प्रकाश 11 - चेपाङ1 ओहाङःसैको ङाकायः यात्ज्योः क्रुसाकायः क्रात्कोः दङ्ग बयःओ खेःतो “लौ चीङ्अ परमेस्वर्कोः मन्दीर्कायःमा बेदीकायःमा क्रुलाङ् आल्अ दा। फेरी मन्दीर्हाङः मानओ मान्तालम्कायःमा थेङ्उसु। 2 मन्दीर्कायः क्रुउ ओउः मन्दीर्कोः बाहीरहाङः मुओ आङ्गन्लम् क्रुलाम् दोह् हायःती दाय्ह्सा ओउःपाय् यहुदी खेःमालोलम्कायः बयःओ लेःआः। ओउःमयःइ बयालीस् महीनाकायः परमेस्वर्कोः छय्ङ्ओ सहर्कायः दोम्इ झोतोलेः वाय्नानी। 3 ओउः बारसै साथी दीन्कायः ङाकोः कुरा ल्हाक्ती छ्यानःओ नीस्चाक्कायः ग्वम् दोःती ग्रान्नाय् लावती ङाकोः कुरा थोल्ह्ती तोनाःचु” त दाय्ह्ती ङाकायः तोओ खेःतो। 4 ओउःनीस्पाय् नीस्ज्योः जैथुन् सीङःमा लेःआः च ल्हाव्ह्दैबाङ्कोः प्रभुकोः मीक्हाङः मुओ बत्ती गम्सा तेव्केरानीस् लेःआः च। 5 ओउःनीस्कायः सुखेलोइ रेव्तो हायःसा बोङःचाःथाच त खेःया ओउःनीस्कोः म्होतोङ्सै म्हेः ग्ल्युङ्ह्ती ओउः रेव्तो हायःसा बोङःओ बीरोत्लम्कायःलेः जेःती माक्नाःथै। ओउःनीस्कायः रेव्तो हायःसा बोङःओलम्पाय् ओउःतलेः सीलेःनाः। 6 ओहाङःसैको ओउः नीस्चाक्कायः न्याम्कायःमा मुस्कायःमा त्याःसा ग्वम् बयःओलेः खेःतो ओउःनीस्इ तीः वासा ताक्माःत झ्यान्ते परमेस्वर्कोः कुरा छ्यानःती तोओ बेलाहाङःपाय् तीःपाय् दोह्मा वाल। फेरी तीः कावःराङ्कोः तीःलम् वयः स्याव्ताक्सा ग्वम्मा ओउःनीस्कायः बयःओ लेःआः। ल्हाव्ह्दैबाङ्ताङ् सबै खाल्कोः रैसीःओ महामारीलम् लयः झाक्ओहाङः ल्होक्सा ग्वम्मा ओउःनीस्कायः बयःओलेः बा। 7 ओहाङःसैको ओउः नीस्चाक्इ कुरा थोल्ह्ती तोओ दप्आक्तीको ओउः कामःअ नालासै ग्ल्युङ्ह्ती वाङ्ओ जाःलम्कोः खाल् वाङ्ती ओउः नीस्चाक्कुस् मीन्ह्काय्ती ओउःनीस्कायः क्लीमःती सात्नाःथाच। 8 सात्आक्तीको ओउः नीस्चाक्कोः म्हाङ्पाय् ओउः ताङ्ह्ओ सहर्कोः ल्याम्हाङः फेती गम्ओ खेःतो। ओउः ताङ्ह्ओ सहर्पाय् ओउः नीस्कोः प्रभुकायः क्ल्याय्ओ सीङःहाङः योकोःती सात्ओ सहर् लेःआः। ओउः सहर्पाय् सोदोम्मा मीस्रा त तोओ हाल् मय्ङ् बयःओलेः खेःतो। 9 ओहाङःसैको सबै देस् देस्सै खलक् खलक्सै सबै भासा नोःओलम्सै जात्लम्सै वाङ्ओ मान्तालम्इ साधे तीन् दीन्च्युक्कायः ओउः नीस्चाक्कोः म्हाङ्कायः योनानी ओउः नीस्कायः पाम्ह्सा ताक्नीली। 10 ओहाङःसैको ओउःनीस् सीती झ्यान्ते ल्हाव्ह्दैबाङ्कोः मान्तालम्पाय् आन म्रोतोलेः स्याव्ओ खेःइतो। ओउःमयःपाय् ओउःच्युक् म्रोतोलेः स्याव्ती लःलयःकायः थोक्लम् सोह् वीनःकाय्ती ल्होक्काय्आकाय् दोह् हायःती दाय्ह्सा ङ्हापाय् ओउः नीस्चाक्इ सेलः मुतोक्हाङःपाय् सबै ल्हाव्ह्दैबाङ्हाङः आन लीह्सीःओ बयःआकाचु। 11 मान्तालम्पाय् ओउःतलेः म्रोइतो साधे तीन् दीन् पुत्आक्तीको परमेस्वर्सै वाङ्ओ जीङः बयःसा सास् दोःती ओउःनीस्पाय् उह्आकाच। उह्आक्तीको ओउः नीक्चाक् चीङ्आकाच। ओउःनीस् चीङ्ओ योती ओउःत योओलम्पाय् आन रैआकाय्। 12 ओहाङःसैको लाङ्कासै सोतो दाय्ह्ओ हाव्नयः सायःआकानी “लौ इताङ् लन्ह्ती वाङ्ज दा” त दाय्ह्ती ओउः नीस्चाक्कायः तोओ खेःतो ओउःमयःकोः बीरोत्लम्इ योयोबालेकोः ओउःनीस् लाङ्काताङ् मुस्हाङः लन्ह्आकाच। 13 ओहाङःसैको ओउः नीस् लन्ह्ओ कुस्ब्रक्तलेः ताङ्ह्ओ ल्याङ् वाङ्ती सहर्कोः दस् भाक्कायः यात् भाक् ह्र्योङःती वाय्ओ खेःतो। ल्याङ्इ सात्ओ मान्तालम्पाय् सात् हजार् खेःतो अरु सात्मालोलम्इपाय् आन रैती लाङ्काहाङः मुओ परमेस्वर्कायः ताङ्ह्ताक्आकानी। 14 इत स्याव्ओकुस् नीस्ज्योः रेव्ओ बेलालम् ज्याल्लेःआ यात्ज्योः अरु देङी वाङ्खेःनाः। 15 ओहाङःसैको ओउः सात्गोता ल्होक्ओमयःकोः ओउः दप्ती सोय्ह्तो स्याव्ओपाय् ओउःकोः तुरही मुत्आकान्। मुत्आक्तीको लाङ्काहाङः सोतो गोःओ हाव्नयःलम् सायःओ खेःतो “लौ ल्हाव्ह्दैबाङ्कोः राजीपाय् ङीकोः परमेस्वर्कोःमा ओउःकोः ख्रीस्कोःमा स्याव्ओआः बा। ओउःपाय् गलकायःमा हुकुम् बयःसा राजालेः स्याव्नाः” त दाय्ह्ती दाय्ह्ओ खेःतो। 16 ओहाङःसैको ओउः लःलयःकोः राजाकोः थाव्लम्हाङः च्युङःओ परमेस्वर्कोः मीक्हाङः मुओ चौबीस् थालवःपाइ साःताङ् बाःती परमेस्वर्कायः मानती 17 “लौ नाङ् द्याह्मालेः मुओ ङ्हामा खेःओ लोनेःमा खेःसा ताङ्ह्ओ ग्वम् नाःओ प्रभु परमेस्वर्य नाङ्कायः आन ‘च्युता’ त तोसा लेःआः दोह् हायःती दाय्ह्सा नाङ्इलेःतेः नाङ्कोः ताङ्ह्ओ ग्वम् त्याक्आक्तीको हुकुम् बयःसा राजालेतेः स्याव्ओतेःआः बा। 18 अरु अरु जात्लम्पाय् ल्हुङ् मल्ह्तोलेः स्याव्आकाय् द्याह् नाङ्कोः ल्हुङ् मल्ह्ओ बेला दाह्ओआः बा। सीओलम्कायः तय्छनःती योसा बेलामा सबैकोः जाङ्ह्झ्याङ्कोः बयःसा बेलामा दाह्ओ लेःआः। नाङ्कोः काम् जाङ्ह्ओ कुरा छ्यानःती तोओलम्कायःमा नाङ्कायः ङ्हाम्ओलम्कायःमा नाङ्कोः मय्ङ् मनःओलम्कायःमा ताङ्ह्ओमा मीओमा सबैकायः काम् जाङ्ह्झ्याङ्कोः बयःसा बेला द्याह् दाह्ओआः। ल्हाव्ह्दैबाङ्कायः रेव्ताक्ती वाय्ताक्ओलम्कायःमा वाय्ताक्सा बेला दाह्ओ लेःआः बा” त दाय्ह्ती ओउः चौबीस् थालवःपालम् दाय्ह्आकाय्। 19 ओहाङःसैको ओउःमयः दाय्ह्आक्तीको परमेस्वर्कोः लाङ्काहाङः मुओ मन्दीर्पाय् फोल्ओ खेःतो। फोल्आक्तीको ओउःकोः भीत्रहाङः तोती गम्ओ कुराकोः बकीस् च्यवःसाकायः छ्यान्ह्ओ खेःतो। ओहाङःसैको न्याम् प्लीङ्ह्ती मुक्ओकुस् ल्याङ्मा तोल्तोल्ओ वेर्मा वाङ्आ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.