प्रकाश 15 - चेपाङ1 ओहाङःसैको अलवःहाङः अरु आन ताङ्ह्ओ ग्याङ्ह्राय् च्यवःआलाङः। ओहाङः सात्गोता ल्होक्ओमयः सात्गोता महामारी लात्ती वानःओ खेःतो। ओउः महामारीलम्पाय् सोय्ह्ओ महामारी खेःतो दोह् हायःती दाय्ह्सा ओउः महामारी वाङ्आक्तीको परमेस्वर्कोः ल्हुङ् मल्ह्ओपाय् द्युम्जेःआ बा। 2 ओहाङःसैको ङाइ यात्ज्योः ताङ्ह्ओ ऐनाकोः जाङ्ह्ओ दुम्हान् च्यवःआलाङः। ओउः ऐनापाय् म्हेःकुस् ल्याव्ह्ओ खेःतो। ओहाङःसैको दुम्हान्कोः चीनःहाङः ओउः तीःसै थाओकायःमा ओउःकोः मुर्तीकायःमा ओउःकोः मय्ङ्कोः नम्बर्कायःमा क्लीमःसा खाय्ओलम्पाय् परमेस्वर्इ बयःओ वरनी लात्तीलेः चीङ्ती मुओ खेःइतो। 3 ओउःमयःपाय् परमेस्वर्कोः काम् जाङ्ह्ओ मोसाकोः गीत्मा ओउः भेदाकोः चोःकोः गीत्मा मेधै मुइतो “लौ नाङ् ग्वम् नाःओ प्रभु परमेस्वर्य नाङ्इ जाङ्ह्ओ काम्लम् आन ताङ्ह्ओ लेःआः आन ग्याङ्ह्सीःओ लेःआः बा। सबै जात्लम्कोः राजा मुलेःतेःनाः। नाङ् गलकायःमा दोङ् पेतोलेः हायःतेःनौ। 4 नाङ्कःहाङः सबै एङःतीलेः मुनै। नाङ्कोः मय्ङ्पाय् सबै ताङ्ह्ताक्लेःनानी दोह् हायःती दाय्ह्सा नाङ् ह जुगाङ् छय्ङ्ओलेः खेःतेःनाः। ‘नाङ्इ तय्छनःती योओ काम्लम् जुगाङ् पेओ लेःआः’ त सबैकायः छ्यानःओ लेःआः ओउःत झ्यान्ते सबै जात्लम् नाङ्कायः मानलाङ् वाङ्लेःनै” त दाय्ह्ती ओउःमयः मेआकाय्। 5 ओहाङःसैको ङाइ फेरीलेः योती ओउः मन्दीर् फोल्ओलेः च्यवःआलाङः। ओहाङः ओउः जुगाङ् छय्ङ्ओ थाव्मा च्यवःसा खाय्ओ खेःतो। 6 ओउः मन्दीर्सै ओउः सात्गोता महामारी लात्ओ सात्गोता ल्होक्ओमयः वाङ्आकाय्। ओउःमयःपाय् पेओ जुगाङ् छीःमालो भाम्ओ नाय्लम् लावओ खेःतो। खोस्हाङः सुन्कोः तोङःनाय्मा तोङःओलेः खेःतो। 7 ओहाङःसैको ओउः प्लैज्योः जीङः नाःओलम्कोः यात्ज्योःइ ओउः सात्गोता ल्होक्ओमयःकायः सात्गोता सुन्कोः माना बयःआथास। ओउः मानालम्हाङः ओउः गलकायःमा सेलः मुओ परमेस्वर्कोः ल्हुङ् मल्ह्ओपाय् धाक्सायःकोः तीःलो लेखालेः ब्लीङ्तोलेः खेःतो। 8 परमेस्वर्कोः आन ताङ्ह्ओ ग्वम्पाय् ओउः मन्दीर्कायः म्हेःकुःलो लेखालेः ब्लीङ्ताक्ती झ्यान्ते ओउः सात्गोता ल्होक्ओमयःइ लात्ओ सात्गोता महामारीलम् द्योक्धाङ्माच्युक्कायः मन्दीर्हाङः सुइमा पोक्सा खाय्नीली। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.