प्रकाश 9 - चेपाङ1 ओहाङःसैको यात्चाक् अरु ल्होक्ओमयःइ ओउःकोः तुरही मुत्आकान्। ओउःकुस् पास् ल्होक्ओमयःइ मुत्आकानी। मुत्आक्तीको ङाइ योती यात्ज्योः फेल्बाङ्सै साःताङ् ग्लेःओ कार् च्यवःआलाङः। ओउः कार्कायः कामःअ नालाकोः सान्चो बयःओ खेःतो। 2 सान्चो बयःआक्तीको ओउः कार्इ कामःअ नालाकोः धोका फोल्आकान्। फोल्आक्तीको आह्र् आह्र् त ताङ्ह्ओ म्हेःलो लेखालेः ओउः घाङ्सै आन म्हेःकुः ग्ल्युङ्ह्आ। घाङ्सै ग्ल्युङ्ह्तोक्हाङः ओउः म्हेःकुःइ न्याम् घमःती न्याम्मा फेल्बाङ्मा च्याक्ताक्आकान्। 3 ओहाङःसैको ओउः म्हेःकुःसै राय्क्न्यामः साःताङ् ग्लेःआकाय्। ओउःमयःकायः नेःकोस्कोः नेःसा ग्वम् बयःओ लेःआः। 4 “ओन्लम् सीङःलम् झ्युर्लम्कायः दोह्मा रेव्तो हायःताक्लाम् परमेस्वर्कोः छ्यानःसा छाप् जेल्ह्हाङः लावमालो मान्तालम्कायः ह रेव्तो हायःसा स्याव्लेःनाः” त दाय्ह्ती ओउः राय्क्न्यामःकोः खाल्कायः तोओ खेःतो। 5 फेरी “ओउः छाप् लावमालो मान्तालम्कायः जुगाङ् सात्सा खेःल पास् महीनाच्युक्कायः नेःकोस्इ नेःओलो लेखालेः जीक्ताक्ती न्युम्ह्ताक्सा ह” त दाय्ह्ती ओउःमयःकायः हुकुम्कोः कुरामा बयःओ खेःतो। 6 ओउः पास् महीनाकायः ओउः मान्तालम्इपाय् ओउःच्युक् जीक्ती झ्यान्ते “सीपाङः” त दाय्ह्ती सीसा झाक्ती बोङःनीतो सीसापाय् दोःइली। 7 ओउः राय्क्न्यामःपाय् सीपाहीकोः मीन्ह्काय्सा र्ययःती गम्ओ घोरालो लेखालेः खेःतो। ओउःमयःकोः तालाङ्हाङः सुन्कोः मुकुत्लो लेखलेः ल्हुप्इसीतो ओउःमयःकोः खेन्पाय् मान्तालो लेखा खेःतो। 8 ओउःमयःकोः म्याङ्पाय् मोमःचोःलो लेखालेः सय्क्पाय् माजाःलो लेखालेः खेःतो। 9 खोस्हाङः फालाम्कोः धाल्लो लेखालेः लावइसीतो ओउःमयःकोः पाप् क्वेल्ह्ती रायःओपाय् नाःतो मीन्ह्काय्लाङ् जोक्तो वाह्सा घोराइ ह्र्युत्ओ राथ्कोः रायःओलो लेखा खेःतो। 10 नेःकोस्लो लेखालेः ओउःमयः नेःसाकायः मेः नाःनै। मेःइ नेःओइ मान्तालम्कायः पास् महीनाकायः जीक्ताक्सालेः खाय्नानी। 11 ओउःमयःकोः राजापाय् कामःअ नालाकोः ल्होक्ओमयःलेः। हेब्रैनी भासाहाङः ओउः राजापाय् “अबादोन्” एलेनी भासाहाङः “अपोलीयोन्” त तोओलेः ओउः मय्ङ्कोः मानेपाय् “ह्र्योङःती वाय्ताक्ओ लेःआः” त तोओलेः। 12 इत हायःतीलेः ओउः ङ्हाकोः रेव्ओ बेलाहाङः द्योक्ती ज्याल्आ अरु नीस्ज्योः रेव्ओ बेलापाय् वाङ्धै मुनाः। 13 ओहाङःसैको यात्चाक् अरु ल्होक्ओमयःइ ओउःकोः तुरही मुत्आकान् ओउःकुस् छ ल्होक्ओमयःइ मुत्आकानी। मुत्आक्तीको परमेस्वर्कोः मीक्हाङः मुओ सुन्कोः बेदीकोः चार् चोङ्कोः रोङःसै हाव्नयः सायःआलाङः 14 “लौ ताङ्ह्ओ युफ्रातेस् त तोओ मातीःहाङः पानःती गम्ओ चार् ल्होक्ओमयःकायः फास्ती फेन्उ दा” त दाय्ह्ओ ओउः मेस्लोहाङः तुरही मुत्ओ ल्होक्ओमयःकायः तोओ खेःतो। 15 ओउः चार् ल्होक्ओमयःपाय् इ बर्सकायः इ महीनाकायः इ दीन्कोः दोङ् क्रोःओ बेलाहाङःकायः पानःती गम्ओ खेःइतो। ओहाङःसैको इ बेलाहाङःपाय् ओउःमयःपाय् सबै मान्तालम्कोःपाय् सुम् भाक्कायः यातै भाक् सात्साकायः फेन्ती ल्होक्ओ खेःइतो। 16 ओहाङः “बीस् क्रोद घोरा लन्ह्ओ सीपाहीलम् मुनाः” त दाय्ह्ओ ङाकायः तोओ खेःतो। 17 ओहाङःसैको ङाइ माङःखा योती ओउः घोरालम्मा घोरा लन्ह्ओलम्पाय् इत च्यवःआलाङः। ओउः सीपाहीपाय् खोस्हाङः म्हेःलो दुओमा फेल्बाङ्लो प्लीओमा तुमःकोः ङ्हालःलो यार्ओ धाल् लावइसीतो ओउःमयःकोः घोरालम्कोः तालाङ्पाय् माजाःकोः तालाङ्लो लेखा खेःतो म्होतोङ्सै म्हेःमा म्हेःकुःमा गन्धक्मा ग्ल्युङ्ह्ओ खेःतो। 18 ओउः सुम् रेव्तो महामारी स्याव्ताक्ओइपाय् ओउः म्होतोङ्सै ग्ल्युङ्ह्ओ म्हेःइमा म्हेःकुःइमा गन्धक्इमा मान्तालम्कोः सुम् भाक्कायः यातै भाक् सात्आथास। 19 ओउः घोराकोः सात्सा ग्वम्पाय् म्होतोङ्हाङःमा मुलेःनाः मेःहाङःमा मुलेःनाः। ओउःमयःकोः मेःपाय् रुकोः तालाङ्लो लेखालेः मुनाः मेःइलेः मान्ताकायः आन रेव्तो हायःनाःथास। 20 ओहाङःसैको ओउः अरु सात्आक्मालो मान्तालम्खेइपाय् लयः जाङ्ह्ओ थोक्लम्कायः मनःसाकायः फेनीली। लान्लम् मानसामा फेनीली सुन् चान्दी पीताल् बाङ्कोःमा सीङःकोःमा च्यवःसा सायःसा वाह्सा खाय्मालो मुर्तीकायः मानसाकायःमा फेनीली। 21 ओउःमयःइ रेव्तो हायःओपाय् अरु मान्तालम्कायः सात्ओमा झ्याओमा ल्हास्या जाङ्ह्ओ कुःओ काम्लम्कायः फेसा ग्याइली। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.