रोमी 1 - चेपाङ1 इ चेती ङा पावुल् त तोओ येसु ख्रीस्कोः काम् जाङ्ह्ओ मान्ताइ लेखती ल्होक्नेःनाङ्स। ङाकायःपाय् परमेस्वर्इ गोत्ती ओउःकोः पेओ समचार् थोल्ह्ती तोसाकायः छ्युङ्ह्ती ल्होक्आताङः। 2 ओउः पेओ समचार्कोः कुरापाय् परमेस्वर्इ “लौ इ कुरा ङाइ लोनेः छ्यानःती बयःलेःनाङः” त दाय्ह्ती लयःकोः कुरा छ्यानःओ मान्तालम्कायः तोती गम्ओआः। ओहाङःसैको ओउःमयःइ ओउः कुरापाय् परमेस्वर्कोः छय्ङ्ओ आखरःहाङः लेखआकानी। 3 ओउः पेओ नोःराय्पाय् ङीकोः प्रभु येसु ख्रीस्कोः कुरा लेःआः। येसु ख्रीस्त तोओपाय् परमेस्वर्कोः चोः लेःआः। ओहाङःसैको ओउःपाय् मान्ता स्याव्ती दावुद् राजाकोः प्लोमःदाने त तोओ खेःतो। 4 ओउःपाय् परमेस्वर्कोः चोः लेःआः त छ्यानःसाकायः सीआक्तीको ओउःकायःपाय् ओउः छय्ङ्ओ ग्वालामःइ आन ग्वम्इ उह्ती च्योक्ताक्आथै। 5 इ येसुइ ङीकायः छ्युङ्ह्आक्तीको ओउःकोः काम् जाङ्ह्साकायः ग्वम् बयःती सबै अरु जात्कोः मान्तालम्कायः येसुकोः कुरा पेतो ङ्हाम्ती ग्याताक्साकायः ल्होक्आताङी। 6 नीङ्कायःमा येसु ख्रीस्कोः कुरा पेतो ङ्हाम्ती ग्याती जाङ्ह्साकायः ओउःइ गोत्तेःआकाय्। 7 लौ उया नीङ् रोमी सहर्हाङः मुओलम्य नीङ्कायःपाय् परमेस्वर्इ राप्ती लयःकोः मान्तालम् स्याव्साकायः गोत्तेःआकाय्। नीङ्कायःपाय् ङाइ द्याह् लेखनेःनाङ्स। ङीकोः परमेस्वर् आपामा ङीकोः प्रभु येसु ख्रीस्इमा नीङ्कायः योनःती योती ल्हुङ् धोमाय्ताक्तेःपै। 8 “ओउःमयःइ परमेस्वर्कोः कुरा आन ङ्हाम्नानी” त दाय्ह्ओ नीङ्कोः कुरा सबै ल्हाव्ह्दैबाङ्कोः मान्तालम्इ चीःनानी। ओउः त झ्यान्ते ङ्हापाय् नीङ् सबैकायः गीलती ङाइ येसु ख्रीस्कोः मय्ङ् पेह्ती परमेस्वर्कायः “च्युता” त तोलेःनाङः। 9 इ ङाइ तोओ कुरापाय् दोङ् कुरा लेःआः त परमेस्वर्इ चीःनौ बा। ओउःकायः ङाइ म्ह्याङ्तो ल्हुङ्इ ओउःकोः चोःकोः पेआ नोःराय् थोल्ह्तो तोओ काम् जाङ्ह्ती मुनाङः। ओहाङःसै नीङ्कायःपाय् ङाइ गलकायःमा दीःमामाःत परमेस्वर्कः तेती तोनेःनाङ्स ओउःत परमेस्वर्इ चीःलेःनौ। 10 ओउःकः तेती तोतोक्हाङः “लौ प्रभुय नाङ् ग्यातेःनाः त खेःया रोमी सहर्हाङः मुओलम्कायः द्याह् क्रुस्लाङ् आल्सा दोःताक्ची दै” त दाय्ह्ती तेलेःनाङः। 11 नीङ्कायः क्रुस्ती योसा आन झाह्लेःनाङः। क्रुस्तोक्हाङः परमेस्वर्कोः ग्वालामःसै दोःओ ग्वम् ङाइ बयःसा खाय्नेःनाङ्स। ओहाङःसैको नीङ् ग्रमःत मुसा खाय्तेःनानी। 12 ओउःत हायःती ङी सबै पेतोलेः स्याव्नाःतय्ही नीङ्कोः पेओ ङ्हाम्ओ ङाइमा योती ङाकोः ङ्हाम्ओ नीङ्इमा योती झ्यान्ते ङी ल्हुङ् धङ्काय्ताक्नाःतय्ही। 13 लौ पुःचोङ् हौचोङ्य नीङ्कायः क्रुस्लाङ् वाङ्सा आन बोङःझुङ्ङोतो वाङ्सापाय् दोःधाङ्ताङःल इत नीङ्इ चीःसा खेःतो। वाङ्आक्तीको अरु थाव्हाङः मुओ यहुदी खेःमालोलम्लो लेखालेः नीङ्कायःमा पेतो स्याव्ताक्सा आन झाक्लेःनाङः। 14 एलेनी मान्तालम्कायःमा एलेनी खेःमालो मान्तालम्कायःमा व्हाय्ओलम्कायःमा व्हाय्मालोलम्कायःमा सबैकायः ङाइ परमेस्वर्कोः पेओ नोःराय् तोसा खेःनाङः। 15 ओउःत झ्यान्ते नीङ् रोमी सहर्हाङः मुओलम्कायःमा ओउः पेओ नोःराय् तोसा आन झाक्लेःनाङः। 16 ओउः पेओ नोःराय्पाय् थोल्ह्ती तोतोक्हाङः ङाइ गत खेःयाकायःमा रास्माःत ङाःतोलेः तोनाङः। ओउः नोःराय्पाय् परमेस्वर्कोः ग्वम् दोःताक्ओ नोःराय् लेःआः दोह् हायःती दाय्ह्सा ङ्हाम्आक्तीको सबै मान्तालम् दल्तो स्याव्नै। ङ्हापाय् यहुदीलम्इ लोने यहुदी खेःमालोलम्इ ङ्हाम्ती दल्तो स्याव्सा खाय्नानी। 17 फेरी ओउः नोःराय्इपाय् मान्तालम् गत हायःती परमेस्वर्कोः मीक्हाङः पेतो नीङ्तो स्याव्सा खाय्नानी त छ्यानःलेःनै। ङ्हाहाङःमा लोनेमा गलकायःमा मान्ताइ ङ्हाम्ओ त खेःया ओउःपाय् नीङ्तोलेः स्याव्ती स्याक्लेःनै दोह् हायःती दाय्ह्सा “सुखेलोइ ङ्हाम्नानी ओउः मान्तापाय् ङ्हाम्धार्नालेः नीङ्तो स्याव्नै” त दाय्ह्ओ परमेस्वर्कोः आखरःहाङः लेखती मुनाः। 18 ओहाङःसैको सुसुखेइ परमेस्वर्कः ग्यामाःत मुती रेव्तो जाङ्ह्ती ओउःकोः दोङ् पेओ कुरा त्याःनानी ओउःमयःकः ओउः लाङ्काहाङः मुओ परमेस्वर् आन ल्हुङ् मल्ह्ती न्युम्ह्ताक्नाःथास। 19 परमेस्वर्कोः दोङ् कुरापाय् ओउः मान्तालम्इ चीःसा खाय्नानी दोह् हायःती दाय्ह्सा ओउःमयःकायः परमेस्वर्इ लयः छ्यानःआथास। ओउःमयः ग्याइली त झ्यान्ते चीःनीली ओउःत खेःओ परमेस्वर्इ न्युम्ह्ताक्नाःथास। 20 ल्हाव्ह्दैबाङ्कोः जापीनःती न्यास्ओ दीन्हाङःसै परमेस्वर्इ जाङ्ह्ओ थोक्लम् च्यवःती मान्तालम्इ ओउःकोः च्यवःसा खाय्मालो गलमा द्योक्मालो ग्वम्लेः चीःसामा खाय्नानी। ओउःपाय् दोङ् ताङ्ह्ओ परमेस्वर् लेःआः त तय्ह्सामा खाय्नानी। ओउः त झ्यान्ते “ङीइ चीःङुसुलु तय्ह्ङुसुलु” त दाय्ह्ओ सुइमा तोसा खाय्नीली। 21 परमेस्वर्कायः मान्तालम्इ तय्ह्सापाय् तय्ह्नीतो ओउःकायः ताङ्ह्ताक्सामा ग्याइली “च्युता” त तोसामा ग्याइली। ग्यामाःत झ्यान्ते ओउःमयःकोः ल्हुङ्तुक्कोः कुरा भाङःती वाय्ओ लेःआः बा ओउःमयःकोः ल्हुङ्पाय् च्याक्तो स्याव्आ। 22 “ङीपाय् व्हाय्ओ लेःआः ङी” त दाय्ह्ती लुङ्ती तोइसीतो खेःल ओउःमयःपाय् जुगाङ् व्हाय्मालो लेःआः बा। 23 ओउः गलकायःमा सीमालो परमेस्वर्कायः ताङ्ह्ताक्माःत ओउःमयःइ सीसा खेःओ मान्ताकोः रुप् जाङ्ह्ओ मुर्तीकायःमा पुजा जाङ्ह्आकानी जाःलम् वाःलम् ङाःलम्लो लेखा जाङ्ह्ओ मुर्तीलम्कायःमा पुजा जाङ्ह्आकानी बा। 24 मान्तालम्इ ओउःतलेः भाङःती वाय्ओ काम्लम् जाङ्ह्ती झ्यान्ते ओउःमयःकोः ल्हुङ्इ मोह्हाय्ओ रेव्ओ कुरा जाङ्ह्साकायःलेः परमेस्वर्इ “लौ रेव्तेःपै” त दाय्ह्ती फेआथास। ओहाङःसैको ओउः मान्तालम् लयःमयःकुस् आन अह्र्सीःओ काम् जाङ्ह्काय्आकाय्। 25 परमेस्वर्कोः दोङ् पेओ कुराखे फेती ओउःमयःइ माःओ कुराखे ङ्हाम्आकानी। ओउः सबै जाङ्ह्ओ गलकायःमा ताङ्ह्ताक्सा खेःओ परमेस्वर्खेकायः मानओ खेःल ओउःइ जाङ्ह्ओ थोक्लम्खेकायः ताङ्ह्ताक्तीलेः पुजा जाङ्ह्माआकानी। 26 ओउःत खेःओ ओउःमयःइ लयः मोह्हाय्ओ रेव्ओ काम् जाङ्ह्साकायः परमेस्वर्इ फेआथास। ओहाङःसैको मोमःचोःलम् लयःकोः गोय्चोःकुस् एनःओ फेती अरु मोमःचोः गोय्चोःकुस् जुगाङ् रेव्तो ल्हास्या काम् जाङ्ह्आकानी। 27 गोय्चोःलम्इमा ओउःतलेः लयःकोः मोमःचोःकायः फेती अरु गोय्चोःकायः मोह्हाय्ती ओउःकुस् आन रेव्ओ काम् जाङ्ह्आकानी ओउःत झ्यान्ते ओउः मान्तालम्पाय् लयःकोः आङ्हाङः न्युम्ह्तोलेः स्याव्आकाय्। 28 ओहाङःसै ओउः मान्तालम्इ परमेस्वर्कोः कुरापाय् ल्हुङ्हाङः सेती गम्सा ग्याइली त झ्यान्ते परमेस्वर्इ “लौ ओउःमयः ल्हुङ्तुक्हाङः रेव्पै” त दाय्ह्ती ओउःमयःइ रेव्ओ काम् जाङ्ह्साकायः फेआथास। 29 ओउःतलेः ओउःमयःइ जुगाङ् रेव्ओ ल्हुङ् स्याव्आकाय्। ओउःमयःकोः ल्हुङ् लओ ल्हुङ् अरुकायः सात्सा ल्हुङ् अरुकुस् कायःकाय्ती ओउःमयःकायः पेमालो हायःसा बोङःओ ल्हुङ् स्याव्आकाय्। 30 अरुकायः माःती गाल्तुम्ती तोनानी परमेस्वर्कः ग्यामाःत लयःकोः नेह्रो ओर्ताक्नाःइसी। गलकायःमा रेव्ओ काम् जाङ्ह्सा बोङःनानी लयःकोः आमा आपाइ तोओ कुरा सायःसा ग्याइली। 31 जुगाङ् चीःमालो स्याव्ती ओउःमयःइ ङ्हा तोओ कुरा लोने दोह्मा जाङ्ह्नीली अरुलम्कायः राप्मामाःत दोह्तमा म्हर्मामाःत गलमा योनःती योनीली। 32 एत हायःओलम्कायःपाय् “मीह्ती ह्र्योक्ती वाय्सा खेःतो” त परमेस्वर्इ तोउतो ओउःत तोओ इ रेव्ओ मान्तालम्इ चीःसापाय् चीःआकानी रेव्ओ काम् लयः फेमाःत मुनै अरु रेव्तो जाङ्ह्ओलम्कायः लुङ्तीलेः तोनानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.