्ओलम्कायः काम् जाङ्ह्सा बयःओलेः त खेःया ओउःइपाय् अरुकायः काम् पेतोलेः जाङ्ह्पनौ। अरुकायः ङ्हाम्ओलम्कायः स्यान्सा बयःओलेः त खेःया ओउःइपाय् स्यान्पनौ। 8 अरुकायः लुङ्ती तोसा बयःओलेः त खेःया ओउःइपाय् लुङ्ती तोपनौ। अरुकायः लयःकोः पैसा अरु थोक्लम् वेःती ल्हासा काम् बयःओलेः त खेःया ओउः मान्ताइपाय् साय्क्तोलेः बयःपनौ। अरुकायः नोःती स्यालःसा बयःओ त खेःया ओउःइपाय् पेतोलेः स्यालःपनौ। अरुकायः योनःती जाङ्ह्सा बयःओ त खेःया ओउःइपाय् चोङाय्तीलेः जाङ्ह्पनौ। 9 अरुकायः च्यवःताक्सा आले खेःल दोङ् ल्हुङ्इलेः अरुकायः राप्नु। पेमालो कुराखे ब्लाय्क्तीलेः फेती वाय्नु। पेओ कुराखेकः म्रोतीलेः मुन। 10 अरु ङ्हाम्ओलम्कायः लयःकोः पुःचोङ् हौचोङ्लो लेखालेः जुगाङ् राप्ती मीओ ल्हुङ् स्याव्ती अरुलम्कायः “ओउःपाय् ङासै ताङ्ह्लेःनाः” त म्हर्न। 11 परमेस्वर्कोः काम्लम् माय्माःत गलकायःमा म्ह्युङ्ती जाङ्ह्नु दा। 12 लोने वाङ्सा खेःओकायः झाह्तीमा आसतोलेः ल्युङ्ह्ती मुन। लीह्सीःओ गोरःओ बेलाहाङः काय्ह्य्हाव्माःत ग्रमःत मुन। गलकायःमा परमेस्वर्कः तेती तोनु 13 अरु ङ्हाम्ओलम् दोह् दोह्लो राह्चनै ओउःमयःकायः लव्ह्ती पाःती बयःनु सबैकायः रोम्नु दा। 14 सुइ खेःयामा नीङ्कायः लीह्सीःओ बयःतेःनै ओउःकायः प्रनःती तोलाम् “परमेस्वर्इ पेतो स्याव्ताक्तेःपाः” त तोसा खेःतो। 15 चोङाय्ओ मान्तालम्कुस् चोङाय्ती मुन क्रेस्ओ मान्तालम्कुस् क्रेस्ती र्याःन। 16 सबैकुस् ब्राङ्काय्ती मुन। लयःकोः नेह्रो ओर्ताक्माःत ताङ्ह्ओ मान्ताकुस्मा मीओ मान्ताकुस्मा सबैकुस् ब्राङ्ती वाह्न लयः ङाःती वाह्लाम्। 17 नीङ्कायः पेमालो हायःओ मान्ताकायः पेमालो द्यान्ह्तीतेः जाङ्ह्तेःचानी। दोह् दोह् काम्लम् सबै मान्तालम्इ “पेओ लेःआः” त तोनानी ओउः ह जाङ्ह्नु दा। 18 अरुकुस् ब्राङ्सातेः ताक्तेःनै त खेःया सबैकुस् काय्काय्माःत ब्राङ्तीलेः मुन। 19 लौ पुःचोङ् हौचोङ्य सुकायःमा पेमालो काम् न्युम्ह्ताक्साकायः द्यान्ह्तीतेः जाङ्ह्चानी। नीङ्खे ओउःत हायःसा स्याव्ल पेमालो जाङ्ह्ओलम्कायः परमेस्वर्इलेः ल्हुङ् मल्ह्ती लयःइ न्युम्ह्ताक्नाःथास। “लौ ओउःत पेमालो काम् द्यान्ह्ती पाय्क्साकायः ङाकोः काम् लेःआः ङाइलेः न्युम्ह्ताक्नाङःसु” त दाय्ह्ती प्रभु परमेस्वर्इ दाय्ह्ओ ओउःकोः आखरःहाङः लेखती मुनाः। 20 माः नीङ्खेइ ओउःत हायःसा स्याव्ल “लौ नाङ्कायः पेमालो हायःओ मान्ताखेकायः योङ्क्राय्नाः त खेःया ओउःकायः जेःगा बयःउ ओउःपाय् तीः अप्नाः त खेःया तीःमा बयःउ। ओउःत हायःती ओउःकायः नाङ्इ आन रास्ताक्तेःनौ” तमा आखरःहाङः लेखती मुनाः। 21 पेमालोइ नीङ्कायः क्लीमःसा ताक्लाम् पेओ कुरा जाङ्ह्धार्नालेः पेमालोकायः नीङ्इ क्लीमःनु। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.