प्रकाश 7 - चेपाङ1 ओहाङःसैको योती चार् लाङ्कासै ल्होक्ओमयः च्यवःआलाङः। ओउःमयःपाय् ल्हाव्ह्दैबाङ्कोः चार् दोवाकोः मारुः वाङ्ताक्मासाकायः मुओ खेःइतो ओउःत झ्यान्ते साःहाङःमा द्युम्मालो तीःहाङःमा सबै सीङःहाङःमा मारुः वाङ्सा दोःल। 2 ओहाङःसैको यात्चाक् अरु ल्होक्ओमयः च्यवःआलाङः। ओउःपाय् ओउः जीङः नाःओ परमेस्वर्कोः छाप् लात्ती दाह्न्याम्सै लन्ह्ती वाङ्आ। ओउःपाय् ओउः चार् दोवाहाङः मुओ ल्हाव्ह्दैबाङ्कायःमा द्युम्मालो तीःकायःमा वाय्सा ग्वम् दोःओ ल्होक्ओमयःकायःपाय् सोतोलेः गोःआथास। 3 “लौ ङीकोः परमेस्वर्कोः काम् जाङ्ह्ओलम्कायः इत छ्यान्ह्सा छाप् जेल्ह्हाङः गम्धाङ्माच्युक्कायः ल्हाव्ह्दैबाङ्कायःमा द्युम्मालो तीःकायःमा सीङःकायःमा दोह्मा पेमालो स्याव्ताक्लाम्” त दाय्ह्ती तोआथास। 4 ओहाङःसैको परमेस्वर्कोः छाप् दोःओलम्पाय् “इच्युक् नाःतोलेः” त दाय्ह्ओ सायःआलाङः। इस्राएल्कोः सबै खलक्सै यात् लाख् चवालीस् हजार्पाय् छाप् दोःओलम् खेःइतो। 5 यहुदा खलक्कोः बार हजार् रुबेन्सै बार हजार् गादकोः बार हजार् 6 आसेर्कोः बार हजार् नाप्तालीकोः बार हजार् मनासेह्कोः बार हजार् 7 सीमीयोन्कोः बार हजार् लेवीकोः बार हजार् इसाकर्कोः बार हजार् 8 जेबुलुन्कोः बार हजार् युसेफ्कोः बार हजार् बेन्यामीन्कोः बार हजार् खेःइतो। 9 ओहाङःसैको ङाइ योती आन नाःतो हुम्ओ मान्तालम् च्यवःआलाङः। ओउःच्युक् नाःतोलेः सुइमा थेङ्सा खाय्नीली। ओउःमयः सबै जात्सै सबै खलक्सै सबै देस्सै सबै भासासै वाङ्ती ओउः राजा च्युङःसा थाव्कोः ङ्हासैमा ओउः भेदाकोः चोःकोः मीक्हाङःमा चीङ्ती मुओ खेःइतो। ओउःमयःपाय् भाम्ओ क्रमःनाय् लावइसीतो क्रुत्हाङः ल्ह्यय्ओ सीङःकोः मात् चुम्आकानी। 10 इत मुतोक्हाङः “लौ ङीकायः दल्ताक्ओनीस्पाय् ङीकोः राजाकोः थाव्हाङः च्युङःओ परमेस्वर्मा ओउः भेदाकोः चोःमा ओउःनीस् लेःआः च” त दाय्ह्ती ओउः आन नाःतो हुम्ओलम् सोतोलेः दाय्ह्आकाय्। 11 ओउः नोःओलम् ओउःत दाय्ह्तोक्हाङः सबै ल्होक्ओमयःपाय् ओउः राजाकोः थाव्कायःमा थालवःपालम्कायःमा चार् जीङः नाःओमयःकायःमा तोङःतीलेः चीङ्ती मुओ खेःइतो। ओहाङःसैको ओउः नाःतो हुम्ओलम् दाय्ह्आक्तीको ओउः ल्होक्ओमयःइ राजाकोः थाव्कःताङ् बाःती स्यवती परमेस्वर्कायः मनःआकानी। 12 “ओउःतलेः स्याव्पाः दै। ङीकोः सबै ग्वम् नाःओ सबैसै व्हाय्ओ परमेस्वर्कायः मनःतीमा लुङ्तीमा ताङ्ह्ताक्तीमा ‘च्युता’ त गलकायःमा तोती ल्हापाःथै। ओउःतलेः स्याव्पाः” त दाय्ह्ती परमेस्वर्कायः ताङ्ह्ताक्ती तोआथै। 13 ओहाङःसैको “लौ इमयः भाम्ओ नाय् लावओलम्पाय् सुलो खेःनै गाःसै वाङ्ओलेः” त दाय्ह्ती यात्चाक् थालवःपाइ व्हत्ताङःतो 14 “अ प्रभुय ङाखेइ खेःल नाङ्खेइलेःतेः चीःतेःनौ” त दाय्ह्ती त्याङ्आलाङः। “लौ इमयःपाय् ओउः आन लीह्सीःओ बेलाहाङःसै दल्ती वाङ्आकाय्। ओउःमयःकोः नाय्लम् भेदाकोः चोःकोः वयःइ धावःती भाम्ताक्आकानी। 15 ओउःत झ्यान्ते ओउःमयःपाय् परमेस्वर्कोः राजा च्युङःसा थाव्हाङः मुनै। आने ओउःमयःइ परमेस्वर्कोः मन्दीर्हाङः न्हीदीङ्मा याह्दीङ्मा ओउःकायः काम् जाङ्ह्धैलेः मुनै। ओहाङःसैको ओउः राजाकोः थाव्हाङः च्युङःओ परमेस्वर्इपाय् ओउःमयःकायः क्रुप्नाःथास। 16 क्रुप्तोक्हाङः ओउःमयःपाय् गलकायःमा योङ्क्राय्माइली तीः अप्माइली न्याम्इमा दोह्इमा गलमा रावःथासल। 17 दोह् हायःती दाय्ह्सा ओउः राजाकोः थाव्कोः माझहाङः मुओ भेदाकोः चोःइपाय् ओउःमयःकायः ह्रामःओ मान्तालो लेखालेः स्याव्नाः। ओउःमयःकायः ओउःइ जीङः बयःसा तीः कावःराङ्ताङ् दाक्नाःथास। ओहाङःसैको क्रेस्ती र्याःतोक्हाङः परमेस्वर्इलेः ओउःमयःकोः मीक्क्लीः सबै थ्युर्नाःथास” त दाय्ह्ती ओउः थालवःपाइ छ्यानःती तोआताङः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.