रोमी 10 - चेपाङ1 लौ पुःचोङ् हौचोङ्य ङाकोः लयःकोः यहुदी मान्तालम् सबै दल्पै त आन ल्हुङ् झाक्नाङः। ओउःमयःकायः ङाइ परमेस्वर्कः आन तेती तोनाङः। 2 ओउः मान्तालम्पाय् परमेस्वर्कोः काम् म्ह्याङ्तीलेः जाङ्ह्नीतो ओउःतलेः ङाइ चीःती तोलेःनाङः बुरु ओउःमयःइ परमेस्वर्कोः दोङ् कुरापाय् पेतो चीःधाङ्नीली। 3 परमेस्वर्इ मान्तालम्कायः लयःकोः मीक्हाङः गत हायःती पेतो स्याव्ताक्नौ त दाय्ह्सा ओउः यहुदीलम्इ पेतो तय्ह्नीली। ओउःत झ्यान्ते ओउःमयः लयःकोः ल्याम्हाङः वाह्सा बोङःआकानी परमेस्वर्कोः दोङ् ल्याम्हाङः वाह्सा ग्याइली। 4 ओउःत हायःसा स्याव्ल दोह् हायःती दाय्ह्सा ख्रीस्इपाय् ओउः ऐन्कोः कुरा दप्ती द्युम्ताक्आकान्। द्याह् ख्रीस्कोः कुरा ङ्हाम्आक्तीको ह मान्ताइ परमेस्वर्कोः मीक्हाङः पेतो स्याक्सा खाय्नानी। 5 ऐन्कोः पेतो स्याव्ताक्सा कुराकायः मोसाइ इतलेः लेखआकान् “सुसुइ ऐन्कोः कुरालेः जुगाङ् जाङ्ह्चानी ओउःपाय् जीङः दोःनै” त दाय्ह्ती लेखओआः। 6 ओउःखेपाय् ऐन् जाङ्ह्ती परमेस्वर्कोः मीक्हाङः पेतो स्याव्सा कुरालेः। इखेपाय् ङ्हाम्आक्तीको पेतो स्याव्सा कुरा लेःआः “लौ सुखेलो लाङ्काहाङः लन्ह्चै” त ल्हुङ्हाङः म्हर्लाम् ओउःत हायःसा ख्रीस्कायः ग्ल्युनःसालेः। 7 फेरी “लौ सुखेलो कामः नालाहाङः ग्ल्युङ्ह्चै” तमा म्हर्लाम् ओउः त हायःसा ख्रीस्कायः लनःसालेः। 8 ओउःत हायःसा परल दोह् हायःती दाय्ह्सा “परमेस्वर्कोः नोःराय्पाय् नाङ्कःगन द्याङ्तोलेः मुनाः। नाङ्कोः लेहाङःमा नाङ्कोः ल्हुङ्हाङःमा ओहाङः परमेस्वर्कोः नोःराय् मुलेःनाः” त लेखती मुनाः। ओउः ङ्हाम्सा कुरापाय् ङीमा थोल्ह्ती तोनाङःसु। 9 लेइलेः “लौ येसुपाय् प्रभु लेःआः” त दाय्ह्ती नाङ्इ अरुकायः फुती नोःमातेःनौ ल्हुङ्हाङःलेः “लौ येसुकायः परमेस्वर्इ उह्ती च्योक्ताक्आथै” त दाय्ह्ती ङ्हाम्मातेःनौ त खेःया नाङ्पाय् दल्तेःनाः। 10 ल्हुङ्हाङः ओउःकोः कुरा ङ्हाम्ती झ्यान्ते परमेस्वर्कोः मीक्हाङः पेतोलेः स्याव्नाःतय्ही। लेइ ओउःकोः कुरा नोःती झ्यान्ते दल्तोलेः स्याव्नाःतय्ही। 11 लौ “सुसुइ ओउःकायः ङ्हाम्नानी ओउःपाय् ल्हुङ् घ्युम्तो स्याव्इली” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 12 ओउः कुरापाय् सबैकायः स्याव्लेःनाः यहुदीलम्मा यहुदी खेःमालोलम्मा थेथे खेःइली दोह् हायःती दाय्ह्सा परमेस्वर्पाय् सबैकोः प्रभु लेःआः। सुखेइलो ओउःकायः तेती तोनानी ती ओउःकायःलेः परमेस्वर्इ जुगाङ् पेतो दोःताक्नाःथास। 13 आखरःहाङःमा “लौ सुखेइलो प्रभुकायः तेती तोनानी ओउःपाय् दल्तो स्याव्नै” त लेखती मुनाः। 14 तेआक्तीको मान्ता दल्सापाय् दल्तो स्याव्नै ओउःमयःइ प्रभुकायः आःताः ङ्हाम्माःत गत हायःती तेती तोसा खाय्चानी र। फेरी ओउःकोः कुरा आःताः सायःमाःत गत हायःती ङ्हाम्चानी। ओहाङःसै ओउःकोः कुरा आःताः थोल्ह्ती तोमाःत गत हायःती सायःचानी। 15 ओउः कुरा तोसाकायः मान्ता आःताः ल्होक्माःत ओउः कुरापाय् गत हायःती थोल्ह्ती तोतो स्याव्नाः र। “लौ परमेस्वर्कोः पेओ नोःराय् थोल्ह्ती तोओलम् वाङ्ओ बेलाहाङः गुच्युक् पेओ लेःआः बा” त दाय्ह्ती दाय्ह्ओ आखरःहाङः लेखती मुनाः। 16 प्रभुकोः पेओ नोःराय् थोल्ह्ती तोओलेः खेःतो ओउः कुरा सायःओ यहुदीलम्पाय् सायःआक्तीको नाःतोलेः ङ्हाम्सा ग्याइली। ओउःतलेः एसायाइमा तोओ “अ प्रभुय ङीइ थोल्ह्ती तोओ कुरापाय् सुइ ङ्हाम्आकानी र” त दाय्ह्ती दाय्ह्आ। 17 लौ इलेः चीःनाःतय्ह्नी ख्रीस्कोः नोःराय् थोल्ह्ती तोओहाङः मान्तालम्इ सायःसा खेःतो। ओहाङःसैको सायःधार्नालेः ओउःमयःइ ङ्हाम्सा खाय्नानी। 18 लौ उया “ओउः नोःराय्पाय् यहुदीलम्इ सायःआक्नीली” त यात्नीस्चाक् दाय्ह्नै यादो। खेःल सायःलेःआकानी। “ओउःमयःकोः नोःराय्पाय् ल्हाव्ह्दैबाङ्कोः चार् मुथुङ्ताङ् थोक्ती सबै मान्तालम्कःताङ् दाह्आ” तमा परमेस्वर्कोः आखरःहाङः लेखती मुनाः। 19 ओहाङःसै ओउः नोःराय्पाय् यहुदीलम्इ सायःसापाय् सायःनीतो ओउः कुरापाय् चीःसा खाय्नीली यादो। चीःसापाय् चीःआकानी ओउःमयः ङ्हाम्सा ग्यामालो खेःइतो। एतलेः मोसालेः दाय्ह्आ “लौ ङा परमेस्वर्इपाय् अरु चीःमालो जात्कोः मान्तालम्कः नीङ्कायः लताक्नेःनाङ्स” त दाय्ह्ती यहुदीलम्कायः मोसाइ तोआकान्। 20 फेरी एसायाइ पाःतीमा फवःती नोःआ “लौ ङाकायः बोङःसा बोङःमालोलम्कायः क्रुस्आलाङःसु। ङाकायःपाय् ‘लौ नाङ्कायः च्यवःसा दोःपाङी’ त तेमालोलम्कःताङ् थाती छ्यानःआलाङःस” त दाय्ह्ती दाय्ह्आ। 21 यहुदीलम्खेकायः “लौ ङाकोः कुरा सायःसा ग्यामालोलम् झाक्मालोलम्कायः दीन्का दीन् ‘लौ ङाकःताङ् द्यान्ह्ती वाङ्न दा’ त दाय्ह्ती रोम्साकायः ल्युङ्ह्तीलेः मुओआः ङ” त परमेस्वर् दाय्ह्ओमा लेखती मुनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.