प्रकाश 5 - चेपाङ1 ओहाङःसैको ओउः राजाकोः थाव्हाङः च्युङःओचाक्कोः ङोय् क्रुत्हाङः तुलःती गम्ओ कागत्कोः थुरी च्यवःआलाङः। ओउः कागत्पाय् खोस्सैमा काह्सैमा लेखओ खेःतो सात्गोता मोहर् छाप्इ पानःओ खेःतो। 2 ओहाङःसैको यात्चाक् ताङ्ह्ओ ल्होक्ओमयःकायः च्यवःआलाङः “लौ छाप् तेत्ती इ कागत् खीह्ती फास्साकायः सुखेलो ज्योलेःनाः” त दाय्ह्ती ओउः ल्होक्ओमयः सोतोलेः व्हत्आकान्। 3 ओउःत दाय्ह्तो लाङ्काहाङःमा ल्हाव्ह्दैबाङ्हाङः नालाहाङःमा ओउः कागत् फास्ती योसाकायः ज्योओचाक्पाय् सुमा नाःल। 4 ओउः कागत् फास्ती योसाकायः ज्योओचाक्पाय् गाःहाङःमा च्यवःल त झ्यान्ते ङा आन लीह्ती र्याःआलाङः। 5 ङा ओउःत र्याःतोक्हाङः थालवःपाकोः यात्चाक्इ ङाकायः ल्हेःती “लौ ताः ताः र्याःअल। योउ दा दावुद्कोः ताङ्ह्ओ प्लोमःदाने यहुदा खलक्कोः माजाः त तोओइ रेव्ओकायः सबै क्लीमःआकान्। ओउःइपाय् ओउः कागत्कोः सात्गोता छाप्लम् तेत्ती फास्सा खाय्लेःनौ” त दाय्ह्ती तोआताङः। 6 ओउःत तोआक्तीको ङाइ योती यात्ज्योः भेदा मेत्छ्याःकोः चोः ओउः राजा च्युङःसा थाव्कोः माझहाङः सात्गार्ओ लेखा च्यवःआलाङः। ओउःकायः तोङःती ओउः चार् जीङः नाःओलम्मा ओउः चौबीस् थालवःपालम्मा मुओ खेःतो। ओउः भेदामेत्छ्याःकोः चोःपाय् सात्गोता रोङःमा सात्गोता मीक् नाःओ खेःतो। ओउःकोः सात्गोता मीक्पाय् ओउः ल्हाव्ह्दैबाङ्हाङः तीक्ती वाह्साकायः ल्होक्ओ परमेस्वर्कोः सात् ग्वालामः लेःआः इ। 7 ओउः भेदा मेत्छ्याःकोः चोःपाय् वाङ्ती ओउः कागत्कोः थुरीलेः राजाकोः थाव्हाङः च्युङःओ चाक्कोः ङोय् क्रुत्सै त्याक्आकान्। 8 ओउःत त्याक्आक्तीको ओउः चार्गोता जीङः नाःओलम्मा ओउः चौबीस् थालवःपालम्मा ओउःकःताङ् बाःती स्यवआकानी। ओउःमयःपाय् क्रुत्क्रुत्हाङः याःआःज्योः वरनीमा धुप् लात्साकायः सुन्कोः लोतामा धुप् ब्लीङ्तोलेः लात्आकानी। ओउः धुप्पाय् ङ्हाम्ओलम्इ परमेस्वर्कायः तेती तोओ कुरा लेःआः। 9 ओहाङःसैको नया गीत् मेती “लौ ओउः थुरी त्याक्ती छाप् तेत्ती फास्साकायः नाङ्लेःतेः ज्योतेःनाः दोह् हायःती दाय्ह्सा नाङ्पाय् सात्ओलेः खेःतेःतो। नाङ्कोः वयःइ परमेस्वर्कायः सबै खलक् भासा देस् जात्लम्कोः मान्तालम् ल्हाङ्ती लेःतेःआकान्। 10 परमेस्वर्कोः काम् जाङ्ह्साकायः ओउः मान्तालम्कायःपाय् राजीकोः मान्तालम्मा पुरोहीत्लम्मा स्याव्ताक्तेःआकान्। ओउःमयः ल्हाव्ह्दैबाङ्कोः हुकुम् बयःओमयः स्याव्लेःनै” त दाय्ह्ती ओउः थालवःपा दाय्ह्नै। 11 ओहाङःसैको ङा फेरीलेः योती आन नाःतो ल्होक्ओमयःलम्कोः मेओ हाव्नयः सायःआलाङः। ओउःमयः लाख्कोः लाख् नाःतोलेः स्याव्ती ओउः राजा च्युङःसा थाव्मा ओउः चार् जीङः नाःओलम्मा ओउः चौबीस् थालवःपालम्मा सबैकायः तोङःतीलेः 12 आन सोतोलेः मेआकाय् “लौ ओउः सात्ओ भेदाकोः चोःपाय् ग्वम्मा गह्र्मा व्हाय्ओ म्हुक्ओ मनःओमा ताङ्ह्ताक्ओ लुङ्ती नोःओमा ल्हासा स्याव्ओचाक् लेःआः बा” त दाय्ह्ती मेलेःआकाय्। 13 ओहाङःसैको लाङ्काहाङःमा ल्हाव्ह्दैबाङ्हाङःमा नालाहाङःमा द्युम्मालो तीःहाङःमा सबै जीङः नाःओलम्पाय् मेती “लौ ओउः राजाकोः थाव्हाङः मुओचाक्कायःमा ओउः भेदाकोः चोःकायःमा ओउः सबैसै ग्वम् नाःओ नीस्चाक्कायः सबै लुङ्ती तोसामा मानसामा ताङ्ह्ताक्सामा गलकायःमा ल्हापाःथाच” त दाय्ह्ती मेओ सायःआलाङः। 14 ओहाङःसैको ओउः चार् जीङः नाःओलम्पाय् “ओउःतलेः स्याव्पाः” त दाय्ह्ती त्याङ्आकाय्। फेरीलेः ओउः चौबीस् थालवःपाइ बाःती ओउः नीस्कायः ताङ्ह्ताक्आथाच। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.