प्रकाश 1 - चेपाङ1 इपाय् येसु ख्रीस्इ छ्यानःओ कुरा लेःआः। ओउःकोः लयःकोः काम् जाङ्ह्ओलम्कायः “रेन्ह्तोलेः वाङ्सा खेःओ कुरा दोह्लो” त स्यान्सा थेङा इ कुरा परमेस्वर्इ येसु ख्रीस्कायः बयःआथै। ओहाङःसैको येसुइ लयःकोः काम् जाङ्ह्ओ युहनाकायः इ कुरा छ्यानःसा थेङा यात्चाक् लाङ्कासै ल्होक्ओमयः ल्होक्आकान्। 2 युहनाइ च्यवःओ कुरापाय् ओउःइ सबै ल्हाक्ती तोनौ। परमेस्वर्कोः नोःराय्मा येसु ख्रीस्इ छ्यानःओ दोङ् कुरामा ओउःइ सबै स्यान्ती तोलेःनौ। 3 ओउः कुरापाय् इ कीताप्हाङः लेखती मुनाः। ओउःत झ्यान्ते इ कीताप् पह्रओ मान्तामा इहाङः लेखओ छ्यानःओ कुरा ग्याती सायःओलम्मा भालाकोःलम् लेःआः इ दोह् हायःती दाय्ह्सा इ कुरा स्याव्सा खेःओ बेला द्याङ्तोलेः दाह्खेःओआः बा। 4 इ कुरा ङा युहना त तोओइ असीया अन्चल्हाङः मुओ सात् थाव्कोः ङ्हाम्ओलम्कायः लेखनाङः। लौ परमेस्वर्पाय् द्याह्लेः मुनाः ङ्हामा खेःलेःतो लोनेःमा वाङ्सा खेःलेःनाः। ओउः गलकायःमा मुओ परमेस्वर्इमा ओउःकोः राजालो च्युङःती मुओ थाव्कोः ङ्हासै मुओ सात्गोता ग्वालामःलम्इमा नीङ्कायः योनःती योती ल्हुङ् धोमाय्ताक्तेःपै। 5 ओउः ङ्हाम्सीःओ परमेस्वर्कोः कुरा छ्यानःओचाक् येसु ख्रीस्इमा नीङ्कायः योनःती योती ल्हुङ् धोमाय्ताक्तेःपै। ओउः परमेस्वर्कोः चोः येसुपाय् अरुसै ङ्हालेः सीओसै उह्ती च्योक्माआ ओउःपाय् ल्हाव्ह्दैबाङ्कोः राजालम्सै पुःमानाः। येसु ख्रीस्इपाय् ङीकायः राप्लेःनाःतय्ही ओउःकोः वयः बयःती ङीकोः रेव्झ्याङ्कोः क्युम्ह्ताक्आतय्ही। 6 ङीकायः ओउःकोः राजीकोः मान्तालम् स्याव्ताक्ती “लौ ङाकोः परमेस्वर् आपाकायः मानपानी” त दाय्ह्ती ङीकायः पुरोहीत् जाङ्ह्आतय्ही। ओउः येसु ख्रीस्कायःपाय् गलकायःमा ग्वम् नाःती ताङ्ह्तोलेः मुपाः। माः क्याने ओउःतलेः स्याव्पाः। 7 लौ ओउःपाय् मुस्हाङःलेः वाङ्धै मुलेःनाः। ओउः बेलाहाङःपाय् ओउःकायः सबैइ च्यवःसा खाय्नानी। ओउःकायः ह्रोङ्ह्ती सात्ओलम्इमा ओउःकायः च्यवःलेःनानी ओहाङःसैको ल्हाव्ह्दैबाङ्कोः मान्तालम्पाय् सबैइ ओउःकायः क्रेस्लेःनानी। माः है ओउःतलेः स्याव्पाः दा। 8 “लौ ङापाय् सबैसै ङ्हामा लेःआः ङ। ङापाय् सबैसै लोनेःमा लेःआः ङ” त दाय्ह्ती ओउः ग्वम् नाःओ प्रभु परमेस्वर् दाय्ह्नाः। ओउःपाय् द्याह्लेः मुनाः ङ्हामा खेःलेःतो लोनेःमा वाङ्सा खेःलेःनाः। 9 ङापाय् युहना त तोओलेः नीङ्कोः पुः स्याव्ती ङाइ नीङ्कुस् येसुकायः लीह्सीःओ गोरःमानाङः नीङ्कुस्लेः ओउःकोः राजीहाङः मुमानाङः ओउः वाङ्साकायः ल्युङ्ह्तीलेः मुमानाङः। परमेस्वर्कोः नोःराय्मा येसुइ छ्यानःओ कुरामा थोल्ह्ती तोती झ्यान्ते ङापाय् पात्मोस् त तोओ तीःइ तोङःती गम्ओ देस्हाङः थुनतीलेः मुनाङः। 10 प्रभुकोः दीन्हाङः ओउःकोः ग्वालामः दोःआक्तीको ङाइ सोतो हाव्नयः तुरहीलो लेखालेः काह्सै सायःआलाङः 11 “लौ दोह् दोह्तेः च्यवःतेःनौ ओउःलेः कीताप्हाङः लेखआक्तीको ओउः कीताप्पाय् इ सात् थाव्कोः ङ्हाम्ओलम्कायः ल्होक्उ दा। ओउः सात् थाव्पाय् एफेसस् स्मर्ना पर्गामम् थुयातीरा सार्दीस् फीलादेल्फीया लाओदीकीया त तोआ सात् सहर् लेःआः” त दाय्ह्ती तोआताङः। 12 ओउः हाव्नयः सायःआक्तीको “ङाकायः सुइ एत तोनाःताङः” त दाय्ह्ती म्हर्ती ङाइ काह्सै ल्हेःती योआलाङः। काह्सै ल्हेःती योतोक्हाङः ङाइ सात्गोता बत्ती गम्सा तेव्केरामा च्यवःआलाङः। ओउःपाय् सुन्कोः जाङ्ह्ओलेः खेःतो। 13 ओहाङःसैको ओउःहाङःमा मान्ताकोः चोः त तोओलो लेखालेः यात्चाक् चीङ्ती मुओमा च्यवःआलाङः। ओउःपाय् दोम्ताङ् च्युक्कायःलेः झ्युह्र्ओ नाय्मा लावसतो खोस्हाङः सुन्कोः तोङःनाय्मा तोङःओ खेःतो। 14 ओउःकोः म्याङ्पाय् आन भाम्ओ उन्लो लेखा खेःतो य्हुङ्लो भाम्तोलेः खेःतो। ओउःकोः मीक्पाय् ल्युङ्ओ म्हेःलो लेखा प्लीङ्ह्तो खेःतो। 15 ओउःकोः दोम्खेपाय् म्हेःहाङः युओ पीताल्लो लेखालेः थोङ्तोलेः खेःतो ओउःकोः हाव्नयःखे क्लोनःती ल्हक्अर्ओ तीःलो लेखालेः खेःतो। 16 ओउःकोः ङोय् क्रुत्हाङः सात्गोता कार् चुम्ती मुओ। म्होतोङ्सै आन व्हानःओ तरवाल् ग्ल्युङ्ह्ती मुओ खेःतो ओउःकोः खेन् न्हीदीङ्कोः न्याम्लो लेखा अङ्ग थङ्ग त थोङ्ती मुओ खेःतो। 17 ओउःत च्यवःआक्तीको ङा सीओलो लेखालेः ओउःकोः दोम्कःहाङः प्लातीलेः तोन्आलाङः। ङा एत प्लाती तोन्आक्तीको ओउःइ ङोय् क्रुत्इ ङाकायः झाम्ह्ती “लौ रैलाम् सबैसै ङ्हामा ङा लेःआः ङ सबैसै लोनेमा ङा लेःआः ङ 18 ओउः गलकायःमा जीङः नाःओ ङा लेःआः ङ बा। ङ्हापाय् सीसापाय् सीलेःङोतो द्याह् योची दा ङा द्याह् गलकायःमा सेलः मुलेःनाङः। ङाइपाय् रीःदोलीकोः धोकाकोः सान्चो क्रुत्हाङः चुम्ती झ्यान्ते सीताक्सामा सेलः स्याव्ताक्सा ग्वम् नाःओलेः खेःनाङः” त दाय्ह्ती ओउःइ तोआताङः। 19 ओउःत दाय्ह्ती “लौ उया नाङ्इ द्याह् च्यवःओ कुरामा ङ्हा च्यवःओ कुरामा लोनेः च्यवःसा कुरामा लेखउ दा। 20 नाङ्इ च्यवःओ सात्गोता ङाकोः ङोय् क्रुत्हाङः चुम्ओ कार्लम्मा ओउः सात्गोता सुन्कोः बत्ती गम्ओ तेव्केरामा ओउःमयःकोः माने इलेः द्याह् छ्यान्ह्नेःनाङ्। ओउः सात्गोता कार्लम्पाय् सात् थाव्कोः ङ्हाम्ओलम्कोः ल्होक्ओमयः लेःआः इ। ओउः सुन्कोः सात्गोता बत्तीकोः तेव्केरापाय् सात् थाव्कोः ङ्हाम्ओलम् लेःआः इ बा” |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.