प्रकाश 21 - चेपाङ1 ओहाङःसैको ङाइ नया फेल्बाङ्मा नया ल्हाव्ह्दैबाङ् च्यवःआलाङः। ओउः ङ्हा मुओ फेल्बाङ् ल्हाव्ह्दैबाङ् म्हीत्जेःओ खेःतो। ओउः द्युम्मालो तीःमा म्हीत्जेःआ। 2 ओहाङःसैको ओउः पेओ छय्ङ्ओ नया यरुसालेम् त तोओ सहर् लाङ्काहाङः मुओ परमेस्वर्सै ग्ल्युङ्ह्ती वाङ्ओमा च्यवःआलाङः। ओउः सहर्पाय् देङीलो भाव्इ वानःसा खेःओ आन पेओ नाय्लम् लावओ सायःलम् लीक्ओ कमालो लेखालेः खेःतो। 3 ग्ल्युङ्ह्ती वाङ्तोक्हाङः ओउः राजा च्युङःसा थाव्सै सोतो हाव्नयःमा सायःआलाङः “लौ द्याह्गोते परमेस्वर्पाय् मान्तालम्कुस् याक्लेःनाः। ओउःत याक्तोक्हाङः ओउःमयः परमेस्वर्कोः मान्तालम् स्याव्लेःनै। माः है परमेस्वर्पाय् लयःलेः मान्तालम्कुस् याक्ती ओउःमयःकोः परमेस्वर् स्याव्लेःनाः। 4 सबै क्रेस्ती र्याःओलम्कोः मीक्क्लीः परमेस्वर्इ जुगाङ् थ्युर्ती वाय्नाःथास। सीओमा क्रेस्ती र्याःओमा जीक्ओमा द्याह्पाय् नाःल दोह् हायःती दाय्ह्सा ङ्हाकोः कुरापाय् सबै म्हीत्लेःआ” त दाय्ह्ती दाय्ह्ओ खेःतो। 5 ओहाङःसैको ओउः राजा च्युङःसा थाव्हाङः मुओचाक्पाय् “लौ सबै कुरा नयालेः जाङ्ह्नाङः बा” त दाय्ह्ती दाय्ह्ओ खेःतो। “लौ इ कुरापाय् दोङ् ङ्हाम्सीःओ कुरा लेःआः। ओउःपाय् लेखउ दा” तमा दाय्ह्ती ङाकायः तोआताङः। 6 “लौ इपाय् स्याव्जेःआ बा। ङापाय् सबैसै ङ्हामा लेःआः ङ सबैसै लोनेःमा लेःआः ङ सबै कुराकोः तुङःमा सबै कुराकोः च्योःमा ङा लेःआः ङ। सुसु अप्लेःनै ओउःकायःलेः ङाइ ओउः जीङः नाःओ तीः सीगाङ्सै पैसा आःताः त्याक्माःत सोह्लेः तुङ्सा दोःताक्नाङःसु। 7 सुसु रेव्ओकायः क्लीमःनानी ओउःकायः ङाइ इतलेः बयःलेःनाङः। ङापाय् ओउःकोः परमेस्वर्लेः स्याव्नाङः ओउःपाय् ङाकोः चोःलेः स्याव्नै। 8 ओउःमयःखे ओउःतलेः स्याव्नै सुसुखे परमेस्वर्कोः काम् जाङ्ह्साकायः रैओ ल्हुङ् नाःओ मुलेःनै सुसुखे ङ्हाम्ओकायः फेओ मुनै सुसुखे आन क्रीसीःओ काम्लम् जाङ्ह्ओलेः मान्ता सात्ओलेः ल्हास्या काम् जाङ्ह्ओलेः मुनै सुसुखे झ्याओमा मुर्तीकायः मानओ काम् जाङ्ह्ओ लेःआः माःती तोओ लेःआः ओउःमयः सबै ओउः म्हेः ल्युङ्ओ गन्धक् नाःओ दुम्हान्हाङः न्युम्ह्तोलेः स्याव्नै ओउःत स्याव्ओलम्पाय् ‘फेरीलेः सीआ’ त तोओ लेःआः” 9 ओहाङःसैको ओउः सात्गोता मानाहाङः महामारी लात्ओ ल्होक्ओमयःकोः यात्चाक् ङाकःताङ् वाङ्ती “लौ वाङ्अ दा ङाइ ओउः भेदाकोः चोः त तोओकोः कमा छ्यानःनेःनाङ्” त दाय्ह्ती तोआताङः। 10 ओहाङःसैको ङा परमेस्वर्कोः ग्वालामः दोःआलाङः। दोःआक्तीको ओउः ल्होक्ओमयःइ आन यास्ओ स्यालुङ्कोः च्योःताङ् लात्ती आलःआताङः। ओहाङः लात्ती आल्आक्तीको ङाकायः ओउः छय्ङ्ओ यरुसालेम् त तोओ सहर्लेः लाङ्काहाङः मुओ परमेस्वर्कःसै ग्ल्युङ्ह्ती वाङ्ओ छ्यानःआताङः। 11 ओउः सहर्पाय् परमेस्वर्सै दोःओ अङ्ग थङ्गत त पेओ थोङ्ओलेः खेःतो। ओउःपाय् पेओ यास्पर् त तोओ झेल्ओ मनी बाङ्लो लेखालेः लीक्ओ खेःतो। 12 ओउः सहर्कोः खोओ बार्पाय् आन ब्राव्ओमा यास्ओमा खेःतो। ओहाङः बारगोता धोका मुओ धोका धोकाहाङः यात्चाक् ल्होक्ओमयः ल्युङ्ह्ती मुओ खेःतो। धोका धोकाकोः त्यावःसै यातैज्योः इस्राएली मान्तालम्कोः बार थर्कोः मय्ङ् लेखओ खेःतो। 13 ओहाङःसैको ओउः बारगोता धोकाकोःपाय् सुम् धोका दाह्न्याम्ताङ् सुम् धोका ब्लक्न्याम्ताङ् सुम् धोका उत्तर्ताङ् सुम् धोका दक्सीन्ताङ् खेःतो। 14 ओहाङःसैको ओउः बार्लम्कोःपाय् बारगोता तोस्बाङ् खेःतो। बाङ् बाङ्हाङः यातैज्योः ओउः भेदाकोः चोःकोः बारचाक् छ्युङ्ह्ती ल्होक्ओमयःकोः मय्ङ् लेखओ खेःतो। 15 ओहाङःसैको ङाकायः छ्यानःओ ल्होक्ओमयःइपाय् ओउः सहर्कोः बार्लम् धोकालम् क्रुसा थेङा यात्ज्योः सुन्कोः जाङ्ह्ओ क्रुसा दङ्ग लात्आकान्। 16 ओउः सहर्पाय् बकीस्लो लेखा खेःतो। ओउःकोः चार्गोता बार्लम्पाय् ब्राङ्तो खात्ओलेः ग्याङ्ओ खेःतो। ओहाङःसैको ओउः दङ्गइ ओउः ल्होक्ओमयःइ सहर् क्रुआकान्। यात्ज्योः बार्पाय् बार सै कीलोमीतर्च्युक् ग्याङ्ओ। ओउः सहर्पाय् ओउःच्युक्लेः यास्ओमा खेःतो। 17 ओउःकोः बार्कायःमा ओउः ल्होक्ओमयःइ क्रुआकान्। बार्लम्पाय् यात्सै चवालीस् मान्ताकोः तुप्क्रुच्युक् यास्ओलेः खेःतो ओउः ल्होक्ओमयःकोः दङ्गइ क्रुती इच्युक् यास्ओलेः खेःतो। 18 ओउः बार्खेपाय् पेओ यास्पर् त तोओ बाङ्सै जाङ्ह्ओ खेःतो सहर्खे जुगाङ् पेओ ऐनालो लेखा झेल्ओ सुन्कोः जाङ्ह्ओ खेःतो। 19 बार्कोः तोस्बाङ्लम्पाय् सबै पेओ मनी बाङ्लम्लेः लीक्ओ खेःतो। ओउः ङ्हाकोः तोस्बाङ्पाय् यास्पर् त तोओकोः लीक्ओआः यात्ज्योः अरुपाय् फेल्बाङ्लो प्लीओ साफीर् मनीकोः लीक्ओ खेःतो अरु चाल्केदोन् त तोओ प्लीगार्ओ मनी पन्ना त तोओ प्लीओ मनी 20 गोमेद त तोओ दुगार्ओ मनी सार्दीओस् त तोओ दुओ मनी क्रीसोलीथास् त तोओ यार्ओ मनी पीत त तोओ प्लीगार्ओ मनी पीरोज त तोओ यार्ओ मनी क्रीसोप्रासोस् त तोओ प्लीगार्ओ मनी हुवाकीन् त तोओ फेल्बाङ्लो प्लीगार्ओ दुगार्ओ मनी मार्तीस् त तोओ ङालःओ मनी ओउः बारगोता मनीकोः ओउः तोस्बाङ्लम् जाङ्ह्ओ खेःतो। 21 ओउः बारगोता धोकालम्पाय् बारगोता मोतीकोः जाङ्ह्ओ खेःतो यात्ज्योः धोकापाय् यातैज्योः मोती खेःतो। ओउः सहर्कोः ल्याम्पाय् पेओ ऐनालो लेखा झेल्ओ सुन्कोःलेः जाङ्ह्ओ खेःतो 22 सहर्कोः मन्दीर् ङाइ दोह्मा च्यवःङल दोह् हायःती दाय्ह्सा ओउः सहर्हाङः ग्वम् नाःओ प्रभु परमेस्वर्मा ओउः भेदाकोः चोःमा ओउः सहर्कोः मन्दीर् मुनाःच। 23 ओउः सहर्कायःपाय् न्याम् थोङ्ओमा लाह् हवःओमा जुगाङ् परल दोह् हायःती दाय्ह्सा परमेस्वर्इपाय् अङ्ग थङ्ग त मुती ओउः सहर्कायः थोङ्ताक्नौ। ओउः भेदाकोः चोःमा ओउः सहर्कोः बत्तीलो लेखा मुनाः। 24 ओउःकोः थोङ्ओहाङः सबै देस्कोः मान्तालम्इ वाह्सा खाय्नानी। ओउः सहर्हाङःमा ल्हाव्ह्दैबाङ्कोः राजालम्इ लयःकोः पेओ गह्र्लम् ग्राम् ग्रम्त वानःनानी। 25 ओउः सहर्कोः धोकालम्पाय् गलमा राक्ल न्हीदीङ्हाङः फोल्तोलेः मुलेःनाः याह्दीङ्पाय् ओउःहाङः गलमा स्याव्ल। 26 ओउः सहर्हाङः सबै देस्लम्कोः गह्र्लम्मा पेओ थोक्लम्मा वानःनानी। 27 ओहाङःसैको ओउः सहर्हाङः दोह् दोह् क्रीसीःओ मुनाः ओउःलेः वानःसापाय् गलमा दोःल सुसुइमा रेव्ओ काम्मा माःओ काम्मा जाङ्ह्लेःनानी ओउःमा सहर्हाङः पोक्सा जुगाङ् दोःइली। सुसुखेकोः मय्ङ्पाय् ओउः भेदाकोः चोःकोः जीङः नाःओलम्कोः कीताप्हाङः लेखती मुनाः ओउःमयः ह पोक्सा दोःनै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.