प्रकाश 14 - चेपाङ1 ओहाङःसैको ङाइ फेरी योतीलेः सीओन् त तोओ बुम्हाङः ओउः भेदाकोः चोः च्यवःआलाङः। ओउःकुस्पाय् यात् लाख् चवालीस् हजार् मान्तालम् मुओ खेःतो। ओउःमयःकोः जेल्ह्हाङः ओउः चोःकोः मय्ङ्मा ओउःकोः आपाकोः मय्ङ्मा लेखओ खेःतो। 2 ओहाङःसैको लाङ्कासै वाङ्ओ हाव्नयः सायःआलाङः। ओउः हाव्नयःपाय् क्लोनःती ल्हक्अर्ओ तीःलो लेखालेः खेःमाःतो सोतो न्याम् मुक्ओलो लेखामा खेःतो। वरनी प्रय्ह्ओ मान्तालम्कोः हाव्नयःलो लेखामा खेःतो। 3 ओउः यात् लाख् चवालीस् हजार् मान्तालम्पाय् ओउः राजा च्युङःसा थाव्कोः ङ्हासैमा ओउः चार्गोता जीङः नाःओलम्मा ओउः थालवःपालम्कोः ङ्हासैमा चीङ्ती नया अरुइ स्यान्सा खाय्मालो गीत् मेधै मुओ खेःइतो। ओउःमयःपाय् ल्हाव्ह्दैबाङ्हाङः मुओलम्कःसै ल्हाङ्ओ खेःइतो। 4 ओउःमयःपाय् मोमःचोःकुस् गलमा एनःइली छय्ङ्तोलेः खेःइतो। गाःहाङःलो ओउः भेदाकोः चोःपाय् आल्चाः ओहाङःलेः ओउःमयःमा ओउःकायः गुल्ह्लाङ् आल्नै। मान्तालम्कःसै ल्हाङ्ती ओउःमयःपाय् सायःकोः आव्काल् नीव्काल्लो लेखालेः परमेस्वर्कायःमा ओउः भेदाकोः चोःकायःमा ल्हाओ खेःतो। 5 ओउःमयःइ गलकायःमा माःराय् नोःइली जुगाङ् छय्ङ्तो केह्तोलेः खेःइतो। 6 ओहाङःसैको ङाइ योती अलवःहाङः यात्ज्योः अरु लाङ्काकोः ल्होक्ओमयः स्युङ्तो मुओ च्यवःआलाङः। ओउःइपाय् सबै खलक्लम् भासालम् देस्लम् जात्लम्कोः मान्तालम्कायः सबै ल्हाव्ह्दैबाङ्हाङः मुओलम्कायः ओउः गलकायःमा वाय्मालो पेओ समचार् तोलाङ् वाङ्ओ खेःतो 7 “लौ परमेस्वर्कायः एङःतीलेः ताङ्ह्ताक्नु। ओउःइ मान्तालम्कायः तय्छनःती योसा दीन् दाह्ओआः बा। लौ ओउः ल्हाव्ह्दैबाङ् फेल्बाङ् तीःलम् जापीनःती न्यास्ओचाक्कायः लुङ्तीलेः ताङ्ह्ताक्नु दा” त दाय्ह्ती ओउः ल्होक्ओमयःइ सोतोलेः दाय्ह्आकाय्। 8 ओहाङःसैको ओउःकायः गुल्ह्ती यात्ज्योः अरु ल्होक्ओमयः वाङ्ओ “लौ ह्र्योक्ती वाय्ओ लेःआः बा। ओउः ताङ्ह्ओ बाबीलोन् त तोओ सहर्पाय् ह्र्योक्ती वाय्ओ लेःआः बा। ओउःइपाय् सबै जात्लम्कायः ओउःकोः ल्हास्या काम् जाङ्ह्साकायः थ्योन्ह्ती हान् ङोओलम्लो लेखालेः ब्रःताक्आकान्” त दाय्ह्ती ओउः ल्होक्ओमयः दाय्ह्आ। 9 ओहाङःसैको ओउःनीस् ल्होक्ओमयःकायः गुल्ह्ती यात्ज्योः अरु वाङ्आ “लौ सुसुइ ओउः तीःसै थाओकायःमा ओउःकोः मुर्तीकायःमा मानचानी ओउःकोः चीन्ह जेल्ह्हाङःया क्रुत्हाङःया त्याक्चानी 10 ओउःकःपाय् परमेस्वर्कोः ल्हुङ् आन मल्ह्तो स्याव्नाः। ओउःपाय् परमेस्वर्इ बयःसा न्युम्ह्झ्याङ्कोः जुदालेः दोःनाः बा। परमेस्वर्कोः छय्ङ्तो लाङ्काहाङः मुओ ल्होक्ओमयःकोः मीक्हाङःमा ओउः भेदाकोः चोःकोः मीक्हाङःमा ओउःइपाय् गन्धक्कोः म्हेःहाङः आन न्युम्ह्लेःनानी। 11 ओउःमयःकायः न्युम्ह्ताक्सा म्हेःकोः म्हेःकुःपाय् गलकायःमा उलःनाः। ओउः तीःसै थाओकायः मानओलम्मा ओउःकोः मुर्तीकायः मानओलम्मा ओउःकोः मय्ङ्कोः चीन्ह त्याक्ओलम्मा ओउःमयःपाय् न्युम्ह्ओसै न्हीदीङ्मा याह्दीङ्मा गलकायःमा धोसा खाय्नीली” त दाय्ह्ती सोतोलेः दाय्ह्आ। 12 ओउःमयःखे ओउःत स्याव्नै त झ्यान्ते परमेस्वर्कोः मान्तालम्खेइ लीह्सीःओ च्यवःओ बेलाहाङः पेतो गोरःसामा खेःतो येसुकायः ल्हुङ् क्रोङ्तोलेः ङ्हाम्ती परमेस्वर्कोः गानाक्ती तोओ कुरा ग्याती जाङ्ह्सामा खेःतो। 13 ओहाङःसैको लाङ्कासै वाङ्ओ हाव्नयः सायःआलाङः “लौ ‘द्याह्हाङःसै सुसु परमेस्वर्कोः काम् जाङ्ह्साकायः सीलेःनाः ओउःपाय् चोङाय्तोलेः स्याव्नै’ त दाय्ह्ती लेखउ दा” त दाय्ह्ती दाय्ह्ओ खेःतो। “माः है आन चोङाय्तोलेः मुनै। ओउःमयःपाय् ओउःमयःइ ह्र्युङ्ती जाङ्ह्ओ काम्लम्सै धोती मुसा खाय्नानी दोह् हायःती दाय्ह्सा ओउःमयःकोः काम् जाङ्ह्झ्याङ्कोः दोःलेःनै” त दाय्ह्ती परमेस्वर्कोः ग्वालामः दाय्ह्आ। 14 ओहाङःसैको ङाइ योती यात्ज्योः भाम्ओ मुस् च्यवःआलाङः। ओउः मुस्हाङः यात्चाक् मान्ताकोः चोःलो लेखा च्युङःती मुओ खेःतो। तालाङ्हाङः ओउःपाय् सुन्कोः मुकुत् ल्हुप्ती लावआकास क्रुत्हाङः ओउःइ व्हानःओ रामालेः चुम्उतो। 15 ओहाङःसैको यात्ज्योः अरु ल्होक्ओमयः मन्दीर्सै ग्ल्युङ्ह्ती ओउः मुस्हाङः च्युङःओचाक्कायः सोतो गोःती “लौ नाङ्कोः रामा त्याक्ती सायः राःउ दा। ल्हाव्ह्दैबाङ्कोः सायःलम्पाय् मीन्तीलेः मुनाः ओउःकायः राःती त्युम्ह्ओ बेलाहाङः दाह्ओआः बा” त दाय्ह्ती तोआथै। 16 ओउःत तोआक्तीको ओउः मुस्हाङः च्युङःओचाक्पाय् रामाइ ह्रीह्ती ल्हाव्ह्दैबाङ्कोः राःती त्युम्ह्आकान्। 17 ओहाङःसैको यात्ज्योः अरु ल्होक्ओमयः मन्दीर्सै ग्ल्युङ्ह्ती वाङ्ओ। ओउःमा व्हानःओ रामा लात्आकान्। 18 आने यात्ज्योः अरु म्हेः योती गम्ओ ल्होक्ओमयः मन्दीर्कोः ल्हाती बयःसा बेदीसै ग्ल्युङ्ह्ती ओउः रामा लात्ओ ल्होक्ओमयःकायः सोतो गोःती “लौ नाङ्कोः व्हानःओ रामा लात्ती ल्हाव्ह्दैबाङ्हाङः मुओ धाक्सायः सायःलम् त्युम्ह्ती वानःउ। ओउः सायःपाय् मीन्ओ लेःआः” त दाय्ह्ती तोआथै। 19 ओउःत तोआक्तीको ओउः ल्होक्ओमयःइ रामा ह्रीह्ती ल्हाव्ह्दैबाङ्हाङः मुओलम्पाय् धाक्सायःलो लेखालेः त्युम्ह्ती वानःती सायःकोः झोती च्युरःसा थाव्हाङः काआकान्। ओहाङः परमेस्वर् ल्हुङ् मल्ह्ती झ्यान्ते न्युम्ह्ताक्आथास। 20 ओउः सहर् बाहीरकोः थाव्हाङः ओउःमयः झोती सात्ओ खेःतो। ओउःमयःकोः वयःपाय् झोओ थाव्सै ग्ल्युङ्ह्ती यात् सै कीलोमीतर्कायः होती ज्याल्आ घोराच्युक् ज्युम्ह्तो खेःतो। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.