प्रकाश 4 - चेपाङ1 ओहाङःसैको ङाकायः ओउःत तोआक्तीको ङाइ फेरीलेः माङःखाहाङः योती त्यावःअ लाङ्काहाङः फोल्ओ धोका च्यवःआलाङः। ओहाङःसैको ङाइ ङ्हा सायःओ तुरहीलो लेखा सोतो हाव्नयः फेरीलेः दाय्ह्ती “लौ इहाङः त्यावःअ लन्ह्ती वाङ्अ ओहाङःसै ङाइ लोनेः स्याव्सा कुरा छ्यानःनेःनाङ्” त दाय्ह्ती तोआताङः। 2 ओउःत तोओ कुस्ब्रक्तलेः परमेस्वर्कोः ग्वालामः दोःआलाङः। ओहाङःसैको लाङ्काहाङःपाय् यात्ज्योः राजा च्युङःसा थाव् मुओ खेःतो फेरी ओहाङः यात्चाक् च्युङःओ खेःतो। 3 ओउःकोः रुप्पाय् आन पेओ भाम्ओमा दुतो लीक्ओ मनी बाङ्लो लेखा खेःतो। ओउः थाव् वेङ्ह्ग चीङ्ह्गहाङः प्लीओ योलो लेखा खेःतो। 4 ओउः थाव् तोङःतीलेः अरु चौबीस् राजा च्युङःसा थाव्लम् मुओ खेःतो। ओउः थाव्लम्हाङः चौबीस् भाम्ओ नाय् लावओ सुन्कोः मुकुत् ल्हुप्ती गम्ओ थालवःपालम् मुओ खेःइतो। 5 ओहाङःसैको ओउः मुल् थाव्सै प्लीङ्ह्ओमा मुक्ओमा वाङ्आ। ङ्हाहाङः सात्गोता म्हेः ल्युङ्ओ चेर्म्हेः खेःतो ओउःपाय् परमेस्वर्कोः सात् ग्वालामः लेःआः बा। 6 ङ्हाहाङःमा पेओ ऐनालो लेखा ताङ्ह्ओ झेल्ओ दुम्हान् मुओ खेःतो। ओहाङःसैको ओउः थाव् द्याङ्तोलेः चार् दोवाहाङः प्लैज्योः जीङः नाःओ थोक्लम् खेःतो। ओउःमयःपाय् आन मीक् नाःओलेः ङ्हासैमा लोन्सैमा मीक् नाःओ खेःइतो। 7 ओउः ङ्हा मुओपाय् माजाःलो लेखा खेःतो यात्ज्योः अरुपाय् स्याःलो लेखा अरुपाय् मान्ताकोः खेन् नाःओ ओउः लोनेकोःपाय् स्युङ्ओ मुवाःलो लेखा खेःतो। 8 ओउःमयःपाय् छगोता पाप् नाःओलेः खेःइतो आङ्गन् नाःतो मीक् खेःतो बाहीरमा भीत्रमा मीक् खेःइतो। न्हीदीङ्मा याह्दीङ्मा गलकायःमा ओउःमयः परमेस्वर्कायः मनःती मुइतो “लौ सबैसै ग्वम् नाःओ प्रभु परमेस्वर्पाय् छय्ङ्ओलेः छय्ङ्ओलेः छय्ङ्ओ लेःआः बा। ओउःपाय् ङ्हालेः खेःतो द्याह्मा मुलेःनाः लोनेःमा वाङ्सा खेःलेःनाः” त दाय्ह्ती मेधै मुनै। 9 ओउः चार् जीङः नाःओलम्इपाय् ओउः गलमा सीमालो राजाकोः थाव्हाङः च्युङःओचाक्कायः ताङ्ह्ताक्ती “च्युता” त तोती मनःधै मेधै मुलेःनै। 10 ओउः बेलाहाङः ओउः चौबीस् थालवःपालम्इ ओउः राजाकोः थाव्हाङः च्युङःओचाक्कायः बाःती स्यवती मनःनानी। ओहाङःसैको लःलयःकोः सुन्कोः मुकुत्लम् ओउःकोः दोम्हाङः ल्हाती गम्ती 11 “लौ ङीकोः प्रभु परमेस्वर्य नाङ्पाय् ताङ्ह्ताक्सामा मनःसामा ग्वम् ल्हासा स्याव्ओ चाक् लेःतेःआः बा। दोह् हायःती दाय्ह्सा नाङ्इ सबै थोक्लेःतेः जापीनःतीतेः जाङ्ह्आकान्। सबै थोक्लम् नाङ्इ लयः झाक्तीलेः जापीनःती जाङ्ह्ती झ्यान्ते ओउः थोक्लम्पाय् मुलेःनै बा” त दाय्ह्ती ओउःमयः दाय्ह्नै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.