प्रकाश 20 - चेपाङ1 ओहाङःसैको यात्चाक् लाङ्कासै ग्ल्युङ्ह्ओ ल्होक्ओमयः च्यवःआलाङः। ओउःइपाय् क्रुत्हाङः कामःअ नालाकोः सान्चोमा ताङ्ह्ओ साङ्लामा लात्ओ खेःतो। 2 ओउः ल्होक्ओमयःइ ग्ल्युङ्ह्ती वाङ्ती ओउः उय्ह्लेहाङःसैकोः ताङ्ह्ओ सैतान् त तोओ नाक्रुकायःपाय् चुम्ती यात् हजार् बर्सच्युक्कायःलेः पानःती 3 कामःअ नालाहाङः क्लाःती बोमःतीलेः गम्आथै। ओहाङः काती गम्आक्तीको ओउः रुइपाय् जात् जात्लम्कोः मान्तालम्कायः यात् हजार् बर्सच्युक्कायः माःती थ्योन्ह्ती तोसा खाय्उलु। ओहाङःसैको यात् हजार् बर्स पुत्आक्तीको ओउः रुपाय् ज्याङःतो खेःमाच्युक्कायः बेन्ताक्सा खेःतो। 4 ओहाङःसैको राजा च्युङःसा थाव्लम् च्यवःआलाङः। ओहाङः च्युङःती मुओलम्कायः तय्छनःती योसा ग्वम् बयःओ खेःतो। फेरी येसुकोः दोङ् कुरामा परमेस्वर्कोः नोःराय्मा थोल्ह्ती तोसाकायः पाल्ती सात्ओलम्कोः नामे रुआङ्लम्मा च्यवःआलाङः। ओउःमयःइपाय् ओउः तीःसै थाओकायःमा ओउःकोः मुर्तीकायःमा गलमा मानआक्नीली ओउःकोः चीन्ह जेल्ह्हाङः क्रुत्हाङः गलमा लात्आक्नीली। ओउःमयः सेलः उह्ती स्याव्ती ख्रीस्कुस् यात् हजार् बर्सच्युक्कायः राजालम् स्याव्नै। 5 ओउः बेलाहाङःपाय् ओउः ङ्हाकोः उह्ती च्योक्ओ बेलाहाङः लेःआः। अरु सीती मुओलम्खे ओउः हजार् बर्स पुत्आक्तीको सेलः स्याव्आकाय्। 6 ओउः ङ्हा उह्ती च्योक्ओलम्पाय् छय्ङ्तोमा चोङाय्तोलेः मुनै। ओउःमयः फेरीलेः सीसा परइली परमेस्वर्कायःमा ख्रीस्कायःमा ओउःमयः पुरोहीत् स्याव्ती ख्रीस्कुस् यात् हजार् बर्सच्युक्कायः राजा मुलेःनै। 7 ओहाङःसैको ओउः हजार् बर्स पुत्आक्तीको सैतान्पाय् ओउःकोः थुनओहाङःसै बेन्तोलेः स्याव्नाः। 8 बेन्आक्तीको ओउःइपाय् ल्हाव्ह्दैबाङ्कोः चार् दोवाहाङः मुओ गोग् मागोग त तोओ मान्तालम्कायः माःती थ्योन्ह्ती ताङ्ह्ओ मीन्ह्काय्साकायः हुम्ताक्नाःथास। ओउः मान्तालम्पाय् आन नाःतोलेः ल्हाव्ह्दैबाङ्कोः बाङ्लम्च्युक् नाःतोलेः मुनै। 9 ओहाङःसैको ओउःमयःपाय् ल्हाव्ह्दैबाङ्हाङः तोमःती वाह्ती परमेस्वर्कोः मान्तालम् न्यास्ती मुसा बेलाङ्कायःमा ओउःइ राप्ओ सहर्कायःमा तोङःनीतो लाङ्कासै म्हेः ग्ल्युङ्ह्ती वाङ्ती ओउः तोङःती मुओलम्कायः जुगाङ् माक्ती वाय्ताक्आथास। 10 ओउःमयःकायः माःती थ्योन्ह्ओ सैतान्कायः ओउः म्हेः ल्युङ्ओ गन्धक् नाःओ दुम्हान्हाङः ताती वाय्ओ खेःतो। ओउः दुम्हान्हाङःपाय् ओउः तीःसै थाओमा ओउःकोः कुरा माःती तोओचाक्मा ङ्हामा ताती वाय्ओ खेःचतो। ओउःनीस्कुस् सैतान्पाय् न्हीदीङ्मा याह्दीङ्मा गलकायःमा दीःमाःत न्युम्ह्तोलेः स्याव्नै। 11 ओहाङःसैको ङाइ ताङ्ह्ओ भाम्ओ राजा च्युङःसा थाव्मा च्यवःआलाङः ओहाङः च्युङःओचाक्मा च्यवःआलाङः। ओउःकःसै ल्हाव्ह्दैबाङ्मा फेल्बाङ्मा क्रव्ती ज्याल्आ। जुगाङ् म्हीत्ओलेः खेःतो। 12 ओहाङःसैको सबै सीओलम् च्यवःआलाङः। ताङ्ह्ओमा मीओमा सबै ओउः राजा च्युङःसा थाव्कोः ङ्हासै चीङ्ती मुओ च्यवःआलाङः। ओहाङः फेल्ती गम्ओ कीताप्लम्मा मुओ खेःतो। ओहाङःसैको यात्ज्योः अरु कीताप् फेल्ओ खेःतो। ओउःपाय् ओउः जीङः नाःओलम्कोः कीताप् लेःआः। ओहाङःपाय् सीओलम्इ ङ्हा जाङ्ह्ओ काम्लम् लेखती मुनाः। ओउः कीताप् पह्रती ओउः सीओलम्कायः तय्छनःसा खाय्ओ खेःतो। 13 ओहाङःसैको द्युम्मालो तीःसै ओहाङः मुओ सीओलम् त्याक्ओ खेःइतो। सीताक्ओसैमा नालासैमा ओहाङः मुओलम् त्याक्ओ खेःइतो ओउःमयःइ लयः जाङ्ह्ओ काम्लम्मा तय्छनःती योओ खेःतो। 14 ओहाङःसैको ओउः सीताक्ओकायःमा कामःअ नालाकायःमा ओउः म्हेः ल्युङ्ओ दुम्हान्हाङः तोस्ती वाय्ओ खेःतो। ओउःत स्याव्ओपाय् “फेरीलेः सीआ” त तोओ लेःआः। 15 ओहाङःसैको सुसुकोः मय्ङ्पाय् ओउः जीङः नाःओलम्कोः कीताप्हाङः लेखमालो मुनाः ओउः मान्तामा ओउः म्हेः नाःओ दुम्हान्हाङः तोस्ती वाय्ओ खेःतो। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.