प्रकाश 18 - चेपाङ1 ओहाङःसैको ङाइ यात्चाक् अरु ताङ्ह्ओ ल्होक्ओमयः लाङ्कासै ग्ल्युङ्ह्ओ च्यवःआलाङः। ओउःपाय् आन ग्वम् नाःओ खेःतो आन पेओ अङ्ग थङ्ग त थोङ्ती झ्यान्ते ओउःइपाय् ल्हाव्ह्दैबाङ्कायः सबै हवःआकान्। 2 ओउः ल्होक्ओमयःइपाय् आन सोतो गोःती “लौ ह्र्योङःती वाय्ओ लेःआः। ओउः ताङ्ह्ओ बाबीलोन् त तोओ सहर्पाय् ह्र्योङःती वाय्ओ लेःआः बा। द्याह्हाङःसै ओउः सहर्पाय् लान्लम्कोः जीरा तागालेः स्याव्नाः। ओहाङः सबै खाल्कोः पेमालो क्रीसीःओ वाःलम् मुलेःनाः 3 दोह् हायःती दाय्ह्सा सबै देस्लम्कोः मान्तालम्कायः ओउःकोः पेमालो मोह्हाय्ओ ल्हुङ्इ ब्रःताक्आथास ओउःकुस् ल्हाव्ह्दैबाङ्कोः राजालम्मा ल्हास्या काम् जाङ्ह्आकानी। ओउःकोः रेव्ओ काम्लम्सै ल्हाव्ह्दैबाङ्कोः साहुलम्इमा आन गह्र् क्युती मुह्आकाय्” त दाय्ह्ती ओउःपाय् दाय्ह्आ। 4 ओहाङःसैको लाङ्कासै यात्ज्योः अरु हाव्नयः सायःआलाङः “लौ ङाकोः मान्तालम्य ओउःसै ग्ल्युङ्ह्ती वाङ्न दा। नीङ् वाङ्तेःइली त खेःया ओउःकुस् नीङ् रेव्तोलेः स्याव्तेःनै ओउःकुस् नीङ्इमा न्युम्ह्तेःनानी। 5 ओउःकोः रेव्ओ काम्लम्पाय् लाङ्काताङ् त्युम्ह्ती पोम्ह्ती दाह्नाः ओउः रेव्ओ न्युम्ह्ताक्साकायः परमेस्वर्इ गलमा म्हेःउलु। 6 गतलो ओउःइ नीङ्कायः हायःतेःआकाय् ओउःतलेः ओउःकायः द्यानःतीलेः हायःनु दा। माः रैस नीसै भाक् पाःतीलेः द्यानःनु। ओउःइ नीङ्कायः बयःओकोः नीसै भाक् पाय्क्नु दा। 7 ओउःपाय् लयःकायः नाःतोलेः ताङ्ह्ताक्आकास लयःकोः ल्हुङ्कोः मोह्हाय्ओपाय् नाःतोलेः जाङ्ह्आकास त्युम्ह्आकास। द्याह् ओउःच्युक्लेः लीह्सीःओ द्यानःती बयःपाःथै। ओउःपाय् ‘लौ ङापाय् रानी स्याव्ती मुओआः ङ। ङापाय् बुधा नाःमालो मोमःचोः गलमा स्याव्ङल सीओ बुधाकायः गलमा क्रेस्सा परङल’ त दाय्ह्ती लयःकोः ल्हुङ्हाङः ङाःतीलेः ताःआकास। 8 ओउःत झ्यान्ते यातै दीन्हाङः ओउःकःताङ् महामारी वाङ्लेःनाः जीक्ती सीताक्ओ महामारी लीह्सीःओ महामारी अनीकाल् महामारी सबै वाङ्लेःनाः। ओउःकायःपाय् म्हेःइ माक्ताक्ती वाय्ताक्नाःथै दोह् हायःती दाय्ह्सा ओउःकायः न्युम्ह्ताक्ओ प्रभु परमेस्वर्पाय् आन ग्वम् नाःओ लेःआः बा” त दाय्ह्ती दाय्ह्ओ खेःतो। 9 ओहाङःसैको ओउःकायः जेःती माक्ती वाय्ओ म्हेःकोः कुःओ च्यवःती ओउः मोमःचोःकुस् लीङ्हायःओमा ल्हास्या काम् जाङ्ह्ओ राजालम् ओउःकायः आन क्रेस्ती र्याःलेःनै। 10 ओउःकोः न्युम्ह्ओकः आन रैती ओउः राजालम् लोक्तोसै योती “अह नाङ्पाय् न्युम्ह्तोलेः स्याव्तेःआ बा। नाङ् ताङ्ह्ओ ग्वम् नाःओ बाबीलोन् सहर् न्युम्ह्तोतेः स्याव्तेःआ बा। यात् चीच्योक्हाङःपाय् नाङ्कायः न्युम्ह्ताक्ओ रैस” त दाय्ह्ती ओउःमयः र्याःती दाय्ह्लेःनै। 11 ओहाङःसैको ल्हाव्ह्दैबाङ्कोः साहुलम्मा ओउःकायः क्रेस्तीलेः र्याःनै दोह् हायःती दाय्ह्सा ओउःमयःकोः सामान्लम् द्याह् सुइमा लेःनीली। 12 ओउःमयःकोः सुन् चान्दी मनी मोतीकोः जाङ्ह्ओ थोक्लम् ओउःमयःकोः दुओमा आन पेओ रेसम्कोः य्हुन्नाय्लम् पेतो सय्ङ्ओ सीङःकोः थोक्लम् हाथीकोः दाह्रोकोः जाङ्ह्ओ थोक्लम् पेओ सीङः पीताल् फालाम् भाम्ओ बाङ्कोः जाङ्ह्ओ थोक्लम् वीनःसा खाय्नीली। 13 सीङ्कौली रोक्सायःलम् पेतो सय्ङ्ओ सातीलम् धाक्सायःकोः तीःलम् कार्सा सातीलम् ओय्क्लम् गहुङ् स्याः मेत्छ्याःलम् घोरा घोराइ तेनओ राथ्लम् वीनःसाकायः काम् जाङ्ह्ओ नोकरी मान्तालम् सबैलेः साहुलम्इ ओउः बेलाहाङः दोह्मा वीनःसा खाय्नीली। 14 “लौ नाङ् आन झाक्ओ पेओ थोक्लम्पाय् जुगाङ् म्हीत्ती वाय्ओ लेःआः। नाङ्कोः गह्र्मा महङ्गो चीस्लम्मा सबै वाय्ओ लेःआः। ओउःपाय् नाङ् गलमा द्यानःती दोःतेःल” त दाय्ह्ती ओउः साहुलम् दाय्ह्नै। 15 ओउःमयःइपाय् ओउः सहर्हाङः थोक्लम् आन वीनःती झ्यान्ते पैसा नाःतोलेः क्युनीतो द्याह् ओउःकायः न्युम्ह्ताक्ओ च्यवःती आन रैती झ्यान्ते लोक्तोसै योनानी। ओउःकायः क्रेस्तीलेः र्याःती मुआकाय्। 16 “लौ ओउःपाय् न्युम्ह्तोलेः स्याव्आ। ओउः ताङ्ह्ओ सहर्पाय् न्युम्ह्तोलेः स्याव्आ बा। ओउः सहर्कोः मान्तालम् ङ्हापाय् पेओ भाम्ओमा दुओ ङालःओ नाय्लम् लावइसीओ खेःइतो सुन्मा मोती मनीमा लीक्इसीओ खेःइतो। 17 द्याह् ओउःकोः नाःतो गह्र्लम्पाय् यातै चीच्योक्हाङः जुगाङ् वाय्ओ लेःआः बा” त दाय्ह्ती ओउःमयः र्याःओ र्याःआकाय्। ओहाङःसैको तीः जहास्कायः चलावओमयःमा जहास्हाङः वाह्ओलम्मा सबै द्युम्मालो तीःहाङः काम् जाङ्ह्ओलम्मा लोक्तोसै योती 18 ओउः म्हेः जेःती माक्ताक्ओ सहर्कायः च्यवःती ओउःमयः गोःती “लौ ओउःच्युक् ताङ्ह्ओ सहर्पाय् गाःहाङःमा च्यवःल” त दाय्ह्ती क्रेस्ती र्याःती 19 तालाङ्हाङः फुत्साः ताआकायःइसी “लौ न्युम्ह्तोलेः स्याव्आ ओउः ताङ्ह्ओ सहर्पाय् गुच्युक् न्युम्ह्तोलेः स्याव्आ। ओउः सहर्कोः गह्र्सै तीः जहास् नाःओलम्इ आन पैसा क्युओ खेःतो। द्याह् यात् चीच्योक्हाङः ओउःपाय् जुगाङ् वाय्ओ लेःआः बा” त दाय्ह्ती ओउःमयः दाय्ह्आकाय्। 20 “लौ लाङ्काहाङः मुओलम्य ओउः सहर् योती म्रोतोलेः मुन दा। नीङ् परमेस्वर्कायः ङ्हाम्ओलम्मा ओउःकोः छ्युङ्ह्ती ल्होक्ओमयःमा ओउःकोः कुरा छ्यानःओमयःमा नीङ् सबै म्रोतीलेः मुन दोह् हायःती दाय्ह्सा नीङ्कायः पेमालो हायःओ सहर्कायः परमेस्वर्इ ओउःकोः रेव्झ्याङ् बयःती द्याह् न्युम्ह्ताक्नौ बा” त दाय्ह्ती दाय्ह्ओ खेःतो। 21 ओहाङःसैको यात्चाक् ताङ्ह्ओ ल्होक्ओमयः ताङ्ह्ओ ग्रायःबाङ्च्युक् लीःओ बाङ् च्युन्ती द्युम्मालो तीःहाङः तोस्ती वाय्ती “लौ इतलेः ओउः ताङ्ह्ओ बाबीलोन् त तोओ सहर्पाय् तोस्ती वाय्लेःनाः। वाय्आक्तीको ओउःपाय् जुगाङ् म्हीत्लेःनाः” त दाय्ह्ती दाय्ह्आ। 22 “ओउः सहर्हाङःपाय् वरनी प्रय्ह्ओ बाङ्सुली तुरही मुत्ओ गीत् मेओ हाव्नयः द्याह्हाङःसै गलमा सायःल। ओहाङःपाय् सीङःकोः जाङ्ह्ओमा सुन् चान्दी पीताल् जाङ्ह्ओ मान्तालम्मा गलमा च्यवःसा दोःल ग्रायःबाङ्इ ग्रायःओमा गलमा सायःसा दोःल। 23 ओहाङःपाय् बत्ती हवःओपाय् गलमा थोङ्ल कमा वानःओलम्कोः हाव्नयःमा गलमा सायःसा दोःल। ओउः सहर्कोः साहुलम्पाय् ल्हाव्ह्दैबाङ्कोः गह्र् नाःओ साहु खेःइतो। ओहाङः सबै देस्कोः मान्तालम्कायःपाय् माःती नोःओइ थ्योन्ह्ती ब्रःताक्ओ खेःतो। 24 ओहाङःमा सबै सात्ओ परमेस्वर्कायः ङ्हाम्ओलम्कोः वयःमा ओउःकोः कुरा छ्यानःओमयःकोः वयःमा च्यवःओ खेःतो। ओउःमयःकोः वयःमा सबै ल्हाव्ह्दैबाङ्हाङः सात्ओ मान्ताकोः वयःमा ओउः सहर्हाङः च्यवःओ खेःतो” त दाय्ह्ती ओउः ल्होक्ओमयः दाय्ह्आ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.