रोमी 11 - चेपाङ1 लौ उया “ओउःकोः लयःइ छीङ्ह्ओ यहुदीलम्कायः परमेस्वर्इ फेआकान्या” त दाय्ह्ती मान्ता व्हत्नै यादो। खेःल बा। ङापाय् आब्राहाम्कोः प्लोमःदानेलेः खेःनाङः बेन्यामीन्कोः होह्र्कोः मान्ता लेःआः ङ। ओउःत झ्यान्ते ङामा यात्चाक् इस्राएली त तोओ यहुदी जात्कोः मान्ता लेःआः ङ। 2 परमेस्वर्इपाय् ङ्हासैलेः छीङ्ह्ओ मान्तालम्कायः फेओ खेःल बा। एतलेः उय्ह्लेकोः एलीयाइ परमेस्वर्कः तेती तोओ कुरा आखरःहाङः लेखती मुनाः त नीङ्इ चीःतेःनानी। 3 “अ प्रभुय नाङ्कोः कुरा छ्यानःती तोओलम्कायः सात्माआकानी नाङ्कोः बेदीलम्कायः ह्र्योङःमाआकानी। द्याह् ङा ह सेलः मुलेःनाङः ङाकायःमा ओउःमयःइ सात्सा बोङःनाःताङः” त दाय्ह्ती ओउःइ परमेस्वर्कः तेती तोउतो 4 परमेस्वर्इ गत त्याङ्आ दाय्ह्सा “लौ ओउः पेमालो बाःअल् त तोओ द्यव्ताकायः मानमालो मान्तालम्कोः सात् हजार् मान्ताकायः ‘इमयः ङाकोः मान्तालेः मुपै’ त दाय्ह्ती गम्बत्आलाङःस” त दाय्ह्ती ओउः बेलाहाङः परमेस्वर् त्याङ्आ। 5 तेन्छ्याङ्मा परमेस्वर्इ लयः झाक्ती छीङ्ह्ओ योनःती योओ यहुदी मान्तालम्पाय् यात्नीस्चाक् मुलेःनै। 6 ओहाङःसै ओउःमयःइ जाङ्ह्ओ पेओ काम्लम्कायः छीङ्ह्ओलेः खेःइली परमेस्वर्इ लयः झाक्ती योनःती योओलम्कायः ह ओउःइ छीङ्ह्आकान्। पेओ काम्लम् जाङ्ह्ओकायः छीङ्ह्आथास त खेःया योनःती योसा परल। 7 ओउःत झ्यान्ते यहुदीलम्इ बोङःओ कुरापाय् सबै दोःइली परमेस्वर्इ छीङ्ह्ओ मान्तालम् झुङ्आले दोःआकाय् अरुलम्खे ल्हुङ् चाक्तो स्याव्आकाय्। 8 “लौ ओउःमयःकायः परमेस्वर्इ व्हक्मालो ल्हुङ् बयःआथास। द्याह्च्युक्हाङःपाय् ओउःमयः मीक् च्यवःसा खाय्मालोमा नो सायःसा खाय्मालो मुलेःनै” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 9 ओहाङःसै दावुद् राजाइमा तोओ कुरापाय् “ओउःमयःइ पेमालो हायःझ्याङ्कायः भोस् जेःतोक्हाङः खाक्पाःथास ल्याम्हाङः वाह्तोक्हाङः क्वेन्ह्ती तोन्पै। 10 मीक्इ लोक्तो स्याव्ती झ्यान्ते दोह्मा च्यवःसा खाय्माःत स्याव्पै गीङ् धेङ्ताक्माःत गलमा गीङ् गोङःतोलेः वाह्पै” त दाय्ह्ती नोःआकान्। 11 ओउःत हायःओ त खेःओ “ओउः यहुदीलम् क्वेन्ह्ती तोन्तोक्हाङः जुगाङ्लेः वाय्तो स्याव्आकाय्या” त दाय्ह्ती यात्नीस्इ व्हत्चानी यादो। खेःल ओउः यहुदीलम्खे ब्रःतोक्हाङः यहुदी खेःमालोलम्खे दल्तो स्याव्आकाय्। एत चीःआक्तीको ओउः यहुदीलम्पाय् ल्हुङ् लती “लौ ङीमा ओउःलो लेखालेः स्याव्पाःतय्ही” त दाय्ह्ती म्हर्ताक्साकायः परमेस्वर्इ ओउः यहुदी खेःमालो जात्लम्कायः दल्ताक्आथास। 12 एतलेः ओउः यहुदीलम्पाय् ब्रःओमा वेङ्ओलेःमा स्याव्धार्नालेः ल्हाव्ह्दैबाङ्कोः अरु जात्लम् आन पेओ दोःआकाय् ओउःत झ्यान्ते ओउः यहुदीलम्मा सबै दल्तो स्याव्नै त खेःयाकायः गुच्युक् न्हाङ्तोलेः पेतो लेःआः बा। 13 द्याह् नीङ् यहुदी खेःमालोलम्कायः तोचेःनाङ्स। ङापाय् यहुदी खेःमालोलम्कायः ख्रीस्इ छ्युङ्हओ ल्होक्ओमयः लेःआः ङ। नीङ्कायः ल्होक्च्युक्हाङः ङाइ ओउः काम्कायःपाय् आन ङाःतीलेः तोनाङः 14 दोह् हायःती दाय्ह्सा अरु जात्लम् दल्ओलेः त च्यवःती यहुदीलम्मा अरु जात्कः लती झ्यान्ते ङाइ यात्नीस्चाक्कायः दल्ताक्सा खाय्नाङः यादो। 15 परमेस्वर्इ यहुदीलम्कायः फेधार्नालेः ल्हाव्ह्दैबाङ्कोः सबै अरु जात्लम् ओउःकुस् ब्राङ्ताक्आकान्। ओउःत झ्यान्ते यहुदीलम्कायः परमेस्वर्इ रोम्आथास त खेःया गुच्युक् न्हाङ्तोलेः पेओलेः स्याव्नाः। ओउः बेलाहाङः ओउःमयः सीओसै च्योक्ओ मान्तालम्लो लेखालेः स्याव्नै। 16 परमेस्वर्कायः ल्हासा खेःओ लाङ्कोः यात्फन्ह् ह परमेस्वर्कायः ल्हाओलेः त खेःया ओउः लाङ्पाय् जुदालेः यात्खोक् परमेस्वर्कोः लेःआः। फेरी यात्ज्योः सीङःकोः तुङःपाय् परमेस्वर्कोः लेःआः त खेःया ओउः सीङःपाय् जुदालेः ओउःकोः लेःआः। एतलेः यहुदीलम्कोः तुङःलम्पाय् परमेस्वर्कोः मान्तालम् खेःइतो त झ्यान्ते ओउःमयः सबै ओउःकोः मान्ता लेःआः इ। 17 एतलेः सुक्ओ जैथुन् सीङःकोः यात्नीस् पेमालो दालालम् क्लय्ह्ती वाय्आक्तीको बन्सै अरु दालालम् वानःती ओउः ङ्हाकोः सीङःहाङः च्योतोती गम्ओआः। यहुदीलम्खेपाय् ओउः सुक्ओ सीङःलो लेखालेः मुनै नीङ् यहुदी खेःमालोलम्खे ओउः बन्सै वानःआ दालालम्लो लेखालेः ङ्हा सुक्ओ सीङःकःताङ् च्योतोती मुतेःनै ओहाङःसै द्याह् ओउः तुङःसै पेओ जीङःतेः दोःनै। 18 ओउःत झ्यान्ते ओउः क्लय्ह्ती वाय्ओ दालालो लेखालेः स्याव्ओ यहुदीलम्खे योती नीङ्खेइपाय् लयःकोः नेह्रो ओर्ताक्तेःचनौ। ओउःत हायःसा स्याव्ल बा दोह् हायःती दाय्ह्सा नीङ्पाय् दालालो लेखा ह मुतेःनै। दालाखेइपाय् तुङःकायः ङुन्ह्ती तुरःताक्उलु ओउः तुङःखेइ च्याती दालाकायः ङ्हन्तीक् तुरःताक्नाःथै। 19 ओउःत सायःतीतेः “माःसापाय् माः रैस ङीकायः तुङःहाङः च्योतोती गम्साकायः ओउः ङ्हाकोः दालालम् क्लय्ह्ती वाय्ओलेः खेःतो” त दाय्ह्ती नीङ् त्याङ्तेःनै यादो। 20 ओउः दोङ् कुरालेः खेःसापाय् खेःनाः ओउःमयःखेइ ङ्हाम्नीली त खेःओ वाय्तोलेः स्याव्आकाय् नीङ्खेइ ङ्हाम्तेःआकानी त खेःओकायः च्योतोती गम्तेःनै। ओउःत स्याव्सापाय् स्याव्तो लयःकोः नेह्रो ओर्ताक्माःत एङःती मुन 21 दोह् हायःती दाय्ह्सा लयः छीङ्ह्ओ यहुदीलम्कायः परमेस्वर्इ ङ्हाकोः दालालम्लो लेखा वाय्सा खेःतो त खेःओ नीङ् लोने च्योतोती गम्ओलम्पाय् पेतो हायःतेःनीली त खेःया ओउःइ नीङ्कायः न्हाङ्तोलेः वाय्सा ग्यानाः। 22 परमेस्वर्पाय् यात्नीस्कायः गुच्युक् काङ्ओ लेःआः अरुकायः आन खह्र्ओ लेःआः त नीङ्इ चीःसा खेःतो। ओउः ङ्हाम्मालो वाय्ओलम्खेकः परमेस्वर् खह्र्ओ लेःआः। योनःती योतोक्हाङःपाय् नीङ्खेकः परमेस्वर् आन काङ्ओलेः मुनाः। ओउःकोः काङ्ती हायःओ नीङ् अह्र्तेःचनै। अह्र्तेःनै त खेःया झाक्तेःइली त खेःया ओउःइ काङ्तो हायःओ फेती नीङ्कायःमा वाय्तोलेः स्याव्ताक्तेःनै। 23 ओहाङःसै यहुदीलम् ल्हुङ् द्यान्ह्तीलेः ङ्हाम्नानी त खेःया परमेस्वर्कोः सीङःहाङः फेरीलेः च्योतोती गम्नाःथास ओउःत हायःसा परमेस्वर्इ खाय्लेःनौ। 24 नीङ् यहुदी खेःमालोलम्खे बन्कोः थे सीङःकोः दालालो लेखालेः कीम्हाङः सुक्ओ सीङःहाङः च्योतोती गम्ओ लेःतेः इ ओउःत हायःसाखे दुक्तोलेः। यहुदीलम्खेपाय् लयःकोः सीङःसै क्लय्ह्ती वाय्ओ लेःआः ओउःमयःकायः लयःकोः सीङःहाङः फेरी द्यानःती च्योतोती गम्साखे सजीलो लेःआः। 25 लौ पुःचोङ् हौचोङ्य यात्ज्योः ङ्हा छ्यान्ह्आक्मालो कुरा ङाइ द्याह् छ्यान्ह्नेःनाङ्स ओहाङःसैको नीङ्इ लयःकोः नेह्रो ओर्ताक्सा खाय्तेःनीली। ओउः कुरापाय् इलेःआः परमेस्वर्इ दोक्ती गम्ओ ङ्हाम्सा खेःओ यहुदी खेःमालोलम्पाय् आःताः जुदालेः ख्रीस्कःताङ् वाङ्माःत यहुदीलम्इपाय् ङ्हाम्सा ग्यामालो मुनै। 26 अरु जात्लम् ख्रीस्कःताङ् वाङ्आक्तीको ह ओउः यहुदीलम्मा जुदालेः दल्तो स्याव्नै। “लौ सीओन् सहर्सै ओउः दल्ताक्सा चाक् वाङ्नाः। वाङ्आक्तीको ओउःइ इस्राएल्कोः प्लोमःदाने मोमःदानेकोः रेव्ओ ल्हुङ्पाय् म्हीत्ताक्ती वाय्ताक्नौ। 27 ओहाङःसैको ङा परमेस्वर्इ ओउःमयःकोः रेव्तो हायःओ क्युम्ह्तोक्हाङः ओउःमयःकुस् होम्काय्ओ कुरा तोनाङः” त छ्यानःती दाय्ह्ओलेः परमेस्वर्कोः आखरःहाङः लेखती मुनाः। 28 यहुदीलम्इ ख्रीस्कोः पेओ समचार् सायःसा ग्याइली त झ्यान्ते ओउःमयःखे परमेस्वर्कोः बीरोत्लेः स्याव्नै। ओउःत हायःधार्नालेः नीङ्खे परमेस्वर्कुस् ब्राङ्तेःनै। ओउःमयः बीरोत्लेः स्याव्सापाय् स्याव्इतो यहुदीलम्कोः आय्कानः तोकानःकायः परमेस्वर्इ छीङ्ह्आकान् ओउःत झ्यान्ते ओउःइ ओउःमयःकायः राप्लेःनाःथास। 29 दोह् हायःती दाय्ह्सा पेओ कुरा बयःआक्तीकोमा मान्तालम्कायः छीङ्ह्आक्तीकोमा परमेस्वर्पाय् गलमा ल्हुङ् द्यान्ह्ल। 30 ङ्हापाय् नीङ् यहुदी खेःमालोलम्पाय् परमेस्वर्कोः कुरा जाङ्ह्सा ग्याआक्मालो खेःतेःइतो परमेस्वर्इ ङ्हा छीङ्ह्ओ यहुदीलम्इमा ओउःकोः कुरा जाङ्ह्सा ग्यामाःत झ्यान्ते ओउःइ नीङ्कायः द्याह् योनःती योती दल्ताक्तेःनै। 31 आने ओउः यहुदीलम्पाय् परमेस्वर्कोः कुरा द्याह् ग्यामाःत मुनै ओउःइ नीङ्कायः योनःती योती झ्यान्ते ओउःमयःकायःमा परमेस्वर्इ द्याह् योनःतीलेः योती दल्ताक्सा बोङःनाःथास। 32 सबै मान्तालम्कायः ओउःइ योनःतीलेः योनौ त छ्यान्ह्सा थेङालेः परमेस्वर्इ सबै मान्तालम्कायः ओउःकः ग्यामाःत मुसा ताक्आथास। 33 माःहै परमेस्वर्पाय् गुच्युक् पेओ लेःआः ओउःपाय् गुच्युक् व्हाय्तो लेःआः। ओउःइ जाङ्ह्ओ कुरापाय् सुइमा अरुकायः छ्यानःसा खाय्नीली सुइमा लयःकोः ल्हुङ्हाङः चीःसा खाय्नीली। 34 इतलेः आखरःहाङः दाय्ह्ओ मुनाः “परमेस्वर्कोः ल्हुङ्तुक् सुइमा योसा खाय्नीली सुइमा ओउःकायः स्यान्सा खाय्नीली। 35 ओउःकायः रीन् काती बयःसा सुइमा परइली” त दाय्ह्ओ मुनाः 36 दोह् हायःती दाय्ह्सा थोक्लम्पाय् जुदालेः ओउःइलेः जाङ्ह्आकान्। फेरी सबै थोक्लम् ओउःइ तेन्छ्याङ्मा गम्लेःनौ सबै लयःकायःलेः जाङ्ह्ओ खेःतो। ओउः परमेस्वर्कायः गलकायःमा मानओमा ताङ्ह्ताक्ओमा स्याव्पाः। माःहै ओउःतलेः स्याव्पाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.