प्रकाश 17 - चेपाङ1 ओहाङःसैको यात्ज्योः माना लात्ओ ल्होक्ओमयःकोः ङाकःताङ् वाङ्ती “लौ ङाकुस् वाङ्अ ओउः आन पेमालो ल्हास्या मोमःचोः गत हायःती न्युम्ह्ताक्तोलेः स्याव्नाः त ङाइ छ्यानःनेःनाङ्। ओउःपाय् नाःतो तीः खोलालम्कोः चीनःसै मुओ सहर् लेःआः। 2 ओउःइ ल्हाव्ह्दैबाङ्कोः राजालम्कुस् ल्हास्याकायः जाङ्ह्आकान् ओउःत हायःती ओउःइ ल्हाव्ह्दैबाङ्हाङः मुओलम्कायः ङोताक्ती ब्रःताक्आथास” त दाय्ह्ती ओउः ल्होक्ओमयःइ तोआताङः। 3 ओहाङःसैको ङा परमेस्वर्कोः ग्वालामः दोःआलाङः। दोःआक्तीको ओउः ल्होक्ओमयःइ ङाकायः लात्ती मान्ता याक्गार्सीःमालो थाव्ताङ् आलःआताङः। ओहाङः दाह्आक्तीको ङाइ यात्चाक् मोमःचोः च्यवःआलाङः। ओउः मोमःचोःपाय् ओउः तीःसै थाओ दुओ खाल्हाङः लन्ह्ती मुओ खेःतो। ओउः तीःसै थाओखेपाय् सात् तालाङ्मा दस् रोङःमा नाःओ खेःतो। ओहाङः नाःतो परमेस्वर्कायः पेमालो जवओ मय्ङ्लम् लेखओ खेःतो। 4 ओउः मोमःचोःखेपाय् दुओमा ङालःओ नाय्लम् लावती आङ्पाय् सुन् मनी मोतीलेः लीक्ओ खेःतो। क्रुत्हाङः ओउः मोमःचोः यात्ज्योः सुन्कोः माना चुम्ती लात्आकान्। ओउः मानाहाङः ओउःइ जाङ्ह्ओ क्रीसीःओ ल्हास्या जाङ्ह्ओ पेमालो काम्लम् ब्लीङ्ती मुओ खेःतो। 5 ओउःकोः जेल्ह्हाङः चीःसा खाय्मालो मय्ङ् लेखओ खेःतो। ओउः मय्ङ्पाय् इत लेःआः खेःतो “ताङ्ह्ओ बाबीलोन्” त तोओ “ल्हास्यालम्कोःमा ल्हाव्ह्दैबाङ्हाङः मुओ क्रीसीःओ काम् जाङ्ह्ओलम्कोः आमा लेःआः बा” 6 ओहाङःसैको ओउः मोमःचोःइपाय् परमेस्वर्कोः मान्तालम्कोः वयःमा येसुकोः काम् जाङ्ह्साकायः सात्ओलम्कोः वयःमा तुङ्ती झ्यान्ते ङोओ लेःआः त ङाइ च्यवःआलाङः। ओउः मोमःचोः च्यवःआक्तीको ङा आन ग्याङ्ह्आलाङः। 7 ङा आन ग्याङ्ह्ती झ्यान्ते “लौ दोह् हायःतीतेः इतलेः ग्याङ्ह्तेःनाः” त दाय्ह्ती ओउः ल्होक्ओमयःइ व्हत्आताङः “ओउः मोमःचोःकोः कुरामा ओउःकायः लात्ओ सात् तालाङ् दस् रोङः नाःओकोः अरुइ चीःसा खाय्मालो कुरामा ङाइ द्याह् छ्यानःनेःनाङ्। 8 नाङ्इ च्यवःओ सात् तालाङ् नाःओपाय् ङ्हालेः मुओ खेःतो देङीपाय् नाःल। ओउःपाय् लोनेः कामः नालासै लन्ह्ती वाङ्नाः। वाङ्आक्तीको जुगाङ् ह्र्योङःती वाय्तोलेः स्याव्नाः। ओहाङःसैको सुसु ल्हाव्ह्दैबाङ्कोः मान्तालम्पाय् सबै जापीनःती न्यास्तोक्हाङःसै ओउःमयःकोः मय्ङ् जीङः नाःओलम्कोः कीताप्हाङः लेखमाःत मुलेःनै ओउःमयःपाय् ओउः सात् तालाङ् नाःआकाय् योती झ्यान्ते ग्याङ्ह्लेःनै दोह् हायःती दाय्ह्सा ओउः सात् तालाङ् नाःओपाय् ङ्हालेः मुओ खेःतो देङीपाय् नाःल लोनेःमा थाती वाङ्लेःनाः। 9 इ चीःसाकायः पेतो व्हाय्ओ ल्हुङ्तुक् नाःसा खेःतो। ओउःकोः सात् तालाङ्पाय् ओउः मोमःचोः च्युङःती मुओ सात्गोता बुम्मा लेःआः बा। फेरी ओउः सात् तालाङ्पाय् सात्गोता राजामा लेःआः बा। 10 ओउः राजालम्कोः पोङाचाक् सीओ लेःआः यात्चाक् तेन्छ्याङ् राजा मुधाङ्लेःनाः यात्चाक् अरुपाय् राजा स्याव्धाङ्ल। राजा स्याव्आक्तीको ओउःपाय् यात् चीच्योक्कायः झुङ्आले राजा स्याव्सा खेःतो। 11 ओहाङःसैको ओउः कामः नालासै लन्ह्ती वाङ्ओ ङ्हा मुओ खेःतो द्याह्पाय् नाःल ओउःपाय् यात्ज्योः अरु राजा लेःआः। ओउःपाय् ओउः सात्गोता राजालम्कोः खाल् लेःआः। ओउःकुस् राजालम् आत्गोता स्याव्नै। लोनेः ओउः राजापाय् जुगाङ् ह्र्योङःती वाय्तोलेः स्याव्नाः। 12 ओहाङःसैको नाङ्इ च्यवःओ दस् रोङःलम्पाय् दस्गोता राजालम् लेःआः। ओउःमयःपाय् राजा स्याव्धाङ्इली लोनेः ओउःमयः यात् चीच्योक्कायः ओउः तीःसै थाओकुस् राजा स्याव्ती हुकुम् बयःसा ग्वम् दोःनै। 13 ओउःमयः यातैज्योः ल्हुङ् स्याव्ती ओउःमयःकोः ग्वम् ओउः तीःसै थाओकायः ल्हानानी। 14 ओहाङःसैको ओउःमयःपाय् ओउः भेदाकोः चोःकुस् मीन्ह्काय्लेःनै। ओउःकुस् मीन्ह्काय्इतो ओउःमयःकायः ओउः भेदाकोः चोःइ क्लीमःनाःथास दोह् हायःती दाय्ह्सा ओउः भेदाकोः चोःपाय् सबैसै ताङ्ह्ओ प्रभुमा राजा लेःआः बा। ओउःकुस् वाह्ओलम्पाय् ओउःइ छ्युङ्ह्ती गोत्ओ पेतो ङ्हाम्ओ मान्तालम् लेःआः इ” त दाय्ह्ती ओउः ल्होक्ओमयःइ तोआताङः। 15 “लौ ओउः मोमःचोः च्युङःती मुओ तीःलम्पाय् सबै नाःतो हुम्ओ देस् देस्कोः मान्तालम्मा सबै जात्कोः मान्तालम्मा सबै भासा नोःओलम्मा लेःआः इ। 16 ओहाङःसैको नाङ्इ च्यवःओ दस् रोङःलम्मा ओउः तीःसै थाओमा ओउः मोमःचोःकः अह्र्लेःनै। ओउःकोः चीस्पाय् सबै लाती त झ्यान्ते ओउः मोमःचोः जुगाङ् सोह् स्याव्लेःनाः। ओउःकोः मायः जेःती ओउःकायः म्हेःइ माक्ती जेःताक्नानी 17 दोह् हायःती दाय्ह्सा परमेस्वर्इ ओउःमयःकायः होम्ताक्ती ओउःकोः लयः झाक्ओ जाङ्ह्ताक्नाःथास। एत हायःतीलेः परमेस्वर्कोः कुरा ताप्धाङ्माच्युक्कायः ओउःमयःइ ब्राङ्तीलेः लयःकोः राजाकोः ग्वम्पाय् ओउः तीःसै थाओकायः ल्हानानी। 18 ओहाङःसैको नाङ्इ च्यवःओ मोमःचोःपाय् ल्हाव्ह्दैबाङ्कोः राजालम्कायः पुःओ ताङ्ह्ओ सहर् लेःआः बा” त दाय्ह्ती ओउः ल्होक्ओमयःइ तोआताङः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.