प्रकाश 2 - चेपाङ1 “लौ एफेसस्हाङः मुओ ङ्हाम्ओलम्कोः ल्होक्ओमयःकायः इत लेखउ दा। ‘लौ ङोय् क्रुत्हाङः सात्गोता कार्लम् लात्ती ओउः सात्गोता सुन्कोः बत्तीहाङः वाह्ओचाक्इ तोओ कुरापाय् इलेःआः। 2 नाङ्इतेः दोह् दोह्तेः हायःतेःनौ ओउःलेः ङाइ चीःलेःनाङः। नाङ्इ गुह्र्मामाःत आन त्युस्ती काम् जाङ्ह्तेःउतो पेमालो काम् जाङ्ह्ओलम्कः नाङ् ब्लाय्क्तेःनाः ओउःतमा चीःलेःनाङः। फेरी “ङीपाय् ख्रीस्इ छ्युङ्ह्ओ ल्होक्ओमयः लेःआः ङी” त माःती तोओलम्कायःमा नाङ्इ तय्छनःती योती ओउःमयःकोः माःओ कुरापाय् चीःती झ्यान्ते सायःतेःउलु एतमा चीःलेःनेःनाङ्। 3 नाङ्पाय् ब्ल्यवःमाःत काम् जाङ्ह्तीमा लीह्सीःओ च्यवःतीमा ग्रमःत मुतेःआ ओउःतमा चीःलेःनाङः। 4 ओउःतलेः हायःतेःउतो यातैज्योः कुरापाय् स्याव्ल। ङ्हाकोःलो लेखालेः पेतो राप्ओलेः फेती नाङ्इ ङाकायः द्याह् पेतो राप्तेःचीली। 5 नाङ् ङ्हापाय् गुच्युक् पेतोतेः खेःतो त ल्हुङ्हाङः साक्आयःसा खेःतो। नाङ्इ ल्हुङ् द्यान्ह्ती ङ्हापाय् गतलोतेः पेतो हायःतेःउतो ओउःतलेः द्याह्मा हायःउ दा। नाङ्इ द्याह्हाङःसै हायःतेःउलु त खेःया नाङ्कोः बत्तीकोः तेव्केरासै त्युत्ती वाय्लाङ् वाङ्नाङः। 6 ओउःत तोनाङ्तो यात्ज्योः पेओ कुरामा हायःतेःनौ। ओउः नीकोलाय् त तोओकोः कुरा जाङ्ह्ओलम्कः ङालो लेखालेःतेः ब्लाय्क्तेःनाः ओउःत हायःसा पेलेःनाः। 7 लौ इ परमेस्वर्कोः ग्वालामःइपाय् ङ्हाम्ओलम्कायः तोओ कुरालेः पेतो सायःनु दा। सुसुइ रेव्ओकायः क्लीमःसा खाय्नानी ओउःपाय् परमेस्वर्कोः राङ्हाङः मुओ जीङः बयःसा सीङःसै जेःसा दोःताक्नाङः’ 8 द्याह् स्मर्नाहाङः मुओ ङ्हाम्ओलम्कोः ल्होक्ओमयःकायः इत लेखउ दा। ‘लौ सबैसै ङ्हा सबैसै लोनेः खेःओ ओउः सीआक्तीको उह्ती च्योक्ओचाक्इ तोओ कुरापाय् इलेःआः बा। 9 नाङ्इ दोह् दोह् लीह्सीःओ गोरःओतेःआः ओउःमा चीःलेःनेःनाङ्। नाङ्पाय् ह्र्यात् खेःतेःनाः तमा ङाइ चीःलेःनेःनाङ्। ह्र्यात् खेःसापाय् खेःतेःनाः दोङ्सीलेः नाङ्पाय् नाःतो नाःओचाक्तेः खेःतेःनाः बा। अरुलम्इ नाङ्कायः माःती तोओ गाल्तुम्सा बोङःओ कुरामा चीःलेःनाङः। ओउःत माःती तोओलम्पाय् “यहुदीलम् खेःनाङी” त दाय्ह्ती नोःनीतो ओउःमयःपाय् दोङ् यहुदीलम् खेःइली सैतान्इ थनःताक्ओ मान्तालम् लेःआः इ। 10 फेरी देङी वाङ्सा लीह्सीःओ बेलाहाङःपाय् रैलाम्। नाङ्कायः गुच्युक् पेतो ङ्हाम्तेःनाः त ल्हुङ्तुक् वेलःती योसाकायः सैतान्इ यात्नीस्चाक् नाङ्कोः मान्तालम्कायः झ्याल्खानहाङः थुनताक्तेःनै। दस्दीन्कायः लीह्सीःओ च्यवःताक्तेःनानी इत ङाइ तोनेःनाङ्स। ओउः बेलाहाङःमा सात्खेःओ बेलाहाङःमा वाङ्नाः त खेःया ल्हुङ् ग्रमःतलेः मुती ङ्हाम्उ दा। ओहाङःसैको नाङ्कोः ङ्हाम्झ्याङ्कायः ङाइ पेओ रौ जीङः दोःताक्नेःनाङ्’ 11 लौ इ परमेस्वर्कोः ग्वालामःइपाय् ङ्हाम्ओलम्कायः तोओ कुरालेः पेतो सायःनु दा। सुसुइ रेव्ओलम्कायः क्लीमःनानी ओउःपाय् सीआक्तीको लोनेः फेरीकायःमा सीइली। 12 पर्गामम्हाङः मुओ ङ्हाम्ओलम्कोः ल्होक्ओमयःकायः इत लेखउ दा। ‘लौ ओउः व्हानःओ तरवाल् लात्ओचाक्इ तोओ कुरापाय् इलेःआः। 13 नाङ्पाय् गाःहाङःलो याक्तेःनाः ओउःलेः चीःलेःनाङः। सैतान्पाय् राजालो लेखा याक्ओ थाव्हाङःलेः नाङ्मा याक्तेःनाः एत ङाइ चीःलेःनेःनाङ्। ओहाङःलेः याक्तीमा मुतेःनाः बुरु ङाकायः ङ्हाम्तीमा मुलेःतेःनाः। ङाकोः कुरा पेतो छ्यानःओ अन्तीपास् त तोओकायः नाङ्कोः सैतान् मुओ सहर्हाङः सात्तोक्हाङः नाङ्इमा ङाकायः ङ्हाम्ओकायः फेतेःउलु। 14 ओउःतमा चीःलेःनाङ्तो नाङ्कायः यात्नीस् कुराकायः ग्ल्यानःती जान्सा खेःतो। नीङ्कःहाङः बालाम्कोः स्यान्राय् ग्याती सायःओलम् मुनै। बालाम् त तोओपाय् यात्चाक् बालाक्त तोओकःताङ् वाङ्ती “लौ इस्राएलीलम्कायःपाय् मुर्तीकायः ल्हाओ जेःगा जेःसामा ल्हास्या काम् जाङ्ह्साकायःमा थ्योन्ह्ती जाङ्ह्ताक्उसु दा” त दाय्ह्ती बालाम्इ ओउःकायः स्यान्आकान्। 15 इतलेः नीङ्कःहाङःमा ओउः नीकोलाय्त तोओइ स्यान्ओ कुराकायः ग्याती सायःओलम् मुलेःनै। 16 लौ नाङ्इ जाङ्ह्ओ रेव्ओ काम्लम् फेउ दा। ओउःमयःइ इत हायःओ फेतेःनीली त खेःयाकायः ङाइ रेन्ह्तोलेः वाङ्ती ङाकोः म्होतोङ्सै ग्ल्युङ्ह्ओ तरवाल्इ ओउःमयःकुस् मीन्ह्काय्नाङी’ 17 लौ इ परमेस्वर्कोः ग्वालामःइ ङ्हाम्ओलम्कायः तोओ कुरापाय् पेतो सायःनु दा। सुसुइ रेव्ओकायः क्लीमःनानी ओउःकायः ङाइ नुस्ती गम्ओ मन्नकोःमा बयःलेःनाङः यात्ज्योः भाम्ओ बाङ्मा बयःलेःनाङः। ओउः बाङ्हाङः अरु सुइमा चीःमालो नया मय्ङ् लेखती मुलेःनाः। ओउः बाङ् दोःओ मान्ताइ ह दोह् मय्ङ् लेखओ मुनाः त चीःसा खाय्नानी। 18 थुयातीराहाङः मुओ ङ्हाम्ओलम्कोः ल्होक्ओमयःकायः इत लेखउ दा। ‘लौ ओउः म्हेःलो प्लीङ्ह्ओ मीक् नाःओ चाक्पाय् ओउः युओ पीताल्लो थोङ्ओ दोम् नाःओ परमेस्वर्कोः चोःपाय् ओउःइ तोओ कुरा इलेःआः। 19 दोह् दोह्तेः हायःतेःनौ ओउःपाय् चीःलेःनेःनाङ्। नाङ्कोः राप्ओ ङ्हाम्ओ ल्हुङ्मा नीङ्कोः गुह्र्माःतो पेतो काम् जाङ्ह्ओमा चीःलेःनाङः। ङ्हाहाङःसै नाङ्इ तेन्छ्याङ् न्हाङ्तोलेः पेओ काम् जाङ्ह्तेःनौ तमा चीःलेःनेःनाङ्। 20 इत चीःसापाय् चीःलेःनाङः नाङ्कायः यातैज्योः कुराकायः जान्सा खेःतो। ओउः पेमालो मोमःचोः जेजेबेल् त तोओकायः नाङ्कोः मान्ताकःहाङः मुसा ताक्तेःनौ। ओउःपाय् “लौ ङापाय् परमेस्वर्कोः कुरा वानःओचाक् लेःआः ङ” त लयःकायः तोसतो ङाकोः काम् जाङ्ह्ओलम्कायः “लौ ल्हास्या काम् जाङ्ह्नु” तमा थ्योन्ह्ती स्यान्नौ “मुर्तीकायः ल्हाओ जेःगा जेःसा स्याव्लेःनाः” तमा माःती तोती स्यान्नौ। 21 ओउःकायःपाय् “लौ नाङ्कोः रेव्तो जाङ्ह्ओकायः फेउ” त तोझुङ्ङोतो ओउःकोः पेमालो काम्कायः फेसा जुगाङ् ग्याल। 22 ओउःत झ्यान्ते ओउःकायःपाय् ओउःकोः ल्हास्या जाङ्ह्ओ थाव्हाङःलेः प्लाह्ताक्ती न्युम्ह्ताक्तीलेः वाय्लेःनाङः ओउःकुस् ल्हास्या जाङ्ह्ओलम्मा इत हायःओ फेनीली त खेःया ओहाङःमा आन न्युम्ह्तोलेः स्याव्ताक्नाङःसु। 23 ओउःकोः कुरा ग्याती सायःओलम्कायःमा सात्लेःनाङःसु। ओहाङःसै ङाइ सबै मान्ताकोः ल्हुङ्तुक् योती चीःलेःनाङः त सबै ङ्हाम्ओलम्कायः छ्यानःलेःनाङःसु। सबैकायः लःलयः जोक्कायः ओउःमयःकोः काम् जाङ्ह्झ्याङ्कायः बयःलेःनाङः बा। पेओकायः पेओ रेव्ओकायः रेव्ओ बयःलेःनाङःसु। 24 ओहाङःसै नीङ् जेजेबेल्कोः स्यान्राय् ग्यामालोलम्खेइ सैतान्इ नुस्ती गम्ओ कुरा त तोओपाय् नीङ्इ ल्हुङ्हाङः सेती गम्तेःनीली। नीङ्कायःपाय् ङाइ इ कुरा ह तोनेःनाङ्स अरु तोनेःनाङ्सल। 25 ङा वाङ्धाङ्माःखाहाङः ल्हुङ् ग्रमःतलेः मुन। 26 सुसुइ रेव्ओकायः क्लीमःती सबै द्युम्ओ बेलाहाङः च्युक्कायःलेः ङाकोः काम् पेतो जाङ्ह्नानी ओउःकायःपाय् सबै जात्कोः हुकुम् बयःसालेः जाङ्ह्नाङः। 27 ओहाङःसैकोः ओउःइ जोक्ओ ल्हुङ्इ हुकुम् बयःती ओउः जात्लम्पाय् मीतो स्याव्ताक्नाःथास। ओउःतलेः ङाकोः आपाइ ङाकायःमा जाङ्ह्आताङः। “सबै जात्लम्कायः ओउःइ जोक्ओ ल्हुङ्इ राजालो लेखा हुकुम् बयःनौ। ओउःमयःकायः पोम्लो लेखालेः पक्ताक्ती वाय्सा खाय्नौ” त दाय्ह्ती ङाकायः हुकुम् बयःसा जाङ्ह्आताङः। एतलेः आखरःहाङः लेखती मुलेःनाः। 28 ओउः क्लीमःओलम्कायः ङाइ बीहान च्योक्ओ सुक्र कार्मा बयःलेःनाङः बा’ 29 लौ इ परमेस्वर्कोः ग्वालामःइपाय् ङ्हाम्ओलम्कायः तोओ कुरापाय् पेतो सायःनु दा। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.