प्रकाश 10 - चेपाङ1 ओहाङःसैको यात्चाक् अरु ताङ्ह्ओ ल्होक्ओमयः लाङ्कासै ग्ल्युङ्ह्ओ च्यवःआलाङः। ओउःपाय् मुस्इलेः क्रमःओ खेःतो। तालाङ्हाङः यो मुतो ओउःकोः खेन्पाय् न्याम्लो लेखा थोङ्तो दोम्पाय् म्हेः ल्युङ्ओ धुर्कुनःसीङःलो लेखा खेःतो। 2 ओउःकोः क्रुत्हाङः यात्ज्योः मीओ फास्ओ कागत्कोः थुरी खेःतो। ओउःकोः ङोय् दोम्पाय् द्युम्मालो तीः माल्गहाङः मुओ खेःतो वेःदोम् साःहाङः तेक्ओ खेःतो। 3 ओउःइपाय् माजाःकोः हाव्नयःलो लेखा ङुर्ती गोःउतो गोःआक्तीको सात्गोता मुक्ओ त्याङ्आकाय्। 4 त्याङ्आक्तीको ओउःमयः त्याङ्ओ कुरापाय् लेखसा बोङःङोतो लाङ्कासै हाव्नयः वाङ्ती “लौ ओउः सात्गोता मुक्ओइ नोःओ कुरापाय् अरुकायः छ्यानःमाःत ल्हुङ्हाङः सेती गम्उ ओउःपाय् लेखलाम्” त दाय्ह्ती ङाकायः तोआताङः। 5 ओहाङःसैको ङाइ ङ्हा च्यवःओ तीः माल्गहाङःमा साःहाङःमा तेक्ओ ल्होक्ओमयःइ ङोय् क्रुत्पाय् लाङ्काताङ् प्योती 6 ओउः गलकायःमा जीङः नाःओ परमेस्वर्कोः मय्ङ् पेह्ती लाङ्काहाङः ल्हाव्ह्दैबाङ्हाङः द्युम्मालो तीःहाङः नाःओ थोक्लम्कायः जापीनःती जाङ्ह्ओ परमेस्वर्कोः मय्ङ् पेह्ती कीरीया जेःआकान् “लौ द्याह्पाय् बीलम्ब नाःल। 7 ओउः दप्ती सोय्ह्ओ ल्होक्ओमयःइ तुरही मुत्खेःतोक् दीन्लम्हाङः परमेस्वर्इ ओउःकोः काम् जाङ्ह्ओ कुरा छ्यानःती तोओलम्कायः ङ्हा तोओलो लेखालेः ओउःइ सुकायःमा छ्यानःआक्मालो कुरापाय् ताप्लेःताक्नौ” त दाय्ह्ती ओउः ताङ्ह्ओ ल्होक्ओमयःइ तोआकान्। 8 ओहाङःसै ङाइ ङ्हा सायःओ लाङ्कासै वाङ्ओ हाव्नयःइपाय् फेरीलेः सायःती “लौ द्युम्मालो तीःहाङःमा साःहाङःमा तेक्ओ ल्होक्ओमयःकःताङ् आल्ती ओउःकोः क्रुत्हाङः मुओ कागत्कोः थुरी ओउःकःसै त्याक्उ दा” त ङाकायः दाय्ह्ती तोओ खेःतो। 9 ओउःतलेः तोआक्तीको ङा ओउः ताङ्ह्ओ ल्होक्ओमयःकःताङ् आल्ती ओउः कागत् थुरीलेः तेआलाङः। ङा एत तेतोक्हाङः “लौ नोह्अ ओउःपाय् जेःउ दा। जेःआक्तीको नाङ्कोः तुक्खेहाङः ओउःपाय् स्रोक्लेःनाः म्होतोङ्खेहाङः तुमःखुदुलो स्योक्तो सायःतेःनाःस” त दाय्ह्ती तोताङःतो 10 ओउः थुरी त्याक्ती जेःतोक्हाङः ओउःपाय् म्होतोङ्खेहाङः तुमःखुदुलो लेखा स्योक्तो लेःआः खेःतो योक्आक्तीको तुक्खेहाङः स्रोक्तोलेः स्याव्आ बा। 11 “लौ नाःतो देस्कोः मान्तालम्कायःमा जात्लम्कायःमा भासालम् राजालम्कायःमा नाङ्इ परमेस्वर्इ छ्यानःओ कुरा दाय्ह्सा खेःतो” त दाय्ह्ती ङाकायः तोओ खेःतो। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.