प्रकाश 13 - चेपाङ1 रुपाय् द्युम्मालो तीःकोः चीनःसै मुतोक्हाङः तीःसै यात्ज्योः अरु खाल् थाओ त च्यवःआताङः। ओउःपाय् दस् रोङः सात् तालाङ् नाःओ खेःतो। ओउः दस् रोङःहाङःपाय् रोङः रोङःहाङः यात्ज्योः मुकुत् ल्हुप्ओ खेःतो तालाङ् तालाङ्हाङः परमेस्वर्कायः पेमालो जवओ मय्ङ् लेखओ खेःतो। 2 ओउः तीःसै थाओ खाल्पाय् जाःलो लेखा खेःतो दोम्पाय् योम्कोःलेः म्होतोङ्पाय् माजाःकोः म्होतोङ्। ओउःकायः ओउः ताङ्ह्ओ रुइ लयःकोः ग्वम्मा लयःकोः राजा च्युङःसा थाव्मा सबै हुकुम् बयःसाकायः बयःआथै। 3 ओहाङःसैको ओउः दस् तालाङ् नाःओ जाःकायः यात्ज्योः तालाङ्हाङः “सीनाः” त म्हर्सीःओ ताङ्ह्ओ चोत् दोःओ खेःतो। ओउःतलेः खेःतो द्याह् योतोक्हाङः सेलः स्याव्ओ लेःआः। ओउःत झ्यान्ते ल्हाव्ह्दैबाङ्हाङः मुओलम्इ आन ग्याङ्ह्ती ओउः दस् तालाङ् नाःओ जाःकायः गुल्ह्आथै। 4 ओहाङःसैको ओउः जाःकायः ओउः रुइलेः हुकुम् बयःसा ग्वम् बयःआकान् त चीःती ओउः रुकायःपाय् सबै मान्तालम्इ ताङ्ह्ताक्आथै। ओउः जाःकायःमा “लौ इ जाःच्युक् ताङ्ह्ओ सुलो खेःचाः र ओउःकायः सुइलो क्लीमःसा खाय्चौ” त दाय्ह्ती ओउःकायः ताङ्ह्ताक्आकानी। 5 ओउः जाःकायःपाय् लयःकायः ताङ्ह्ताक्ओमा परमेस्वर्कायः म्होतोङ्सै राव्ओ कुरालम् नोःसा ताक्ओ खेःतो बयालीस् महीनाकायः ओउःत हायःसा ग्वम् दोःओ खेःतो। 6 ओउः बेलाहाङः ओउः जाःइ परमेस्वर्कायः आन पेमालो तोआकान् परमेस्वर्कोः मय्ङ्कायःमा परमेस्वर्कोः याक्ती मुओ थाव्कायःमा सबै लाङ्काहाङः मुओलम्कायःमा ओउः जाःइ आन पेमालो तोआकान्। 7 ओहाङःसैको ओउः जाःकायःपाय् परमेस्वर्कोः मान्तालम्कायः मीन्ह्काय्ती क्लीमःसा ताक्ओ खेःतो। सबै खलक्लम्कायः सबै देस्लम् भासा नोःओलम् जात्लम्कायः हुकुम् बयःसा ग्वम् ओउःकायः बयःओ खेःतो। 8 ओउः जाःकायः सबै ल्हाव्ह्दैबाङ्कोः मान्तालम्इ ताङ्ह्ताक्ती माननानी। सुसुकोः मय्ङ्पाय् ल्हाव्ह्दैबाङ् जापीनःती न्यास्ओ बेलाहाङःसै ओउः ल्हाती सात्ओ भेदाकोः चोःइ लेखओ जीङः नाःओलम्कोः कीताप्हाङः लेखती मुनाः ओउःमयःइ झुङ्आले ओउः जाःकायः माननीली। 9 लौ इ कुरापाय् पेतोलेः सायःनु दा। 10 सुसुकायः “ओउःपाय् थुनपाःथै” त रय्ह्ती गम्ओलेः मुनाः ओउःकायः थुनसाकायः आलःनानी। सुसु अरुकायः “तरवाल्इ सात्पाःथास” त दाय्ह्ती रय्ह्ओ लेःआः ओउःकायः तरवाल्इ सात्सा खेःतो। ओउःत झ्यान्ते परमेस्वर्कोः मान्तालम् लीह्सीःओ गोरःती ल्हुङ् क्रोङ्तोलेः ङ्हाम्ती मुसा खेःतो त दाय्ह्ओलेः मुनाः। 11 ओहाङःसैको अरु खाल् साःसै थाती वाङ्ओलेः च्यवःआलाङः। भेदाकोः चोःलो लेखालेः ओउःपाय् नीस् रोङः नाःओ खेःतो ओउःकोः हाव्नयःपाय् नाक् रुकोः हाव्नयःलो लेखा खेःतो। 12 ओउःपाय् ओउः जाःकोः खाल्कोः मीक्हाङः ओउःकोः ग्वम् दोःती ओउः साःसै थाओ खाल्इ ल्हाव्ह्दैबाङ्कोः मान्तालम्कायःमा सबै थोक्लम्कायःमा ओउः ङ्हाकोः चोत् नाःओ लोने सेलः स्याव्ओ जाःकोः खाल्कायः मानताक्आथास। 13 ओहाङःसैको ओउः साःसै थाओपाय् आन ग्याङ्ह्राय् जाङ्ह्आकान् सबैकोः मीक्हाङः ओउःइ लाङ्कासै साःताङ् म्हेः ग्लेःताक्आकान्। 14 ओउःतलेः ओउः जाःकोः खाल्कःहाङः मुती ग्याङ्ह्राय् जाङ्ह्सा ग्वम् दोःती ओउः साःसै थाओखेइ सबै ल्हाव्ह्दैबाङ्हाङः मुओलम्कायः माःतीलेः स्यान्आकान् “लौ ओउः तीःसै थाओ तरवाल्इ वयःआक्तीको सेलः स्याव्ओकायःपाय् मानसा थेङा यात्ज्योः मुर्ती जाङ्ह्नु” त दाय्ह्ती ओउःइ गानाक्तीलेः तोआथास। 15 एत हायःआक्तीको ओउः साःसै थाओखेइ ओउः मुर्तीकायः जीङः बयःसा थेङा ग्वम् बयःओ खेःतो। ओहाङःसैको जीङः बयःआक्तीको ओउः मुर्ती नोःसा खाय्ओ खेःतो ओउःकायः मानसा ग्यामालोलम्कायःमा सात्ताक्सा खाय्ओ खेःतो। 16 ओहाङःसैको ओउःइ सबै मान्तालम्कायः छ्यानःसाकायः चीन्ह गम्आकान्। मीओ मान्तामा ताङ्ह्ओ मान्तामा साहुमा ह्र्यात्मा नोकरी काम् जाङ्ह्ओलम्मा काम् जाङ्ह्सा खेःमालोलम्मा सबैकायः ओउःइ कोय् मान्ताकायः ङोय् क्रुत्हाङः अरुकायः जेल्ह्हाङः ओउः चीन्ह लात्ताक्आकान्। 17 ओउः चीन्हपाय् ओउः ङ्हा थाओकोः मय्ङ्मा ओउःकोः नम्बर्मा लेःआः। ओउः चीन्ह आःताः लात्माःत थोक्लम् वीनःसाकायःमा लेःसाकायःमा सुकायःमा ताक्थासल। 18 इत चीःसाकायः व्हाय्तोलेः चीःसा खेःतो। सुसु व्हाय्तोलेः मुनाः ओउःइपाय् ओउः ङ्हा थाओकोः नम्बर् तय्ह्पानी दोह् हायःती दाय्ह्सा ओउः नम्बर्पाय् मान्ताकोः मय्ङ् छ्यानःनौ। ओउः नम्बर्पाय् छसै छयासाठी लेःआः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.