प्रकाश 6 - चेपाङ1 ओहाङःसैको ङा योतोक्हाङः ओउः भेदाकोः चोः त तोओइ ओउः सात्गोता छाप्कोःपाय् यातैज्योः ङ्हाकोः छाप् तेत्आकान्। छाप् तेत्आक्तीको यात्ज्योः जीङः नाःओमयःइपाय् सोतो मुक्ओ हाव्नयःइलेः “वाङ्अ” त दाय्ह्ती तोआकान्। 2 ओउःत तोतोक्हाङः ङाइ योती यात्ज्योः भाम्ओ घोरा च्यवःआलाङः। ओउः घोराकोः गीङ्हाङः लन्ह्ती वाह्ओचाक्पाय् लाःलुयः लात्ओ खेःतो ओउःकायःपाय् मुकुत् बयःओ खेःतो। बयःआक्तीको ओउःपाय् अरुकायः क्लीमःओचाक्लो लेखालेः अरुकायः क्लीमःलाङ् आल्आ। 3 ओउः घोरा लन्ह्ओचाक्पाय् आल्आक्तीको ओउः भेदाकोः चोःइपाय् यात्ज्योः अरु छाप् तेत्आकान्। ओउः तेत्आक्तीको यात्ज्योः अरु जीङः नाःओमयःइपाय् “वाङ्अ” त दाय्ह्ती तोआकान्। 4 ओउःत तोआक्तीको यात्ज्योः अरु जीम्तो दुओ घोरा वाङ्आ। ओउःकोः गीङ्हाङः लन्ह्ओचाक्कायः ल्हाव्ह्दैबाङ्कोः मान्तालम्कायः मीन्ह्काय्ताक्सा सात्काय्ताक्सा ग्वम्मा बयःओ खेःतो ओउःकायः यात्ज्योः ताङ्ह्ओ तरवाल्मा बयःओ खेःतो। 5 ओहाङःसैको ओउः भेदाकोः चोःइपाय् यात्ज्योः अरु छाप् तेत्आकान्। ओउः छाप् तेत्आक्तीको यात्ज्योः अरु जीङः नाःओमयःइपाय् “वाङ्अ” त दाय्ह्ती तोआकान्। ओउःत तोआक्तीको ङाइ योती यात्ज्योः गाल्ओ घोरा च्यवःआलाङः। ओउःकोः गीङ्हाङः लन्ह्ती वाह्ओचाक्इपाय् क्रुत्हाङः लाङ्साकायः तुलो लात्आकान्। 6 ओहाङःसैको ओउः चार् जीङः नाःओलम्कःसै दाय्ह्ओ हाव्नयःलो सायःआलाङः “लौ यात् दीन्कोः काम् जाङ्ह्झ्याङ्कायः यात् माना गहुङ् बयःसा यात् दीन्कोः सुम् माना जौ बयःसा स्याव्नाः। जैथुन् सायःकोः सातीमा धाक्सायःकोः तीःकायःमा छीःताक्लाम्” त दाय्ह्ती दाय्ह्ओआः। 7 ओउःत दाय्ह्आक्तीको ओउः भेदाकोः चोःइपाय् यात्ज्योः अरु छाप् तेत्आकान्। ओउःकुस् चार्गोता छाप् तेत्ओ खेःतो। ओउः छाप् तेत्आक्तीको ओउः लोनेकोः जीङः नाःओमयःइपाय् “वाङ्अ” त दाय्ह्ती तोआकान्। 8 ओउःत तोआक्तीको ङाइ योती यात्ज्योः क्लीप्ती भाम्गार्ओ घोरा च्यवःआलाङः। ओउःकोः गीङ्हाङः लन्ह्ओचाक्पाय् “सीताक्मयः” त तोओ लेःआः। ओउःकोः लोन्ताङ् “गोबाङ्” त तोओ द्याङ्तोलेः गुल्ह्ती वाह्आ। ओउः नीस्कायःपाय् ल्हाव्ह्दैबाङ्कोः चार् भाक्कोः यातै भाक्हाङः आन तरवाल्इ सात्ताक्सा राव्ओ वाङ्ताक्सा ग्वम्मा बयःओ लेःआः। मीन्ह्काय्ओ अनीकाल् राव्ओ पीर् राव्ओ जाः राव्ओ वाङ्ताक्सालेः ग्वम्मा बयःओ खेःतो। 9 ओहाङःसैको ओउः भेदाकोः चोःइपाय् यातैज्योः अरु छाप् तेत्आकान् ओउःकुस् पास्गोता छाप् तेत्ओ खेःतो। ओउः छाप् तेत्आक्तीको ङाइ योती परमेस्वर्कोः नोःराय् थोल्ह्ती तोसाकायःमा पेतो छ्यानःओकायःमा सात्ओलम्कोः रुआङ्लम्लेः परमेस्वर्कायः ल्हासा बेदीकोः खात् ताल्गेसै च्यवःआलाङः। 10 ओउःमयः सोतोलेः “अ नाङ् दोङ् छय्ङ्तोलेः मुओ प्रभु परमेस्वर्य ल्हाव्ह्दैबाङ्कोः मान्तालम्कायः तय्छनःती योसा दीन्पाय् गल वाङ्नाः। ङीकायः सात्ओलम्कायः न्युम्ह्ताक्सा गुच्युक् ज्याङःतोहाङः स्याव्नाः” त दाय्ह्ती दाय्ह्आकाय्। 11 ओउःत दाय्ह्आक्तीको ओउःमयःपाय् लःलयः जोक्कायः यायाःज्योः भाम्ओ क्रमःनाय् बयःओ खेःतो “लौ ओउः नीङ्लो लेखा सात्तोलेः स्याव्सा खेःओ नीङ्कुस् काम् जाङ्ह्ओ साथीलम्मा हौलम्मा ओउःमयःकोः नम्बर् दाह्धाङ्मालो बेलाहाङःच्युक्कायः ल्हुङ् धोमाय्तोलेः ल्युङ्ह्ती मुआक्न” त दाय्ह्ती तोओमा खेःतो। 12 ओहाङःसैको ङाइ योधै मुतोक्हाङः ओउः भेदाकोः चोःइपाय् यात्ज्योः अरु छाप् तेत्आकान्। ओउःकुस् छगोता छाप् तेत्ओलेः खेःतो। ओहाङःसैको तेत्आक्तीको ताङ्ह्ओ ल्याङ्मा वाङ्आ न्याम्मा गाल्ओ ग्रान्नाय्लो लेखालेः च्याक्तो स्याव्आ लाह्मा वयःलो लेखालेः दुतो स्याव्आ। 13 ओहाङःसैको कार्लम्मा मारुःइ रह्ताक्ओ सायःलो लेखालेः फेल्बाङ्सै साःताङ् ग्लेःआकाय्। 14 फेल्बाङ्मा लावःलो लेखालेः तुलःती खुम्ओ खेःतो स्यालुङ्लम्मा तीःइ पान्ओ देस्लम्मा सबै लोय्ओ खेःतो। 15 ओहाङःसैको एत स्याव्आक्तीको ल्हाव्ह्दैबाङ्कोः राजालम् हुकुम् बयःओलम् सीपाहीकोः ताङ्ह्ओ मान्तालम् साहुलम् ताङ्ह्ओ मान्तालम् सबै नोकरीलम्मा नोकरी खेःमालोलम्मा स्यालुङ्हाङः मुओ ल्युमःपुक्हाङःमा नुक्आकाय् ओहाङःकोः घाङ्हाङःमा नुक्आकाय्। 16 ओहाङः नुक्तोक्हाङः ओउःमयःइ स्यालुङ्कायःमा बाङ्कायःमा “लौ ङीकायः क्लीमःती ओउः राजाकोः थाव्हाङः च्युङःओचाक्कोः मीक्सै फय्ताक्ताङी। ओउः भेदाकोः चोःकोः ल्हुङ् मल्ह्ओसै नुस्ताङी। 17 दोह् हायःती दाय्ह्सा ओउःनीस्कोः ल्हुङ् मल्ह्ओ ताङ्ह्ओ दीन्पाय् दाह्ओआः बा। सुइमा पेतो मुसा खाय्चौ र” त दाय्ह्ती गोःती तोनानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.