प्रकाश 3 - चेपाङ1 सार्दीस्हाङः मुओ ङ्हाम्ओलम्कोः ल्होक्ओमयःकायः इत लेखउ दा। ‘परमेस्वर्कोः सात्गोता ग्वालामः नाःओ सात्गोता कार् नाःओचाक्इ तोओ कुरापाय् इलेःआः। दोह् दोह्तेः हायःतेःनौ ओउःत ङाइ चीःलेःनेःनाङ्। नाङ्कायःपाय् “पेतो सेलः मुलेःनाः” त दाय्ह्ती तोओ कुरा मुलेःनाः बुरु नाङ्पाय् सीओ लेःतेःआः बा। 2 लौ व्हक्तोलेः म्र्याअ। नाङ्कःहाङःपाय् दोह् दोह् सीती वाय्धाङ्माःत मुलेःनाः ओउःकायःलेः न्हाङ्तोलेः पेतो गम्उ दा दोह् हायःती दाय्ह्सा नाङ्कायः योतोक्हाङः “ङाकोः परमेस्वर्कोः मीक्हाङः जुगाङ् पेओ काम्पाय् जाङ्ह्ओ” त च्यवःधाङ्ङल। 3 लौ उया नाङ्कायः स्यान्ती तोओ कुरापाय् नाङ्इ ङ्हालेः गतलो ग्याती सायःओ ओउःपाय् द्याह् गीलउ। रेव्तो जाङ्ह्ओ काम्लम्खे फेती ओउः ङ्हा सायःओ कुराखे ग्याती जाङ्ह्उ दा। नाङ्पाय् म्र्यातेःइली त खेःया चोर् वाङ्ओलो लेखालेः ङा नाङ्कःहाङः वाङ्नाङः वाङ्तोक्हाङः नाङ्इ व्हक्माःत चीःतेःउलु। 4 ओउःत तोलेःनेःनाङ् नाङ् सार्दीस्हाङः मुओलम्कःहाङः यात्नीस्चाक्इ पेतो छय्ङ्तो क्रीसीःमालो नाय् लावती वाह्धै मुधाङ्नै। ओउःमयःपाय् पेतो छय्ङ्तोलेः मुती झ्यान्ते ङाकुस् भाम्ओ नाय् लावती वाह्सा खाय्नानी। 5 सुसुइ रेव्ओकायः क्लीमःनानी ओउःपाय् ओउःमयःलो लेखालेः भाम्ओ नाय् लावसा खाय्नानी। ओउःकोः मय्ङ्पाय् ओउः जीङः नाःओलम्कोः मय्ङ् लेखती गम्सा कीताप्सै गलमा म्हीत्ताक्ङल। ओउःकोः मय्ङ्पाय् पेह्ती ङाकोः आपाकोः मीक्हाङःमा ओउःकुस् मुओ ल्होक्ओमयःकोः मीक्हाङःमा “ङाकोः मान्ता लेःआः” त दाय्ह्ती सबैकायः छ्यानःती तोलेःनाङः’ 6 लौ इ परमेस्वर्कोः ग्वालामःइपाय् ङ्हाम्ओलम्कायः तोओ कुरा पेतो सायःनु दा। 7 फीलादेल्फीयाहाङः मुओ ङ्हाम्ओलम्कोः ल्होक्ओमयःकायः इत लेखउ दा ‘ओउः दोङ् छय्ङ्ओ चाक्पाय् दावुद् राजाकोः सान्चो नाःओचाक् लेःआः। ओउःइ फोल्ओ धोकापाय् सुइमा राक्सामा खाय्मानीली। ओउःइ राक्ओ धोकापाय् सुइमा फोल्सामा खाय्मानीली। ओउःइ तोओ कुरापाय् इलेःआः। 8 दोह् दोह्तेः हायःतेःनानी ओउःत ङाइ चीःलेःनेःनाङ्। लौ योउ दा नाङ्कोः ङ्हासै यात्ज्योः फोल्ओ धोका गम्आलाङः। ओउः धोकापाय् सुइमा राक्सा खाय्नीली। नाङ्कोः ग्वम्पाय् नाःसापाय् नाःतेःआक्ल बुरु ङाकोः नोःराय्कोः कुराकायःमा नाङ्इ फेतेःउलु ङाकोः मय्ङ् तोसाकायःमा नाङ् अह्र्तेःल। 9 यात्नीस् मान्तालम्इ “ङीपाय् यहुदीलम् खेःनाङी” त लयःकायः माःती तोनाःइसी। ओउःत तोओलम्पाय् सैतान्इ थनःताक्आथास। ओउःमयःकायः नाङ्कःताङ् घोती स्यवलाङ् वाङ्ताक्लेःनाङःसु। नाङ्कायःपाय् “ओउः छय्ङ्ओचाक्इ राप्ओ मान्ता लेःतेःआः बा” त ओउःमयः लोनेः चीःती घोलेःनै। 10 ङाइ तोओलो लेखालेः नाङ्इ गुह्र्माःत ल्युङ्ह्तेःआकान् ओउःत झ्यान्ते ल्हाव्ह्दैबाङ्हाङः लोनेः वाङ्सा खेःओ सबै तय्छनःती योसाकायः लीह्सीःओ च्यवःओ बेलाहाङः ओउः बेलाहाङःपाय् ङाइ नाङ्कायः पेतो ओम्पायःतीलेः गम्नेःनाङ् बा। 11 लौ ङा रेन्ह्तोलेः वाङ्नाङः बा। नीङ्पाय् दोह् दोह्तेः दोःतेःआ ओउःलेः पेतो सेती गम्उ दा। ओहाङःसैको नाङ्कोः पेतो जाङ्ह्झ्याङ्कोः अरु सुइमा लासा खाय्नीली। 12 सुसुइ रेव्ओकायः क्लीमःनानी ओउःकायः ङाकोः परमेस्वर्कोः मन्दीर्हाङः मुल्धुरीलो लेखा जाङ्ह्नाङःसु ओउः मन्दीर्सै ओउःपाय् गलमा ग्ल्युङ्ह्इली। फेरी ओउः मान्ताकःहाङः ङाकोः परमेस्वर्कोः मय्ङ्मा लेखनाङः ङाकोः परमेस्वर्कोः सहर्कोः मय्ङ्मा लेखनाङः। ओउः सहर्पाय् ङाकोः परमेस्वर्कःहाङःसै लाङ्कासै ग्ल्युङ्ह्लेःनाः ओउःपाय् “नया यरुसालेम्” त तोओ लेःआः। ओहाङःसै ओउः मान्ताकःहाङः ङाकोः नया मय्ङ्मा लेखलेःनाङः’ 13 लौ परमेस्वर्कोः ग्वालामःइ ङ्हाम्ओलम्कायः तोओ कुरापाय् पेतो सायःनु दा। 14 लाओदीकीयाहाङः मुओ ङ्हाम्ओलम्कोः ल्होक्ओमयःकायः इत लेखउ दा। ‘ओउः जुगाङ् ङ्हाम्सीःओ दोङ् कुरा छ्यानःओ आमेन् त तोओ चाक्पाय् सबै जापीनःती न्यास्ओकोः जादरः लेःआः। ओउःइ तोओ कुरा इलेःआः। 15 दोह् दोह्तेः हायःतेःनौ ओउःपाय् ङाइ चीःलेःनाङः। ङाकोः काम्पाय् जुगाङ् म्ह्याङ्तीमातेः जाङ्ह्तेःउलु जुगाङ् म्ह्याङ्माःतमा जाङ्ह्तेःउलु। ब्ल्याओ तीःलो लेखा नाङ्पाय् धाह्मातेःल नीक्मातेःल। नाङ् धाह्ओ त खेःयाकायःमा झाक्लेःचाङः खेःतो नीक्ओ त खेःयाकायःमा झाक्लेःनाङः खेःतो नाङ्पाय् ओउःतलेः खेःतेःल 16 ओउःत झ्यान्ते नाङ्कायः ब्ल्याओ तीःलो लेखालेः म्होतोङ्सै पुःच्युक्तीलेः वाय्नेःनाङ् बा। 17 “लौ ङापाय् गह्र् नाःतो नाःताक्साकायः क्युओ चाक् लेःआः ङ। ङा दोह्मा राह्ङल” ततेः दाय्ह्ती ताःतेःसतो नाङ्पाय् आन योनःसीःओ ह्र्यात् स्याव्तेःतो दोह्मा नाःतो नाःमाःत सोह्लेःतेः मुनाः बा। मीक्इ च्यवःसा खाय्मालोतेः मुलेःतेःनाः बा। बुरु इत नाङ्इ चीःलेःतेःउलु। 18 लौ उया इतलेः तोनेःनाङ् बा। ङाकःसै दोङ् पेओ म्हेःहाङः जीओ सुन् लेःउ दा। ओहाङःसै नाङ्पाय् नाःतो नाःओचाक्तेः स्याव्तेःनाः। नीङ्कोः रास्सीःओ सोह् आङ् बोमःसाकायः भाम्ओ नाय्लम्मा ङाकःसै लेःउ। मीक् च्यवःताक्साकायः ङाकःसै मीक्कोः ओखोत्मा लेःउ दा। 19 ङाइ राप्ओलम्कायः स्यान्सा थेङा जान्मालेःनाङः न्युम्ह्ताक्मालेःनाङः ओउःत झ्यान्ते ल्हुङ् द्यान्ह्ती ङाकोः काम् जुगाङ् म्ह्याङ्तोलेः जाङ्ह्उ। 20 लौ ओउः धोकाकोः दय्ह्लौहाङः ङा चीङ्ती धाङ्तीलेः मुलेःनाङः। यात्चाक्इ ङाकोः हाव्नयः सायःआक्तीको ओउः धोका फोल्नौ त खेःया ङा पोक्ती ओउःकुस् भोस् जेःनाङःचु ओउःइ ङाकुस्मा भोस् जेःनौ। 21 सुसुइ रेव्ओकायः क्लीमःनानी ओउःकायः ङाकुस् राजा च्युङःसा थाव्हाङः मुसा दोःताक्नाङः। ओउःतलेः ङाइमा रेव्ओकायः क्लीमःआक्तीको ङाकोः आपाकोः राजा च्युङःसा थाव्हाङः ओउःकुस् मुसा दोःआलाङः’ 22 लौ परमेस्वर्कोः ग्वालामःइपाय् ङ्हाम्ओलम्कायः तोओ कुरापाय् पेतोलेः सायःनु दा” |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.