प्रकाश 12 - चेपाङ1 ओहाङःसैको फेल्बाङ्हाङः ग्याङ्ह्सीःओमा ताङ्ह्ओ छ्यानःराय् च्यवःओ खेःतो। यात्चाक् मोमःचोः थाआ। ओउःपाय् न्याम्लो खेःओ नाय् क्रमःओ खेःतो ओउःकोः दोम्पाय् लाह्हाङः झाम्ती मुओ तालाङ्हाङः मुकुत्लो लेखालेः बारगोता फोङ्ती मुओ कार्लम् खेःतो। 2 ओउः मोमःचोःपाय् चोः ओत्सा स्याव्खेःओ मुती झ्यान्ते जीक्ती र्याःआ। 3 ओहाङःसैको फेल्बाङ्हाङः अरु ताङ्ह्ओ छ्यान्ह्राय् थामाआ। यात्ज्योः आन ताङ्ह्ओ दुओ नाक् रुकोः खाल् च्यवःओ खेःतो। ओउःपाय् सात् तालाङ्मा दस् रोङः नाःओलेः तालाङ् तालाङ्हाङः यात्ज्योः मुकुत् ल्हुप्ओ खेःतो। 4 ओउःकोः मेःइ फेल्बाङ्कोः कार्लम्कोः सुम् भाक्कायः यात् भाक् फ्यास्ती ल्हाव्ह्दैबाङ्ताङ् क्लाःती वाय्आकान्। ओउः रुपाय् ओउः मोमःचोःइ चोः ओत्माकादे चोःकायः जेःती माक्माकादे बोङःसाकायः ओउः मोमःचोःकोः ङ्हासै ल्युङ्ह्ती मुओ खेःतो। 5 ओहाङःसैको रु ल्युङ्ह्ती मुतोक्हाङः ओउः मोमःचोःइ गोय्चोःचोःलेः ओत्आकान्। ओउः गोय्चोःपाय् लोनेः सबै जात्लम्कायः जोक्ओ ल्हुङ्इ राजालो लेखा हुकुम् बयःनाःथास। ओहाङःसैको ओत्आक्तीको ओउः चोःखेकायः रेन्ह्तोलेः रुकःसै लाती परमेस्वर्कःताङ्मा ओउःकोः राजा च्युङःसा थाव्ताङ्मा आलःओ खेःतो। 6 आमाखेपाय् मान्ता याक्गार्सीःमालोहाङः परमेस्वर्इ ङ्हा जाङ्ह्ओ थाव्ताङ् क्रव्आ। ओहाङः बारसै साथी दीन्च्युक्कायः ओउः मोमःचोःकायः स्यास्सा खेःतो। 7 ओहाङःसैको लाङ्काहाङः आन मीन्ह्काय्ओ स्याव्आ। मीकाएल् त तोओ ताङ्ह्ओ ल्होक्ओमयःइमा ओउःकोः अरु ल्होक्ओमयःइ ओउः ताङ्ह्ओ रुकुस्मा ओउःकोः ल्होक्ओमयःकुस्मा मीन्ह्काय्ती कायःकाय्ती 8 ओउःमयःकायः क्लीमःआकानी। ओहाङःसै ओउः ताङ्ह्ओ रुकायःमा ओउःकुस् वाह्ओ ल्होक्ओमयःकायःमा लाङ्काहाङः मुसा ताक्थासल। 9 ओउः ताङ्ह्ओ रुपाय् लान्कोः राजा सैतान् त तोओलेः ओउःपाय् सबै ल्हाव्ह्दैबाङ्हाङः मुओलम्कायः माःती थ्योन्ह्ओ काम् जाङ्ह्आकान्। क्लीमःतोक्हाङः ओउःकायःमा सबै ओउःकुस् वाह्ओ ल्होक्ओमयःकायःमा ल्हाव्ह्दैबाङ्ताङ् क्लाःओ खेःइतो। 10 ओहाङःसैको ओउःमयः क्लाःआक्तीको लाङ्काहाङः सोतो हाव्नयः सायःआलाङः “लौ द्याह्गोते ङीकोः परमेस्वर्कोः दल्ताक्सा ग्वम्मा ओउः राजीमा छ्यानःओ लेःआः बा। ओउःकोः ख्रीस्कोः हुकुम् बयःसा ग्वम्मा छ्यानःओ लेःआः। ङीकोः पुःचोङ् हौचोङ्कायः परमेस्वर्कःताङ् न्हीदीङ्मा याह्दीङ्हाङःमा गाल्तुम्ओचाक्कायः लाङ्कासै रुनःती क्लाःओ लेःआः बा। 11 ङीकोः पुःचोङ् हौचोङ्लम्इपाय् भेदाकोः चोःकोः वयःइमा ओउःकोः कुरा छ्यानःतीमा सैतान्कायः क्लीमःआकानी। ख्रीस्कोः कुरा छ्यानःसाकायः ‘लौ सीसामा ग्यालेःनाङी’ त दाय्ह्तीलेः नोःआकाय्। 12 लौ उया लाङ्कामा लाङ्काहाङः मुओलम्खेमा चोङाय्तोलेः स्याव्तेःपै। ल्हाव्ह्दैबाङ्हाङःमा द्युम्मालो तीःहाङःमा ओहाङः मुओलम्खेमा लीह्तोलेः स्याव्तेःपै दोह् हायःती दाय्ह्सा सैतान्पाय् नीङ्कःताङ् क्लाःती ल्होक्ओ लेःआः। ओउःहाङः ओउःपाय् ज्याङःतो मुसा दोःल ओउःत चीःती झ्यान्ते सैतान् आन ल्हुङ् मल्ह्तो लेःआः बा” त दाय्ह्ती दाय्ह्ओ खेःतो। 13 ओहाङःसैको “कामःअ ल्हाव्ह्दैबाङ्ताङ् क्लाःती ल्होक्ओ लेःआः ङ” त चीःआक्तीको ओउः ताङ्ह्ओ रुइपाय् ओउः गोय्चोः ओत्ओ मोमःचोःकायः गुल्ह्आथै। 14 गुल्ह्तोक्हाङः ओउः रुसै दल्तो स्याव्साकायः याक्गार्सीःमालो थाव्ताङ् स्युङ्ती आल्साकायः ओउः मोमःचोःकायः ताङ्ह्ओ मुवाःकोः नीस्ज्योः पाप् बयःओ खेःतो। याक्गार्सीःमालो थाव्हाङः ओउः मोमःचोःकायः साधे तीन् बर्सकायः स्यास्सा खेःतो। 15 ओहाङःसैको “ओउः मोमःचोःकायः तीःइ आलःती म्हीत्ताक्पाःथै” त दाय्ह्ती ओउः ताङ्ह्ओ रुइ म्होतोङ्सै खोलाकोः तीः होताक्आकान्। 16 ओउःतलेः रुखेइपाय् तीः होताक्उतो साःइलेः ओउः मोमःचोःखेकायः दल्ताक्साकायः म्होतोङ्लो लेखा गाती तीः सबै सीप्तोलेः योक्आकान्। 17-18 ओउःइ होताक्ओ तीः सीप्ओ लेःआः त योती झ्यान्ते ओउः ताङ्ह्ओ रुपाय् ओउः मोमःचोःकः आन ल्हुङ् मल्ह्ती ओउःकोः अरु चोःलम्कुस् मीन्ह्काय्लाङ् आल्आ। ओउः मोमःचोःकोः अरु चोःलम्पाय् परमेस्वर्इ तोओ कुरा ग्याती जाङ्ह्ओ येसुइ स्यान्ओ कुरा ङ्हाम्ओलम् लेःआः इ। ओहाङःसैको ओउः ताङ्ह्ओ रुपाय् द्युम्मालो तीःकोः चीनःसै मुओ खेःतो। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.