प्रकाश 22 - चेपाङ1 ओहाङःसैको ओउः ल्होक्ओमयःइ ओउः जीङः बयःसा तीः खोला छ्यानःआताङः। ओउः तीःपाय् आन पेओ छेर्लीङ्त प्लीङ्ह्ती झेल्ओ तीःलेः खेःतो। परमेस्वर्कोःमा ओउः भेदाकोः चोःकोःमा च्युङःती मुओ थाव्सै ओउः तीः ग्ल्युङ्ह्ती वाङ्ती 2 सहर्कोः ताङ्ह्ओ ल्याम्कोः माझहाङः होती आल्नाः। ओउः तीःकोः इसै उसै चीनः चीनःसै ओउः जीङः बयःसा सीङः खेःतो। ओउः सीङःपाय् महीना महीनाहाङः सायःती बार पेन्ह्कायः सायः सायःनौ। ओउःकोः मात्पाय् देस् देस्कोः मान्तालम्कायः स्याक्ताक्साकायः मुओ। 3 ओहाङःसैको ओउः सहर्हाङःपाय् परमेस्वर्इ प्रनःओपाय् दोह्मा नाःल। ओहाङः परमेस्वर्कोःमा ओउः भेदाकोः चोःकोः च्युङःती मुओ थाव् मुलेःनाः। परमेस्वर्कायः ओउःकोः काम् जाङ्ह्ओलम्इ माननानी। 4 ओउःकोः खेन्पाय् ओउःमयःइ च्यवःसा खाय्नानी ओउः मान्तालम्कोः जेल्ह्हाङः परमेस्वर्कोः मय्ङ् लेखती मुनै। 5 ओउः सहर्हाङः याह्दीङ्पाय् गलमा दाह्ल बत्ती थोङ्ओमा न्याम् थोङ्ओमा जुगाङ् परल दोह् हायःती दाय्ह्सा प्रभु परमेस्वर्इ ओउःहाङः मुओलम्कायः थोङ्ताक्नाःथास। ओउःमयःपाय् गलकायःमा राजालो लेखा मुलेःनाः। 6 ओहाङःसैको “लौ इ कुरापाय् दोङ् ङ्हाम्सीःओ कुरा लेःआः। ओउःकोः कुरा छ्यानःओलम्कायः लयःकोः ग्वालामः बयःताक्सा परमेस्वर्इपाय् देङी स्याव्सा कुरालेः लयःकोः काम् जाङ्ह्ओलम्कायः छ्यानःलेःनौ। ओउःत हायःसाकायः ओउःइ लयःकोः ल्होक्ओमयः ल्होक्आकान्” त दाय्ह्ती ओउः ल्होक्ओमयःइ तोआताङः। 7 “लौ ङा रेन्ह्तोलेः वाङ्नाङः बा” त दाय्ह्ती तोओ लेःआः। सुसुइ इ कीताप्हाङः छ्यानःती लेखओ कुरापाय् ल्हुङ्हाङः सेती गम्नानी ओउःपाय् चोङाय्सीःतोलेः मुजेःनै। 8 इ कुरापाय् ङा युहना त तोओइ सबै सायःमाआलाङः च्यवःमाआलाङः। ओहाङःसैको सायःआक्तीकोमा च्यवःआक्तीकोमा इ कुरा छ्यानःओ ल्होक्ओमयःकोः दोम्हाङः बाःती ओउःकायः मानसा बोङःङोतो 9 “एत हायःलाम् ङापाय् नाङ्कुस्मा नाङ्कोः परमेस्वर्कोः कुरा छ्यानःओ पुःचोङ्कुस्मा इ कीताप्हाङःकोः कुरा ग्याती जाङ्ह्ओलम्कुस्मा परमेस्वर्कोः काम् जाङ्ह्ओचाक् लेःआः ङ। परमेस्वर्कायः मानउ” त दाय्ह्ती ओउःइ तोआताङः। 10 ओहाङःसैको “लौ इ कीताप्हाङः लेखओ लोनेः वाङ्सा खेःओ कुरापाय् नुसुती गम्तेःचनौ दोह् हायःती दाय्ह्सा इ कुरा सबै ताप्सा बेलापाय् द्याङ्तो मुनाः। 11 सुसुखे रेव्ओ काम् जाङ्ह्ओ लेःआः ओउःइपाय् रेव्तोलेः जाङ्ह्धैलेः मुजेःपै। सुसुमा क्रीसीःओ लेःआः ओउःपाय् क्रीसीःतोलेः मुजेःपै। सुसुखेइ पेओ काम् जाङ्ह्ओ लेःआः ओउःपाय् पेतोलेः जाङ्ह्तीलेः मुजेःपै सुसु छय्ङ्ओ लेःआः इ ओउःपाय् छय्ङ्तोलेः मुजेःपै” त दाय्ह्ती ओउः ल्होक्ओमयःइ तोआताङः। 12 “लौ ङा रेन्ह्तोलेः वाङ्नाङः। वाङ्तोक्हाङः ङाइ सबैकायः ओउःमयःकोः काम् जाङ्ह्झ्याङ्कोः वानःलेःनाङःसु। मान्ता मान्ताइ गतलो लःलयःकोः काम् जाङ्ह्लेःआकानी ओउःतलेः बयःनाङःसु बा। 13 ङापाय् सबैसै ङ्हामा लेःआः ङ सबैसै लोनेःमा लेःआः ङ सबै कुराकोः तुङःमा ङा लेःआः ङ सबै कुराकोः च्योःमा ङा लेःआः” त दाय्ह्ती येसु दाय्ह्आ। 14 सुसुइ लयःकोः क्रमःनाय्लम् धावःती भाम्ताक्नानी ओउःमयःपाय् चोङाय्तोलेः मुनै ओउःमयः ओउः जीङः बयःसा सीङःसै काव्ह्सामा दोःनै ओउः सहर्कोः धोकालम्हाङः पोक्सामा दोःलेःनै। 15 ओउःमयःखे पोक्सा दोःइतो सबै जुगाङ् रेव्तो जाङ्ह्ओलम्मा ल्हास्या जाङ्ह्ओलम्मा झ्याती जाङ्ह्ओलम्मा मान्ता सात्ओलम्मा मुर्ती मानओलम्मा माःती तोसा जाङ्ह्सा झाक्ओलम्मा ओउःमयःखे सहर् बाहीरताङ् मुसा परनाः। 16 “लौ इ कुरा सबै ङ्हाम्ओलम् छ्यानःती तोसा थेङा ङा येसुइ ङाकोः ल्होक्ओमयःकायः नीङ्कःताङ् ल्होक्आलाङः। ङापाय् दावुद्कोः होह्र्कोः तुङःलेः ओउः बीहान प्रीमा च्योक्ती थाओ थोङ्ओ कार् लेःआः ङ” त दाय्ह्ती ओउःपाय् दाय्ह्आ। 17 ओहाङःसैको परमेस्वर्कोः ग्वालामःमा ओउः भेदाकोः चोःकोः कमामा “लौ वाङ्अ दा” त दाय्ह्ती तोनाःचु। ओउः कुरा सायःओलम्मा “माः है वाङ्चाक्अ दै” तमा सबैइ तोपानी। ओहाङःसै सुसुमा अप्लेःनै ओउःपाय् ग्यातीलेः वाङ्ती ओउः पैसा आःताः त्याक्माःत सोह् बयःओ जीङः बयःसा तीः त्याक्पानी। 18 “सुसुइ इ कीताप्हाङः लेखओ लोनेः स्याव्सा कुरा सायःनानी ओउःइपाय् इ कुराकायः दोह्मा पाःती लेखलाम्। ओउःइ पाःती लेखचौ त खेःया ओउःकायःलेः परमेस्वर्इ इ कीताप्हाङः लेखती तोओकोः महामारीलम् बयःनाःथै” त दाय्ह्ती ङाइ गानाक्तीलेः तोनाङः। 19 ओहाङःसैको सुसुइ इ कीताप्कोः लोनेः स्याव्सा कुराकायः क्लेत्ताक्चानी ओउःकायः इ कीताप्हाङः छ्यानःओ जीङः नाःओ सीङःकोः सायः त्याक्सा भाक् खेःओमा ओउः छय्ङ्ओ सहर्हाङः वाह्ती मुसा खेःओमा परमेस्वर्इ लाती आलःनाःथास। 20 इ कुरालम् छ्यानःती तोओचाक्पाय् “माः है ङापाय् रेन्ह्तोलेः वाङ्नाङः बा” त दाय्ह्ती दाय्ह्लेःनाः। माः प्रभु येसुय रेन्ह्तोलेः वाङ्चाक्अ दै। 21 लौ सबै ङ्हाम्ओलम्कायः प्रभु येसु योनःतीलेः योपाःथास। ओउःतलेः स्याव्पाः दा। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.