प्रकाश 8 - चेपाङ1 ओहाङःसैको ओउःत तोआक्तीको ओउः भेदाकोः चोःइपाय् ओउः सोय्ह्ती दप्ओ छाप् तेत्आकान्। ओउःकुस्लेः सात् छाप् तेत्ओ खेःतो। तेत्आक्तीको लाङ्काहाङः आधा घन्ताच्युक्कायः जुगाङ् चीङःचाङःत स्याव्ओ खेःतो। 2 ओहाङःसैको ङाइ योती ओउः परमेस्वर्कोः मीक्हाङः मुओ सात् ल्होक्ओमयःकायःपाय् सात् तुरही बयःओ च्यवःआलाङः। 3 ओहाङःसैको यात्चाक् अरु ल्होक्ओमयः सुन्कोः धुप् लात्सा तेव्केरा लात्ती ओउः बेदीताङ् वाङ्आक्तीको ओहाङः चीङ्ती मुओ खेःइतो। ओउः बेदीकोः सुन्कोः खात्पाय् ओउः राजा च्युङःसा थाव्कोः खोस्हाङः मुओ खेःतो। ओहाङःपाय् परमेस्वर्कायः ङ्हाम्ओलम्इ तेती तोओ कुरालेः परमेस्वर्कायः ल्हाओ खेःतो। ओहाङःसैको ओउःमयःकोः तेती तोओ कुरा पाःती ल्हासाकायः ओउः ल्होक्ओमयःकायः नाःतो धुप् उलःती बयःओ खेःतो। 4 ओउः परमेस्वर्कोः मीक्हाङः चीङ्ओ ल्होक्ओमयःइ क्रुत्इ ल्हाआक्तीको ङ्हाम्ओलम्इ तेती तोओ कुराकुस् ओउः धुप्पाय् कुःती लन्ह्आ। 5 धुप् ल्हाआक्तीको ओउः ल्होक्ओमयःइ ओउः धुप् लात्सा तेव्केरा रोत्ती ओउः तेव्केराहाङः बेदीकोः म्हेः ब्लीङ्तोलेः काआकान्। म्हेः काआक्तीको ओउःइ ल्हाव्ह्दैबाङ्ताङ् तेव्केरा क्लाःआकान्। क्लाःआक्तीको न्याम् मुक्ओमा प्लीङ्ह्ओमा ल्याङ् वाङ्माआ। 6 ओहाङःसैको ओउः सात्चाक् तुरही लात्ओ ल्होक्ओमयः तुरही मुत्साकायः चीङ्आकाय्। 7 ओउः ङ्हाकोः ल्होक्ओमयःइ ओउःकोः तुरही मुत्आकान्। मुत्आक्तीको ल्हाव्ह्दैबाङ्हाङः वयःकुस्इ ल्याव्ह्ओ वेर्मा म्हेःमा साःताङ् क्लाःओ खेःतो। ल्हाव्ह्दैबाङ्कोःमा सीङःकोःमा सुम् भाक्कायः यातै भाक् जाङ्ह्तीलेः म्हेःइ झम्ह्ती माक्ओ खेःतो ओन्लम्कायः सबै म्हेःइ झम्ह्ती माक्ओ खेःतो। 8 ओहाङःसैको यात्चाक् अरु ल्होक्ओमयःइ चीङ्ती ओउःकोः तुरही मुत्आकान्। मुत्आक्तीको म्हेः ल्युङ्ओ ताङ्ह्ओ बुम्लो लेखा च्यवःआलाङः। ओउः बुम्पाय् द्युम्मालो तीःहाङः क्लाःओ खेःतो। ओहाङः क्लाःआक्तीको द्युम्मालो तीःकोः सुम् भाक्कायः यातै भाक् वयः स्याव्आ। 9 ओउः तीःकोः ङाःलम् दोह्लम्कोः तीन् भाक्कायः यातै भाक् सीलेःआ। तीः जहास्कोःमा सुम् भाक्कायः यातै भाक्लेः ज्युप्ती वाय्ओ खेःतो। 10 ओहाङःसैको यात्चाक् अरु ल्होक्ओमयःइ ओउःकोः तुरही मुत्आकान्। मुत्आक्तीको चेर्कोः मेःलो लेखा यात्ज्योः ताङ्ह्ओ ल्युङ्ती मुओ कार्लेः फेल्बाङ्सै ग्लेःतीमा तीःलम्कोःमा तीःकावःराङ्कोःमा सुम् भाक्कायः यातै भाक्कायः ङायःआकान् 11 ओउः कार्पाय् “तीतेपती” त मय्ङ्ओ खेःतो। ओहाङःसैको तीःलम्कोः सुम् भाक्कायः यातै भाक्लेः आन य्हाक्तो स्याव्आ। ओउः य्हाक्ओ तीः तुङ्ती झ्यान्ते नाःतो मान्तालम् सीआकाय्। 12 ओहाङःसैको यात्चाक् अरु ल्होक्ओमयःइ ओउःकोः तुरही मुत्आकान्। मुत्आक्तीको न्याम्कोःमा लाह्कोःमा कार्लम्कोःमा सुम् भाक्कायः यातै भाक् च्याक्तो स्याव्ओ। न्हीदीङ्हाङःमा याह्दीङ्हाङःमा चार् घन्ताकायः च्याक्ओ खेःतो दोह्मा थोङ्ल। 13 ओहाङःसैको ङाइ योतोक्हाङः अलवःहाङः स्युङ्ओ मुवाः सोतोलेः गोःओ सायःआलाङः “रेव्तोलेः रेव्तोलेः रेव्तोलेः स्याव्नाः। ओउः अरु सुम् ल्होक्ओमयःइ तुरही मुत्ओ बेलाहाङः ल्हाव्ह्दैबाङ्कोः सबै मान्तालम्कायः गुच्युक् रेव्तो स्याव्लेःनाः” त दाय्ह्ती ओउः मुवाः दाय्ह्अ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.